उपत्यकामा चल्छन् नवीकरण नभएका २ हजारभन्दा धेरै ट्याक्सी

A+ A A-

काठमाडौं उपत्यकामा २ हजारभन्दा धेरै ट्याक्सी बिनानवीकरण चलिरहेका छन् । ट्याक्सी व्यवसायीले २० वर्ष पुरानो ट्याक्सी सट्टाभर्ना नगर्दा २००२/२००३ मोडलका करिब २ हजार ६ सय ट्याक्सी नवीकरण, परमिट, जाँचपास, बीमाबिना नै चलिरहेका हुन् ।

बागमती प्रदेश सरकारको सन् २०८५ भित्र पेट्रोलियम सार्वजनिक सवारीसाधनलाई विद्युतीयले विस्थापित गर्ने नीतिबमोजिम पाइलट प्रोजेक्टको रूपमा २० वर्ष कटेका ट्याक्सी, नीलो माइक्रो र ग्यास टेम्पोलाई विद्युतीय ट्याक्सीमा सट्टाभर्ना थालेको थियो ।

विद्युतीय ट्याक्सीमा सट्टाभर्ना गर्ने निर्णय २४ चैत २०७८ मा मन्त्रिपरिषद्ले गरेको थियो । उक्त निर्णयअनुसार उपत्यकामा सञ्चालित २० वर्ष पुराना ग्यास टेम्पो र नीलो माइक्रोले अब सट्टाभर्नाको रूपमा विद्युतीय ट्याक्सी नै लिनुपर्ने प्रावधान छ ।

सरकारले सट्टाभर्ना गर्दा राख्नुपर्ने विद्युतीय ट्याक्सीको स्पेसिफिकेसनसमेत बनाइसकेको छ ।

सरकारले बनाएको स्पेसिफिकेसनअनुसारको गाडी नपाएका कारण व्यवसायी पुरानै ट्याक्सी बिनापरमिट, नवीकरण, जाँचपासबिना चलाउन बाध्य भएको नेपाल राष्ट्रिय मिटर ट्याक्सी व्यवसायी तथा चालक सेवा समाजका सचिव दिलीप श्रेष्ठ बताउँछन् ।

‘एक त बजारमा विद्युतीय गाडी पर्याप्त छैनन्, अर्को सरकारले बनाएको स्पेसिफिकेसनअनुसारका गाडी नै छैनन् । हामीलाई त्यो मापदण्डअनुसारका गाडी ल्याइदिए हामी गाडी सट्टाभर्ना गर्न तयार छौँ,’ उनले भने ।

प्रदेश सरकारले भने धेरैजसो गाडीलाई मिल्ने स्पेसिफिकेसन बनाएको दाबी गर्दै आएको छ । त्यस्तै, विद्युतीय सवारीसाधनबिना नयाँ ट्क्सी सट्टाभर्ना नगरिने श्रम, रोजगार तथा यातायात मन्त्रालय बागमतीका प्रवक्ता हरिहर पोखरेलले जानकारी दिए ।

यस्तो छ विद्युतीय ट्याक्सीको मापदण्ड

श्रम, रोजगार तथा यातायात मन्त्रालय, बागमतीले सट्टाभर्ना हुने ट्याक्सीलाई साधारण र विशेष प्रकृतिका गरी दुई प्रकारको स्पेसिफिकेसन बनाएको छ ।

साधारण ट्याक्सी ५ सिट क्षमता, अटोमेटिक ट्रान्समिसन, कम्तीमा २ सय लिटरको बुट स्पेस भएको, ३० वा सोभन्दा धेरै किलोवाटको मोटर, २० किलोवाट वा सोभन्दा धेरै क्षमताको लिथियम आयोन ब्याट्री, सेडान बडी टाइप, कम्तीमा १७० मिलिमिटरको ग्राउण्ड क्लियरेन्स, कम्तीमा २१० किलोमिटर रेन्ज, एयर ब्याग, जीपीएस सिस्टम, एबीएस, सेन्ट्रल लकिङ र रेयर भ्यु क्यामरा अनिवार्य हुनुपर्नेछ ।

त्यसैगरी, विशेष प्रकृतिका ट्याक्सीमा ५ देखि ७ सिट क्षमता, अटोमेटिक ट्रान्समिसन, कम्तीमा २५० लिटर बुट स्पेस, कम्तीमा ५० किलोवाटको मोटर, कम्तीमा ४० किलोवाट आवरको लिथियम आयोन ब्याट्री, सेडान वा भ्यान बडी टाइप, कम्तीमा १७५ मिलिमिटरको ग्राउण्ड क्लियरेन्स, डुअल एयर ब्याग, जीपीएस सिस्टम, कम्तीमा २७५ किलोमिटर रेन्ज, हिल असिस्ट, एबीएस र ईबीडी, सेन्ट्रल लकिङ, पार्किङ सेन्सर, रेयर भ्यु क्यामरा, एसी र साउण्ड सिस्टम हुनुपर्नेछ ।

प्रकाशित मिति: बुधबार, माघ ४, २०७९ १७:१८