सरकारबारे विश्वास र संशय प्रकट भएकाे संसद्को पहिलो बैठक, कांग्रेसले के गर्ला ?

सरकारबारे विश्वास र संशय प्रकट भएकाे संसद्को पहिलो बैठक, कांग्रेसले के गर्ला ?

A+ A A-

११ पुसमा प्रधानमन्त्रीको शपथ लिएका माओवादी केन्द्रका अध्यक्ष पुष्पकमल दाहाल प्रचण्डले तत्काल आठ सदस्यीय मन्त्रिमण्डल बनाए । तीन उपप्रधानमन्त्रीबाहेक अरु चार मन्त्रीले विनाविभागीय मन्त्रीका रूपमा शपथ लिए । मंगलबार सरकारले विश्वासको मतपछि मन्त्रिपरिषद्ले पूर्णता पाउनेछ ।

विश्वासको मत लिन प्रधानमन्त्री प्रचण्ड सत्ता गठबन्धनसहित प्रमुख प्रतिपक्षी दल कांग्रेससँग पनि संवादमा छन् । सोमबार साँझ धुम्बाराहीस्थित निवासमा पुगेर प्रधानमन्त्री प्रचण्डले कांग्रेस सभापति शेरबहादुर देउवासँग विश्वासको मत मागेका छन् । देउवाले विश्वासको मत दिने/नदिनेबारे मंगलबार बिहान बस्ने सं‌सदीय दलको बैठकले निर्णय गर्ने जवाफ दिएका छन् ।

सोमबार नयाँ प्रतिनिधिसभाको पहिलो बैठकलाई सम्बोधन गर्दै कांग्रेस सभापति देउवाले आफ्नो पार्टी संसद्‌मा एकताबद्ध, जिम्मेवार र रचनात्मक भई प्रस्तुत हुने बताएका छन् । ‘जनताका जीवनसँग जोडिएका विषयमा हाम्रो विशेष ध्यान जानेछ,’ देउवाले सम्बोधनको क्रममा भने । कांग्रेस प्रतिपक्षमा बस्ने कुरा सभापति देउवाले प्रस्ट भाषामा भने व्यक्त गरेनन् ।

प्रधानमन्त्री प्रचण्डलाई विश्वासको मत दिने नदिने भन्नेबारे देउवा अझै निर्णयमा पुगेका छैनन् । ‘सोमबार बिहान आधा घण्टा सभापतिसँग संवाद गरेँ । उहाँले विश्वासको मत दिने वा नदिने भन्ने साथीहरूसँग छलफल गर्दैछु भन्नुभयो,’ कांग्रेसका एक नेताले शिलापत्रसँग भने, ‘उहाँको मौनतापछि केही पाक्छ । निर्णय के हुन्छ प्रस्ट भन्ने स्वभाव भएकाले उहाँले मौनता देखाउनुको केही अर्थ छ यति बुझ्नुस् ।’

संसद बैठकपछि बानेश्वरमा नै कांग्रेसका पदाधिकारी तथा नेताहरू अनौपचारिक छलफलमा जुटे । ‘विश्वासको मत दिन हुँदैन भन्ने मेरो धारणा हो,’ कांग्रेस सांसद सञ्जय गौतमले शिलापत्रसँग भने,‘ बाँकी भोलि संसदीय दलको बैठकले निर्णय गर्छ ।’

कांग्रेसको अनिर्णय पछाडिको कारण भने तत्कालीन बालुवाटारको किचेन क्याबिनेट रहेको बुझाइ नेताहरूमा देखियो । ‘रामचन्द्र पौडेल अझै पनि राष्ट्रपतिको आशामा हुनुहुन्छ,’ कांग्रेसका अर्का सांसदले भने । त्यसैले उपसभापति पूर्णबहादुर खड्का, पार्टी प्रवक्ता प्रकाशशरण महत, नेता ज्ञानेन्द्रबहादुर कार्की, विमलेन्द्र निधिलगायत नेताहरू विश्वासको मत दिनुपर्ने पक्षमा छन् । निधि भारत पुगेर आएपछि कांग्रेस राष्ट्रपतिको आशा बोकेर आएको कांग्रेस नेताहरू बताउँछन् ।

‘ओलीजीको भर छैन । तपाईंले पनि विश्वासको मत दिनुहोस् । समीकरण जे पनि बन्न सक्छ भन्दै प्रधानमन्त्रीले फोन गरेको सूचना मैले पनि पाएको छु,’ कांग्रेसका एक सांसदको दाबी छ । देउवाले ‘वी वील कम व्यापक’ भनेर सांसदहरूसँग भनिसकेका छन् । निवास पुग्ने नेताहरूसँग संवादमा उनले त्यसै भनिरहेका छन् । सोमबार पनि संसद भवनमै सांसदहरूसँग देउवाले राय बुझे । उनले कुरा सुन्नेबाहेक अरु प्रतिक्रिया नदिएको एक सांसदले बताए ।

कांग्रेसले विश्वासको मत दिन्छ भन्ने प्रश्नमा सहमहामन्त्रीद्वय बद्री पाण्डे र जीवन परियार मंगलबारको संसदीय दलको बैठकले निर्णय गर्ने बताउँछन् । ‘राजनीतिको प्रकृति अनुसार हामी प्रतिपक्षमा बस्नुपर्छ । संसदीय दलको बैठकअघि कांग्रेस निर्णयमा पुग्नुपर्छ । सभापतिज्यूले बोलाउनुभयो भने सोमबारै पदाधिकारी र पूर्वपदाधिकारी बैठक बस्छौँ, नत्र भोलि ९ बजेअघि बैठक बसेर टुंगोमा पुग्छौं,’ सहमहामन्त्री पाण्डेले भने । कांग्रेसले विश्वासको मत दिने वा नदिने सम्भावना ५०-५० प्रतिशत रहेको उनी बताउँछन् ।

