पहिले छुटेका रोशन, अहिले नचाहँदा–नचाहँदै प्रदेशको गृहमन्त्री

तस्वीर : यूनिश गुरुङ

A+ A A-

गण्डकीका मुख्यमन्त्री खगराज अधिकारीले विश्वासको मत लिनुअघि गत पुस अन्तिममा नवलपुरका रोशनबहादुर गाहा थापालाई प्रमुख सचेतक बनाएका थिए । प्रदेशमा दोहोरिएर जितेका एक जनामात्रै सांसद मन्त्री बन्ने धेरैको आकलनबीच उनलाई प्रमुख सचेतकको जिम्मेवारी दिइएको थियो । अन्ततः रोशन मंगलबार आन्तरिक मामिला तथा कानुन मन्त्री बनेका छन् ।

रोशन नवलपुर १ (२)बाट निर्वाचित भएका हुन् । संघ सरकारले प्रहरी ऐन कार्यान्वयनको बाटो नखोलिदिँदा प्रदेशको गृहमन्त्री बनेका रोशनको कार्यभार केही कम हुनेछ । प्रदेशको कानुन बनाउने मन्त्रालयको जिम्मा पाएकाले उनले कस्ता कानुन ल्याउँछन्, बनेका कानुन कार्यान्वयनमा कस्तो भूमिका खेल्छन् भन्ने विषय महत्वपूर्ण हुनेछ ।

शपथ लिनुअघिसम्म रोशन प्रदेशको अर्थमन्त्री बन्ने चर्चा थियो । तर, उनलाई मुख्यमन्त्री अधिकारीले प्रदेशको गृह र कानुनमन्त्री बनाएका हुन् ।

उपप्रधानपञ्च, गाविस अध्यक्ष हुँदै मन्त्री

२०२० साल २५ वैशाखमा पाल्पामा जन्मिएका रोशन बुबा यमबहादुर गाहा र आमा हेमा मगर्नीका सन्तान हुन् । उनको हालको ठेगाना कावासोती नगरपालिका–२ भाट्टोला, नवलपुर हो । साविकको लुम्बिनी अञ्चल, पाल्पा जिल्लाको सलकोट गाँउबाट २०२४ सालतिर बसाईं सरेर उनी परिवारसँग नवलपरासी आएका थिए ।

२०३५ सालदेखि उनी राजनीतिमा प्रवेश गरेका हुन् । त्यतिबेला उनी जीवनज्योति मा.वि. प्रगतिनगरको प्रारम्भिक कमिटी सचिव बनेका थिए । २०३६ सालमा पाकिस्तानका पूर्वराष्ट्रपति तथा पूर्वप्रधानमन्त्री जुल्फिकर अली भुट्टोलाई फाँसी दिएपछि भएको विद्रोहका क्रममा पक्राउ परेर उनले २५ दिन जेल सजाय भोगेका थिए ।

२०४४ मा अखिल नेपाल किसान संघमा आवद्ध भए । त्यतिबेला उनी शिवमन्दिर गाउँ कमिटीको सचिव र तत्कालीन नेकपा मालेको इलाका नं. ५ को सचिव बनेका थिए । २०४३ सालमा शिवमन्दिर गाउँ पञ्चायतको उपप्रधानपञ्च निर्वाचित भए ।

२०४६ सालमा पञ्चायती व्यवस्थाको अन्त्य र बहुदलीय व्यवस्था स्थापनाको जनआन्दोलनमा सहभागी भए । २०४९ सालमा पहिलोपटक र २०५४ सालमा दोस्रोपटक शिवमन्दिर गाउँ विकास समितिको अध्यक्ष निर्वाचित भएका थिए । २०६२÷०६३ सालको गणतन्त्र स्थापनाका लागि भएको जनआन्दोलनमा मोर्चा प्रमुख भएर सहभागी भए । २०६४ सालमा संविधानसभा सदस्यमा समानुपातिकबाट निर्वाचित भएका थिए । २०६९ मा नेकपा एमाले जिल्ला कमिटी नवलपरासीको उपाध्यक्षमा निर्वाचित उनले त्यही वर्ष अध्यक्षको जिम्मेवारी पाएका थिए ।

२०७४ मा नवलपुर क्षेत्र नम्बर १ ‘२’बाट गण्डकी प्रदेशसभा सदस्य निर्वाचित भएका थिए । त्यतिबेला नै उनी अर्थमन्त्री बन्ने चर्चा थियो । उनलाई अर्थमन्त्री बन्न तयार रहन सन्देश पुर्‍याइसकिएको थियो । ‘किरणजी (किरण गुरुङ) स्थायी कमिटी सदस्य हुनुहुन्थ्यो । सिनियर भएको हिसाबले त्यतिबेला उहाँ जानु भयो,’ एमालेका एक नेताले शिलापत्रसँग भने । जातीय आबद्धता पनि जनजाति समुदायको धेरै हुने भएपछि उनी त्यतिबेला छुटेका थिए । पछि मन्त्रिपरिषद्मा जिम्मेवारी हेरफेर भएको भए रोशन सरकारमा जाने थिए । तर, मन्त्री फेरबदल गर्नुअघि नै सरकार ढलेपछि पहिलो कार्यकालमा सरकारमा जाने ढोका बन्द भएको थियो ।

२०७८ साल जेठमा एमाले नेतृत्वको सरकार ढल्यो । त्यसपछि एमाले प्रतिपक्षी बनेको थियो । त्यतिबेला उनी गण्डकी प्रदेशको सार्वजनिक लेखा समितिको सभापति भएका थिए ।

गत ४ मंसिरको चुनावमा नवलपुर क्षेत्र नं. १ को २ बाट प्रदेशसभा सदस्यमा दोस्रोपटक निर्वाचित भए । उनले नेकपा माओवादी केन्द्रका लोकप्रसाद भुर्तेललाई ३ हजार ७१३ मतान्तरले हराएका थिए । रोशनले १७ हजार ८२३ मत पाउँदा माओवादीका लोकले १४ हजार ११० मत पाएका थिए ।

प्रकाशित मिति: मंगलबार, माघ १०, २०७९ २०:३१