यातायात व्यवसायीकाे प्रश्न- जहाज पुरानो नहुने, गाडीचाहिँ २० वर्षमै फाल्नुपर्ने ?

यातायात व्यवसायीकाे प्रश्न- जहाज पुरानो नहुने, गाडीचाहिँ २० वर्षमै फाल्नुपर्ने ?

A+ A A-

१ चैत २०७२ मा बसेको मन्त्रिपरिषद् बैठकले २० वर्षभन्दा पुराना सबै सार्वजनिक सवारीसाधनहरू २ वर्षभित्र पत्रु तथा विस्थापन गरिसक्नुपर्ने निर्णय गर्‍यो ।

भौतिक पुर्वाधार तथा यातायात मन्त्रालयको समृद्ध नेपालका लागि सडक, रेल तथा यातायात विकासको पाँच वर्षे रणनीतिक कार्ययोजनामा २० वर्ष नाघेका सवारी हटाउने निर्णय भएको थियाे । साेहीअनुसार यातायात व्यवस्था विभागले १ चैत २०७४ देखि २० वर्ष पुरानो सार्वजनिक सवारीसाधन विस्थापन गर्‍यो भने १५ वर्ष कटेका सवारीसाधन हेरफेर दर्ता रोक्यो ।

यातायात व्यवस्था विभागले निकालेको सुचना

गत आइतबार यती एयरलायन्सको विमान दुर्घटना भएपछि यो विषय पुनः सतहमा आएको छ । सामाजिक सञ्जाल प्रयोगकर्ताहरूले जहाज पुरानो भएका कारण दुर्घटना बढेको भन्दै आलोचना गर्न थालेपछि हवाई विज्ञहरूले जहाज कहिले पनि पुरानो नहुने प्रतिकृया दिए । विमानको पार्ट्स समयमै बदलेपछि वर्षौं चलाउन सकिने उनीहरूको तर्क छ ।

पार्ट्स फेरेपछि जहाज वर्षौं चलाउन मिल्छ भने सवारीसाधन २० वर्षमै किन विस्थापित गर्ने भन्ने यातायात व्यवसायीले प्रश्न उठाएका छन् ।

प्राविधिक रूपमा जाँच गर्दा ठीक भएका गाडीलाई २० वर्षे तगारो लगाउन नहुने नेपाल यातायात व्यवसायी राष्ट्रिय महासघंका वरिष्ठ उपाध्यक्ष सरोज सिटौला बताउँछन् । ‘प्रविधिक रूपमा ठीक छैनन् भने २० होइन ५ वर्षमै पनि गाडी हटाउनुपर्छ । बरु प्राविधिक जाँच निकै कडा होस् । स्पेयर पार्ट्स समयमा नफेर्नेलाई तुरुन्त विस्थापित गरियोस्,' उनले भने, 'फलामको आयु हुँदैन, त्यसकारण २० वर्षमा सवारीसाधन विस्थापित गरिनु हुँदैन ।'

सवारीसाधनको मर्मतसम्भारमा ध्यान दिए सवारीसाधनलाई २० वर्षमै विस्थापित गर्नु जरुरी नभएको यातायात व्यवस्था विभागका पूर्वमेकानिकल इन्जिनियर मोहन भट्टराई बताउँछन् । ‘सवारीसाधन लामो समय चलाउन सकिन्छ । तर, त्यसको नियमित मर्मतसम्भार, स्पेयर पार्ट्स, गाडी चलाउने भूगोल आदिमा निर्भर हुन्छ । जस्तै जापानतिर ४० वर्षदेखिका पनि गाडी चलिरहेका छन् । त्यही गाडी भारतमा १५ वर्षमा खत्तम पनि हुन्छन्,’ उनले भने ।

गाडीको टेक्नोलोजिले गर्दा भने केही समस्या आउन सक्ने उनले बताए । ‘गाडीको टेक्नोलोजी हरेक दिन परिर्वतन भइरहन्छन् । त्यसैले बरू लामो समय भएपछि पार्ट्सहरू नपाउने समस्याका आइ पर्न सक्छ,’ उनले भने ।

२० वर्ष नाघेका सवारी हटाउने निर्णयका कारण ५ वर्षमा हजारौँ सवारीसाधन विस्थापित भएका छन् । कन्डिसनमा भएका गाडी पनि विस्थापित गर्नुपर्दा व्यवसायी र सरकार स्वयंलाई करोडौँ घाटा भइरहेको व्यवसायीहरूको तर्क छ ।

काठमाडौं उपत्यकामा मात्र करिब २ हजार ६ सय ट्याक्सीको २० वर्षे अवधि सकिइसकेका छन् । सरकारी नीतिका कारण ती ट्याक्सी नवीकरण, परमिट, जाँचपास, बीमा गरिएका छैनन् । तर, ती चलिरहेका छन् ।

प्रकाशित मिति: शुक्रबार, माघ ६, २०७९ १६:५४