मधेसका मुख्यमन्त्री यादवले भोलि विश्वासको मत लिने, विश्वासको मत दिन कांग्रेसको सर्त

मधेसका मुख्यमन्त्री यादवले भोलि विश्वासको मत लिने, विश्वासको मत दिन कांग्रेसको सर्त

A+ A A-

मधेस प्रदेशका मुख्यमन्त्री सरोजकुमार यादवले सोमबार विश्वासको मत लिने भएका छन् । प्रदेश सभामुखको निर्वाचनपछि विश्वासको मत लिने मुख्यमन्त्री यादवले जानकारी दिए ।

लोसपासहित ७२ जना सांसदको समर्थनमा प्रदेश प्रमुख हरिशंकर मिश्रले जसपाका संसदीय दलका नेता यादवलाई २७ पुसमा मुख्यमन्त्री नियुक्त गरेका थिए । मुख्यमन्त्री यादवसँगै नेकपा एमालेका संसदीय दलका नेता सरोज यादव, जसपाका संजय कुमार यादव र जनमत पार्टीबाट बसन्त कुशवाहाले मन्त्रीको शपथ लिएका छन् । उनीहरूको मन्त्रालय तोकिएको छैन ।

प्रदेशसभा सभामुखका लागि सत्ता गठबन्धनबाट नेकपा एमालेका सांसद रामचन्द्र मण्डल र नेपाली कांग्रेसबाट जंगिलाल राय यादवले उम्मेदवारी दिएका छन् । सोमबार अर्थात् २ माघमा सभामुख चयनका लागि मतदान हुँदैछ । १०७ सदस्यीय प्रदेशसभामा सरकारलाई ७२ सांसदको समर्थन छ । प्रदेशसभामा कांग्रेसका २२ र नेकपा एसका ७ सांसद छन् ।

केन्द्रजस्तै प्रदेशमा पनि कांग्रेसले समर्थन गर्ने आशामा मधेस सरकार छ । प्रदेशस्थित कांग्रेस संसदीय दलले यसबारे निर्णय गरेको छैन । कांग्रेसका एक सांसदले सभामुखमा सघाए सरकारलाई समर्थन गर्ने बताए । ‘सभामुखको चुनावअघि कांग्रेस र जसपाका नेताहरूको बैठक बोलाइएको छ । सहमति भए मात्रै कांग्रेसले मुख्यमन्त्रीलाई विश्वासको मत दिनेछ,’ कांग्रेसका एक सांसदले भने ।

मन्त्रालय टुंगिन बाँकी

मुख्यमन्त्री यादवले २९ पुसमा पदभार ग्रहण गरेका हुन् । तर, सत्ता गठबन्धनबीच मन्त्रालय बाँडफाँटमा सहमति भइसकेको छैन । जसका कारण पार्टीहरूले मन्त्रीहरूको बारेमा निर्णय गर्न सकेका छैनन् ।

जसपाका एक सांसदका अनुसार जसपालाई मुख्यमन्त्रीसहित तीन मन्त्रालय, एमालेले प्रदेश सभामुख र तीन मन्त्रालय, जनमतले उपसभामुख र दुई मन्त्रालय पाउनेछन् । त्यसैगरी, माओवादी केन्द्र र लोसपाले १/१ मन्त्रालय पाउने गरी सहमति जुटाउने तयारी छ । प्रदेशमा मुख्यमन्त्रीसहित १० मन्त्रालय छन् ।

प्रकाशित मिति: आइतबार, माघ १, २०७९ १६:३१