विवाद, फिक्सिङ र भद्रगोलमै सकियाे नेपाल टी–२० लिग

A+ A A-

पहिलोपटक नेपाल क्रिकेट संघ (क्यान)ले आयोजना गरेको फ्रेन्चाइज लिग नेपाली क्रिकेट विकासको एउटा आयाम हुनुपर्ने थियो तर भयाे ठीक उल्टाे । विवाद, फिक्सिङ, र भद्रगोलमै सकियो नेपाल टी–२० लिग ।

भारतीय कम्पनी सेभेन थ्री स्पोर्ट्स र क्यानले सम्झौता गर्दादेखि नै विवाद र आलोचना सुरू भएको लिगको पहिलो संस्करणमै काण्डैकाण्ड भए । जसले नेपाली क्रिकेटमा विकासभन्दा पनि विनाश ल्याउने जाेखिम बढेकाे छ । सट्टेबाज, स्पट फिक्सिङ र म्याच फिक्सिङको काण्डले यो लिगलाई बेइज्जत नै गरायो । जसले गर्दा यतिबेला अन्तर्राष्ट्रिय जगत्‌मै नेपाली क्रिकेट लज्जित हुन पुगेको छ ।

कानुनविपरीत विदेशी खेलाडीलाई खेलाइयाे

नेपाल टी–२० लिगमा जति विदेशी खेलाडीले खेले सबैले कानुनविपरीत खेले । नेपालको कानुनअनुसार विदेशी खेलाडीले खेल्दा श्रम स्वीकृत अनिवार्य लिनुपर्छ । श्रम स्वीकृत भएपछि मात्रै विदेशी खेलाडीले खेल्न पाउँछन् । तर, आयोजक सेभेन थ्री स्पोर्ट्स र नेपाल क्रिकेट संघ (क्यान) ले कुनै पनि खेलाडीको श्रम स्वीकृत गराएनन् । प्रतियोगिता सकियो तर अझै श्रम स्वीकृत भएको छैन ।

अब के आधारमा विदेशी खेलाडीलाई उसले पाउनुपर्ने पारिश्रमिक क्लबले दिन्छ ? जिम्बाब्बेका खेलाडी सिकन्दर राजा विराटनगर सुपर किंग्सबाट दुई खेल मात्रै खेलेर बीचैमा छोडेर गए । लिग बीचैमा छोडेर जाँदा उनले भनेका थिए, ‘यहाँ सबै कुरा ठीक छैन । पारिश्रमिक पनि पाएको छैन ।’

यता, क्यानका अध्यक्ष चतुरबहादुर चन्द श्रम स्वीकृत लिनुनपर्ने व्यवस्था हुनुपर्ने तर्क गर्छन् । उनी भन्छन्, ‘चार दिनका लागि लिग खेल्न आउँछ । तर, एक महिना अघिदेखि श्रम स्वीकृतको प्रक्रिया गर्नुपर्ने कानुन छ । एक महिनाभन्दा कम व्यावसायिक लिग खेल्न कोही विदेशी खेलाडी आउँछ भने सरकारले श्रम स्वीकृत नचाहिने व्यवस्था गर्नुपर्छ ।’

सम्बन्धित समाचार

क्यानले सेभेन थ्री स्पोर्ट्सलाई लिग बेच्नु नै गलत

यता, अख्तियार दुरुपयोग अनुसन्धान आयोगले राष्ट्रिय खेलकुद परिषद् र श्रम मन्त्रालयलाई पत्र काट्दै किन विदेशी खेलाडीलाई श्रम स्वीकृत नगराई खेलाएको ? भनेर सोधेको छ । पुस १८ गते अख्तियारले सात दिनभित्र जवाफ दिनू भनी पत्र काटेको थियो ।

भद्रगोल लिग

क्यान आफैँले आफ्नो प्रतियोगिता अपनत्व गर्न सकेन । आठ वर्षका लागि ३३ करोडमा क्यानले भारतीय कम्पनी सेभेन थ्री स्पोर्ट्सलाई बेचेपछि लिग भद्रगोल बन्यो ।

लिग चलिरहेकै बेला सेभेन थ्री स्पोर्ट्स र क्लबका मालिकहरू सम्पर्कविहीन बने । यसको पनि खास कारण छ । खेलाडीहरूले पाउनुपर्ने पारिश्रमिक नपाएपछि त्यस्तो परिस्थिति बनेको थियो । हुन त अझै क्यानले पनि प्रतियोगिताअघि नै पाउनुपर्ने रकम सेभेन थ्री स्पोर्ट्सबाट सबै पाइसकेको छैन ।

