रामसहायलाई उपराष्ट्रपति बनाएर उपचुनाव लड्ने उपेन्द्र यादवको रणनीति

A+ A A-

मधेस प्रदेशका मुख्यमन्त्री सरोजकुमार यादवले गत बुधबार विश्वासको मत लिएपछि सञ्चारकर्मीसँगको कुराकानीमा तीन दिनभित्र सरकार विस्तार हुने धारणा सर्वाजनिक गरे । मुख्यमन्त्री यादवले विश्वासको मत लिएको शनिबार तीन दिन पूरा भइसकेको छ । तर, अहिलेसम्म सरकार विस्तार हुन सकेको छैन ।

मुख्यमन्त्री यादवले आफूसँगै मन्त्रीको शपथ लिएका नेकपा एमाले संसदीय दलका नेता सरोज यादव, जसपाका सञ्जय यादव र जनमत पार्टीका बसन्त कुशहवालाई मन्त्रालयको जिम्मेवारीसमेत तोक्न सकेका छैनन् । मुख्यमन्त्री यादव विश्वासको मत लिएको भोलिपल्टै काठमाडौं पुगेका थिए । उनी अहिले पनि काठमाडाैंमै छन् ।

स्रोतका अनुसार मुख्यमन्त्री यादव सरकार विस्तार गर्नुअघि पार्टी अध्यक्ष उपेन्द्र यादवसँग सल्लाह गर्न काठमाडौं पुगेका हुन् । पार्टीमा मन्त्रीहरूका धेरै आकांक्षी र सरकार विस्तार गर्दा अन्य पार्टीसँग समन्वय गर्नुपर्ने बाध्यात्मक अवस्था रहेकोले मुख्यमन्त्री यादवले पार्टी अध्यक्ष यादवको निर्देशनबिना कुनै कार्य गर्न चाहेका छैनन् ।

जसपाका एक सांसदले भने, ‘अध्यक्षजीले तत्काल सरकार विस्तार नगर्न मुख्यमन्त्री यादवलाई निर्देशन दिनुभएकाे छ । केन्द्रमा माओवादी अध्यक्ष पुष्पकमल दाहाल नेतृत्वको सरकारलाई विश्वासको मत दिएर पनि अहिले जसपा सरकारमा सहभागी नहुनु र तत्काल प्रदेश सरकार विस्तार नगर्नु दुवै विषय एउटै कडीसँग जोडिएको छ ।’

पार्टी अध्यक्ष यादवले सत्ता गठबन्धनमा आफ्नो पार्टीले जसरी पनि उपराष्ट्रपति पद पाउनुपर्ने अडानमा राखेका छन् । ती सांसदले भने, ‘भागवण्डामा पार्टीले उपराष्ट्रपतिको पद पाएको खण्डमा पार्टीकाे संसदीय दलका नेता रामसहाय यादवलाई अगाडि सारेर अध्यक्ष यादव आफू बारा निर्वाचन क्षेत्र नम्बर २ बाट उपनिर्वाचनमार्फत प्रतिनिधिसभामा छिर्ने दाउमा छन् । यसमा प्रधानमन्त्री प्रचण्ड सहमत भए पनि एमाले अध्यक्ष ओली भने अझै सहमत देखिएका छैनन् । कहिले कांग्रेस सभापति शेरबहादुर देउवासँग भेटेर राष्ट्रपति/उपराष्ट्रपति तथा प्रदेश सरकारको विषयमा कुराकानी गर्छन् त कहिले माधवकुमार नेपालसँग पार्टी एकताको विषयमा छलफल गर्छन् ।’

जसपाका संसदीय दलका नेता यादव बारा निर्वाचन क्षेत्र नम्बर २ बाटै प्रतिनिधिसभामा निर्वाचित भएका हुन् । ती सांसदले अगाडि भने, ‘केन्द्रमा जसपाले उपराष्ट्रपति नपाएको खण्डमा मधेस प्रदेशको सत्ता समीकरण फेरिने सम्भावना प्रवल छ, केन्द्रको सरकारबाट समर्थन फिर्ता लिएर प्रदेशमा नेपाली कांग्रेससँग मिलेर सरकार बनाउने रणनीतिमा पनि अध्यक्ष यादव रहेका छन् ।’

बाराबाट चुनाव लड्ने मनसायकै कारण पूर्वमुख्यमन्त्री लालबाबु राउतलाई निरन्तरता नदिएर सरोजकुमार यादवलाई मुख्यमन्त्रीका रूपमा अगाडि ल्याइएको ती सांसदले बताए । उनले भने, ‘उपेन्द्रजीको मुख्यमन्त्रीमा पहिलो च्वाइस लालबाबु जी नै थिए । तर पछि उपचुनाव बाराबाटै लड्ने रणनीतिमा रहेका अध्यक्ष यादवलाई अप्ठ्यारो हुने डरले अन्तिममा मुख्यमन्त्रीमा यादवलाई नै समर्थन गर्न बाध्य भए ।’

मुख्यमन्त्री यादव बारा निर्वाचन क्षेत्र नम्बर १ को ख बाट दोस्रोपटक निर्वाचित भएका हुन् । यादवलाई मुख्यमन्त्री बनाएको खण्डमा बाराका जनताको सहानुभूति उपनिर्वाचनमा आफूलाई हुने विश्वास अध्यक्ष यादवको छ ।

यता, मुख्यमन्त्री यादवले बिदाहरूको कारण सरकार विस्तार हुन नसकेको बताएका छन् । काठमाडौंमा रहेका उनले फोनमा भने, ‘विभिन्न बिदाहरूको कारण सरकार विस्तार गर्न सकिएन, म काठमाडौं आइसकेको छु । सोमबारतिर मात्रै सरकार विस्तारको गृहकार्य सुरु गर्छु ।’

प्रकाशित मिति: शनिबार, माघ ७, २०७९ २०:१४