बेलायतबाट फर्केका श्रीमानलाई स्वागत गर्न काठमाडौं पुगेकी थिइन्, फर्कंदा दुवै सेतीको खोँचमा विलीन

बेलायतबाट फर्केका श्रीमानलाई स्वागत गर्न काठमाडौं पुगेकी थिइन्, फर्कंदा दुवै सेतीको खोँचमा विलीन

A+ A A-

पश्चिमाञ्चल क्षेत्रीय अस्पताल, पोखरामा सधैँ बिरामी, कुरुवाको भिडभाड रहिरहन्छ । यही अस्पतालमा सोमबार बिहानैदेखि शव कुर्नेहरूको ठूलो भिड थियो ।

पोखरामा आइतबार भएको विमान दुर्घटनामा ज्यान गुमाएकाको शव यही अस्पतालको पोस्टमार्टम भवनमा राखिएको छ । शव पाउने आसमा त्यही भवनअघि परिवार, आफन्त र साथीभाइ दिनभर पर्खाइमा थिए ।

क्षेत्रीय अस्पतालको पोस्टमार्टम भवन आडैमा प्रयोगशाला भवन छ । त्यही भवनको भुइँमा कास्कीको माछापुच्छ्रे गाउँपालिका–२, काभ्रे टोलका बेलमान गुरूङ र सीता गुरूङका बुवाआमा, छोराछोरी, दाजुभाइ र आफन्त बसिरहेका थिए । बेलमान र सीता श्रीमान्–श्रीमती हुन् । बेलायतबाट फर्केका बेलमान र उनलाई लिन काठमाडौं गएकी सीताले आइतबार पोखरामा भएको यती एअरलाइन्सको विमान दुर्घटनामा परेर ज्यान गुमाएका छन् ।

सिजनल भिसामा बेलमान ६ महिनाअघि बेलायत गएका थिए । २९ पुसमा सीता श्रीमान्‌लाई लिन काठमाडौं गएकी थिइन् । ३० पुसमा मसान्त भएकाले फर्कन शुभ नहुने भन्दै थप एक दिन काठमाडौं नै बसेका थिए । ‘दाइलाई लिन भाउजु जानुभएको थियो । फर्कंदा यस्तो भयो,’ मृतक बेलमानका कान्छा भाइ रोशनले सुनाए ।

पोस्टमार्टम विभागको ‘बडी नम्बर ५७’ सीताको हो । सीताका माइतीतर्फका बुबा धनप्रसाद गुरुङले सोमबार दिउँसो ४३ वर्षीय उनको शव पहिचान गरेका हुन् । बेलमानको शव अझै पहिचान भइसकेको छैन । साढे दुई दशकअघि विवाह बन्धनमा बाँधिएको यो जोडीले सेती खोँचमा अन्तिम सास फेरेको छ ।

belman and sita for in photo1673882773.jpg

दुर्घटनामा परेका ७२ जनामध्ये ६९ जनाको शव भेटिएको छ । भेट्न बाँकी रहेकामध्ये ४७ वर्षीय बेलमानको शव छ वा भएकामध्ये एउटा हो यकीन छैन । उनको शव भेटिइसकेको भए पनि पोखरामै पोस्टमार्टम गरिने मृतकको सूचीमा छैन । सीताको शव पोस्टमार्टम सकेर मंगलबार दिउँसो परिवारलाई जिम्मा लगाउने अस्पतालको तयारी छ । बेलमानको शव काठमाडौँ लगेर डीएनए परीक्षणमार्फत पहिचान हुनेछ । जो हाँस्दै काठमाडौंको विमानस्थलमा भेटे, सँगै त्यही विमानस्थलबाट घरतिर उडे उनीहरू दुवै कहिल्यै कसैसँग नभेटिने गरी विलीन भएका छन् ।

मृतक बेलमानका माहिला भाइ लोकबहादुरले विमान दुर्घटनाको खबर आइतबार साढे ११ बजेतिर घरमा पुर्‍याएका थिए । विमान ११ बज्दै गर्दा पोखरा–७ र पोखरा–१५ को सीमाना सेती खोँचमा दुर्घटना भएको थियो । त्यसपछि बेलमानको घर र सीताका माइती दुर्घटनास्थल पुगेका थिए । शव झिकेर अस्पताल लैजान सुरू भएपछि उनीहरू पनि उतै लागे । आइतबार अबेरसम्म पोस्टमार्टम भवन बाहिर बसे पनि शव नपाउने भएपछि फर्किए ।

मृतकका आफन्तलाई शव लिन सोमबार बिहान ९ बजे बोलाइएको थियो । तर, दिनभर पोस्टमार्टमको काम हुन नसकेपछि शव पाउने आशमा बसेकाहरू निराश थिए । ‘बाआमा बिहानै ९ बजे आउनुभएको छ । काम गर्नेहरू २ बजे आउनुभएको छ । दुर्घटना हिजो भएपछि काम पनि हिजैबाट गर्नु पर्दैन ?’ रोशनले पीडाभावमा भने, ‘हामीलाई किन बिहानै बोलाउने ?’

निकटस्थले बताएअनुसार बेलमान र सीताले बिहान ११:१० बजेको टिकट लिएका थिए । तर, त्योभन्दा अघि आउने जहाजमा सिट भएपछि दुवै त्यसैमा आएका थिए । मृतकका एक विवाहितसहित दुई छोरी र एक छोरा छन् ।

प्रकाशित मिति: सोमबार, माघ २, २०७९ २१:०९