त्यसो त, लिगको मुख्य प्रायोजक नै वान एक्स ब्याट थियो । जुनचाहिँ वान एक्स बिट र वान एक्स ब्याटमा फरक केही पनि छैन । प्रतियोगिताको आय श्रोत नै प्रस्ट देखिएन । सबै टिमको मालिक पनि खुल्ने गरी बाहिर आएनन् । जसले गर्दा एउटै मालिकका २–३ वटा टिम छ भन्ने आरोपहरू पनि लागिरह्यो ।

दर्शक नै क्रिकेटका सम्पत्ति हुन् । तर, क्यान मात्रै होइन, नेपाली दर्शकले पनि नेपाल टी–२० लिग अपनत्व गर्न सकेनन् । सुरूमा ३ सय टिकट दर तोकियो । तर, दर्शक आउँदै नआएपछि नि:शुल्क गरियो । तर पनि दर्शकले नेपाल टी–२० लिग रुचाएनन् ।

टिमको मनपरि, निरीह क्यान

नेपाल टी–२० लिगको फ्रेन्चाइज टिम जनकपुर रोयल्सले प्रतियोगितामा पटक–पटक ढिलो गर्‍याे । मंगलबार जनकपुरले विराटनगर सुपर किंग्ससँग दोस्रो क्वालिफायरमा प्रतिस्पर्धा गर्दै थियो ।

निर्धारित समयअनुसार ११ः३० मा टस हुनुपर्ने थियो । मैदानमा ११ बजे नै टिम पुगिसक्नुपर्ने थियो । तर, टिम करिब आधा घण्टा ढिलो गरी पुग्यो । खेल पनि ढिलो गरी नै सुरु भयो ।

जनकपुर यसअघि पनि दुईपटक ढिलो गरी मैदानमा पुगेको थियो । लुम्बिनी अल स्टार्सविरुद्धको पहिलो क्वालिफायरमा जनकपुर निर्धारित समयमै मैदानमा आएको थिएन । त्यसअघि पोखरा एभेन्जर्सविरुद्धको खेलमा पनि मैदानमा समयमै आएको थिएन ।

पटकपटक मैदानमा ढिलो गर्दै आए पनि जनकपुरलाई छुट छ । आईसीसीको नियमअनुसार कुनै पनि खेलाडी अथवा टिमले ढिलो गरे कारबाहीको भागिदार बन्छन् । तर, क्यानले स्पष्टीकरणसमेत सोधेको छैन ।

जनकपुर टिम ढिलो गरी मैदानमा आउनुको कारण खेलाडीले पारिश्रमिक नपाएको कारण खुल्न आएको छ । खेलाडीले पाइसक्नुपर्ने पारिश्रमिक अहिलेसम्म पाएका छैनन् । जुन लिगकै सबैभन्दा ठूलो विषय बन्यो ।

टोले कपजस्तो, जहाँ पानी दिनेसम्म थिएनन् खेलाडी

गाउँघरमा क्रिकेट खेल्दा एउटा टिममा सबै खेलाडी गरेर ११ जना खेलाडी मात्रै हुन्छन् । साथीभाइ बटुलेर खेलिने त्यो क्रिकेटजस्तै घटना टीयू क्रिकेट मैदानमा नेपाल टी–२० लिगमा देखियो ।

यो घटना पुस २५ गते सोमबार नेपाल टी–२० लिगको इलिमिनेटर खेलमा काठमाडौं नाइट्सको हो । विराटनगरविरुद्ध खेल्ने दिन काठमाडौंसँग मात्र ११ जना खेलाडी थिए । ती सबैले प्लेइङ सेटमा खेल्ने एक दिनअघि नै निश्चित थियो । किनभने विदेशी सबै खेलाडी आफ्नो देश गइसकेका थिए ।

दोस्रो क्वालिफायर प्रवेशका लागि विराटनगरले टस जितेर ब्याटिङ रोज्यो । योसँगै काठमाडौं फिल्डिङमा उत्रियो । बेन्च पूरै खाली थिए । एक जना खेलाडी पनि थिएनन् । खेलिरहेका खेलाडीलाई पानी दिनेसम्म टिममा खेलाडी नभएपछि अचम्मकै घटना भयो जुन, यति ठूलो फ्रेन्चाइज लिगमा ।