२२ सय अंकबाट माथि उक्लिन मानेन नेप्से, बजार करेक्सन मुडमै

A+ A A-

पछिल्ला १६ दिनमा ४ सय १८ अंकले बढेको नेप्से २२ सय अंकमाथि जान सकेको छैन । लगातार १६ दिनसम्म बढेको बजारले २२७८ विन्दु चुमेर फर्किएको बजारले फेरि सो रेकर्ड तोड्न नसकेकाे हाे ।

२६ पुसमा २२८० विन्दु छोएको नेप्सेले त्यसयताका तीन दिन बजार घटबढ भए पनि सो रेकर्ड छुन नसकेको हो । बुधबार पनि शेयरबजारले सुरुमा उकालो यात्रा गरे पनि त्यो टिकिरहन सकेन । समग्रमा अधिकतम २२ सय १४ अंक चुमेको बजार तल ओर्लिएर २१७३ अंकमा सीमित बन्न पुग्यो । सुरुमा दोहोरो अंकले बढेको बजार स्थिर बन्न नसक्दा बजार बन्द हुने बेलासम्म ९.०१ अंकले बजार ऋणात्मक बन्न पुग्यो ।

मंगलबार ३२ अंकले बढेको बजारले बुधबार पनि निरन्तरता पाउने आशा लगानीकर्ताले गरेका थिए । तर, बजारले वृद्धिको बाटो छोडेर ओरालो लाग्न थालेपछि छोटो नाफा लिएरै भए पनि लगानीकर्ताले आज बिक्री चाप बढाउन पुगे । फलस्वरुप सुरुमै २९ अंकले बढेको बजार अन्तिम समयमा राताम्मे भयो । बढ्न सुरु गरेको बजारले २२ सय अंक पार नगर्दै घट्न थाल्नुमा सर्टटर्म इन्भेस्टर हावी हुनु प्रमुख कारण मान्छन् लगानीकर्ताहरू ।

लगानीकर्ता श्याम पुडासैनी छोटो समयमा नाफा लिएर बजारबाट निस्कने लगानीकर्ता हावी भएको बताउँछन् । भन्छन्, 'थोरै भए पनि नाफा लिइराखौँ भन्ने लगानीकर्ताकै कारण बढ्दो बजारमा पनि बिक्रीचापमा दबाब देखिएको हो ।’ लगानीकर्ता पुडासैनी बजारमा यस्तो प्रवृत्ति सामान्य भएको भन्दै बजार पून: माथि उक्लनो विश्वास गर्छन् ।

उनले भनेजस्तै नेप्से १६ दिनमा ४ सय १८ अंकले बढेपछि लगानीकर्ताले बिक्रीचाप बढाएकै कारण बुधबारको बजार पनि प्रभावित बन्न पुुग्यो । सुरुमा किन्ने लगानीकर्ताको भिड देखिए पनि नेप्से सूचकले २२ सय १४ अंक छोएपछि लगानीकर्ताले शेयर बिक्रीमा राख्न पुगे ।

यसरी आज लगानीकर्ताले २ सय ४८ कम्पनीको १ करोड ३३ लाख कित्ता शेयर ४ अर्ब ९२ करोड रुपैयाँमा खरिदबिक्री गरेका छन् । मंगलबार लगानीकर्ताले यस्तो कारोबार ३ अर्ब ७२ करोड रुपैयाँको गरेका थिए । नेप्से सूचक बढे पनि मंगलबारको तुलनामा आज बुधबार कारोबार रकम भने बढेको छ । यसले लगानीकर्ता बजारमा थप सक्रिय हुँदै गएको बताउँछ ।

बुधबार किन्न हौसिने लगानीकर्ता र बिक्री गरेर नाफा लिने लगानीकर्ताका बीचमा ८० वटा कम्पनीका लगानीकर्ताले शेयरमूल्य बढाउन सफल बनेका छन् भने १ सय २१ कम्पनीका लगानीकर्ताले भएको सम्पत्ति पनि गुमाउन पुगेका छन् ।

यसमा पिपुल्स हाइड्रोपावरका लगानीकर्ताले आजको कारोबारमा सर्वाधिक कमाउन सफल बनेका छन् । यो कम्पनीको शेयरमूल्यमा १० प्रतिशतले वृद्धि भएर सकारात्मक सर्किट लाग्न पुुग्यो भने बाराही हाइड्रो, हिमालयन ऊर्जा, ग्रिन भेन्चर्स र नेसनल हाइड्रो कम्पनीको ९ प्रतिशत शेयरमूल्य बढेको छ । समग्रमा आजको कारोबारमा जलविद्युत् कम्पनीहरूको कमाइ सबैभन्दा धेरै रहन पुुग्यो । यो समूहको कारोबार पनि अन्यभन्दा धेरै भएको छ । जसमा रिडी कम्पनीको ३५ करोड ७८ लाख रुपैयाँको कारोबार हुँदा अपि पावरको १९ करोडको शेयर कारोबार भएको छ ।

त्यसो त आजको कारोबारमा बढ्नेतर्फ जलविद्युत् कम्पनीहरू अगाडि देखिँदा साल्ट ट्रेडिङ, मिथिला लघुवित्त र सिँगटी हाइड्रो मूल्य घट्नेमा अगाडि देखिएका छन् । यी कम्पनीहरूको क्रमश: ७.८९, ६.९२ र ६.०५ प्रतिशतले शेयरमूल्य घटेको हो ।

प्रकाशित मिति: बुधबार, माघ ४, २०७९ १५:५६