‘फेरि चुनाव आओस् न ! हामीले पनि जानेका छौं’

A+ A A-

म्याङलुङ नगरपालिका–५ का नागरिकमा स्थानीय तहको निर्वाचनपछि सबै किसिमका विकासे पूर्वाधारहरु गाउँमै उपभोग गर्न पाइन्छ भन्ने आशा थियो ।

सडक, सिँचाइ, खानेपानीजस्ता आवश्यकीय पूर्वाधारको अभावमा वर्षौंदेखि भोग्नुपरेको समस्या टर्ला भन्ने विश्वास थियो । तर, पुस्तौंदेखि गाग्रोमा बोकेर पानी खानुपर्ने बाध्यता उस्तै छ ।

चुनावको समयमा उम्मेद्वारहरुले खानेपानी घर–घरमा पु-याईदिने आश्वासन दिएका थिए ।

तर, जनप्रतिधिले पानी ल्याइदिनु त टाढाको कुरा निर्वाचित भएपछि घरआँगनमा समेत टेकेका छैनन् । म्याग्लुङवासीले खानेपानीको समस्या वर्षौदेखि भोग्दै आएका छन् ।

साबिकका नौ वडामध्ये वडा नं. १ , २ र ६ का अधिकांश टोलमा कुवा र धाराबाट गाग्रोमा पानी भरेर खानुपर्ने बाध्यता छ ।

आफ्नो टोललाई लक्षित गरी योजना कहिले पनि नआएकाले घरबाट एक किलोमिटर टाढा दूषित अवस्थामा रहेको कुवाको पानी भरेर खाँदै आएको स्थानीय सुमन लिम्बूले बताए । उनले भने, ‘चुनावका बेला मात्र नेता भनाउँदाहरु आउँँछन् । यो गर्छौं र त्यो गर्छौं भन्छन् । हामीले खाने पानीका लागि यत्रो दुःख गर्नुपरेको छ । फेरि चुनाव आओस् न हामीले पनि जानेको छ ।’

२०५५ सालमा तत्कालीन एडिबी खानेपानी आयोजनाद्वारा सञ्चालित वस्तीकै ठूलो खानेपानी योजना पनि अहिले लथालिङग अवस्थामा छ । तत्कालीन गाविसका सबै वडालाई खानेपानी पुर्याउने लक्ष्यका साथ सुरु भएको योजना अहिले केही वडाका बासिन्दाले मात्र उपभोग गरिरहेका छन् ।

खानेपानीको अभाव झेल्दै आएका यहाँका स्थानीयलाई पिउने पानीको अभाव हुँदा घरमा आएका पाहुना र पालेका पशु चौपायालाई खुवाउनसमेत समस्या छ ।

मोरङबाट तेह्रथुम आफन्तको घरमा आएका विमल लकान्द्रीले पानीको समस्याका कारण स्थानीयले निकै सास्ती खेपेको बताए । उनले भने, ‘यत्रो समस्या छ । सबै कुरामा पानी चाहिन्छ । पानीबिना यहाँका जनता कसरी बाँच्ने ।’

साबिक वडाहरुको आम्दीम, थापागाँउ, नर्केटे, पिलिङडाँडालगायतका वस्तीका तीनसय बढी परिवारले खानेपानीको चरम समस्या झेलिरहेका छन् । घर सिरानमा पानीको मुल भएका कसैकसैले पाइप खरिद गरी व्यक्तिगतरुपमा खानेपानीको उपभोग गरेकोबाहेक अन्य सबैले धारा कुवाकै भर पर्नुपर्ने बाध्यता छ ।

डोकोमा पानी भरेर खाएको ४० वर्ष बढी भईसक्दा पनि खानेपानीको उचित व्यावस्थापन हुन नसक्दा आफ्नै घरको धारामा झरेको पानी खाईएला भन्ने आशै मरिसकेको स्थानीय मनमाया लिम्बुले बताइन् ।

उनले भनिन्, ‘यत्रो वर्ष भइसक्यो डोकोमा पानि बोकेको । अब त आश पनि मरिसक्योे धराबाट पानी आउँछ भनेर ।’

स्थानीय तह बनेपछि पुराना समस्या हट्नेछ भन्ने अपेक्षामा बसेका नागरिकको आशा मर्दै गएको छ ।

तर, निर्वाचन भएयता आफूहरुले वडामा खानेपानीको व्यावस्थापनका लागि निरन्तर प्रयास गरिरहेको वडाध्यक्ष होमबहादुर खड्काको दाबी छ । उनले भने, ‘हामीले प्रयास नै नगरेको होइन । हामी आफैं पनि पानी उपभोग गर्छौं । त्यसैले यो वर्ष पनि बजेट विनियोजन भएको छ, क्रमशः हुन्छ नै ।’

स्थानीय निर्वाचन भएको दुई वर्ष बित्यो । जनताको समस्या ज्युँकात्यूँ छ । चुनावको बेला जनप्रतिनिधिले दिएको आश्वासन बिर्सिएका स्थानीयको गुनासो छ ।

प्रकाशित मिति: मंगलबार, भदौ ३, २०७६ ०४:४९