महामन्त्री गगन थापा भने कांग्रेस प्रतिपक्षमा बस्नुपर्ने बताउँछन् । ‘पहिलो दल भएकाले सरकार बनाउने इच्छा राख्नु र प्रयास गर्नु अस्वाभाविक थिएन । अहिले सात दलले बहुमत दिएर प्रचण्डलाई प्रधामन्त्री बनाएको हो,’ उनले भने, ‘उहाँहरू एक ठाउँ बसेर यही गठबन्धनलाई निरन्तरता दिने निर्णय गर्नुभएको छ । नजाने गाउँको बाटै नसोध्नु भनेजस्तो हामीले सत्ता ढाल्ने वा विश्वासको मत दिने खेलमा लाग्नु हुँदैन ।’

कांग्रेस प्रवक्ता प्रकाशशरण महतले पनि विश्वासको मतबारे पार्टीमा औपचारिक छलफल नभएको बताए । ‘यो सरकारलाई समर्थन गर्ने त्यस्तो कुनै निर्णय र सोच बनेको छैन,’ महतले भने । नयाँ संसद्‌को पहिलो बैठकमा एमाले अध्यक्ष केपी शर्मा ओलीले अघिल्लो कार्यकालमा दुई दुईपल्ट गरेको संसद् विघटनको बचाऊ गरेर सरकारको नेतृत्व गरेको माओवादीलाई अप्ठ्यारोमा पारिदिए । ओलीले आफूले अघिल्लोपल्ट गरेको संसद् विघटनलाई ‘प्रतिगमन’ भन्नेहरूको आलोचना गरे ।

माओवादी केन्द्रले नै त्यतिबेला चर्को स्वरमा प्रतिगमन भन्दै आएको थियो । ‘प्रतिनिधिसभा विघटन भनेको प्रतिगमन हो भन्ने बुझियो । बेलायतमा त कतिपटक प्रतिगमन भएछ भएछ । संसदीय प्रणालीको जन्मदाता देशमा प्रतिगमन अस्तिसम्म पनि भइरहेको थियो । यतिधेरै जान्ने पनि अलि नहोऔँ । मौकाअनुसारका व्याख्या पनि नगरौँजस्तो लाग्छ । संसद् भंग हुनु प्रतिगमन होइन, जनताका अधिकार खोसिनु प्रतिगमन हो । जनताको अभिमतका लागि जानु प्रतिगमन होइन,’ ओलीले भने ।

ओलीले संसद् बाहिरबाट सरकार बन्नु र ढल्नु प्रतिगमन हुने दाबी गर्दै अघिल्लो कार्यकालमा भएको संसद् विघटन सही भएको दाबी गरे। ‘संसद्‌बाट सरकार बन्नु र सरकार ढल्नु प्रतिगमन होइन,’ उनले भने, ‘अन्यत्र लगेर षड्यन्त्र गरेर सरकार ढालियो भने प्रतिगमन हुन्छ । तर, अहिलेको गठबन्धन प्रतिगमनको पक्षमा जाँदैन ।’

कांग्रेसका महामन्त्री थापाले संसद् विघटनको विषय प्रधानमन्त्री प्रचण्ड र एमाले अध्यक्ष ओलीबीचको विग्रहको कारण बन्न सक्ने बताए । ‘ओलीले हालको प्रधानमन्त्रीलाई अप्ठ्यारोमा पार्नुभयो । संसद् विघटन सोह्रै आना सही हो भनिरहँदा प्रचण्ड टेबुल ठोकौँ कि नठोकौँ भनेर अलमलमा पर्नुभयो,’ उनले भने । अघिल्लोपटकको विवादको कारणबारे छलफल नै नगरी अघि बढेकाले सोही विषय विग्रहको कारण बन्ने थापाले बताए ।

एमाले सांसद सुनिता बराल अध्यक्ष ओलीले संसद विघटनमा बानी पार्नुपर्ने अवस्थामा सो कुरा भनेको बताउँछिन् । ‘संसदभित्रको अभ्यासकै रूपमा संसद विघटन बानी पारेर जानुपर्छ । संसदको सुरुवात भएको बेलायतमा संसद विघटन पटक-पटक भएको हामीलाई थाहा छ, साझा कार्यक्रम हुँदा सँगै हुन सक्छौँ भन्ने सन्देश दिन अध्यक्ष कमरेडले बोल्नुभएको हो,’ सांसद बरालले भनिन् । एमालेले सांसदहरूलाई विश्वासको मत हाल्न ह्वीप जारी गरिसकेको उनले बताइन् ।

प्रधानमन्त्री प्रचण्डले आफू सिंगो संसद्को मत पाउनेमा विश्वस्त रहेको बताएका छन् । ‘सिंगो संसद्को मत पाउनेमा म विश्वस्त छु, ढुक्क छु,' प्रधानमन्त्री प्रचण्डले भने ।

प्रकाशित मिति: सोमबार, पुस २५, २०७९ २०:३८