रवि लामिछाने पक्राउपछि देखिएका ‘खतरा’

A+ A A-

समाचार लेखेको विषयलाई लिएर अघिल्लो वर्ष भदौमा प्रहरीले म र अनलाइन खबरमा काम गर्ने मित्र रोयल अचार्यलाई गिरफ्तार गर्‍याे । उदयपुरको बेलका नगरपालिकाकी उपप्रमुख र वडाअध्यक्षको सम्बन्धलाई लिएर मैले लेखेको समाचारमा आपत्ति जनाउँदै उपप्रमुखले मानहानीको जाहेरी दिएपछि प्रहरीले हामीलाई अनुसन्धानका लागि लगेको थियो । रोयलले चाहिँ उक्त समाचार सामाजिक सञ्जालमा सेयर गरेका थिए । उनी पनि बेलकाकै स्थायीबासी हुन् ।

म न्युज कारोबारडटकमको समाचार सम्पादक थिएँ । १८ भदौ २०७५, अपरान्ह ३ बजेतिर मध्यबानेश्वरस्थित कार्यालयमा काम गरिरहेको अवस्थामा गिरफ्तार गरी हामीलाई प्रहरीले टेकु पुर्‍यायाे । पक्राउ पुर्जी देखाएपछि हामी सहजै टेकु गयौं ।

त्यहाँ हामीसँग कुनै दुर्व्यवहार गरिएन । प्रेस काउन्सिल, पत्रकार महासंघ, विभिन्न अधिवक्ताहरु हाम्रो पक्षमा उभिए । समाचार लेखेको विषय भएकाले यसलाई सम्बन्धित संस्थाको क्षेत्रबाट टुंग्याउने कुरा भयो । हामी ख्यातिप्राप्त पत्रकार थिएनौं । यद्यपि, बेलका नगरपालिकामा हामीलाई माया गर्ने थुप्रै छन् ।

तर, यो मुद्दामा सबै लागेर मलाई फसाउन खोजेजस्तो मैले महशुस गरेको थिएँ । त्यसैले अब त्यो ठाउँको लागि गर्नु बेकार रहेछ भन्ने सोच्न बाध्य भएँ । तर, हाम्रो पक्षमा त्यो दिन अपराध महाशाखा अगाडि जम्मा भएको भीड र बेलका नगरपालिकाबासीले सामाजिक सञ्जालमार्फत हाम्रो पक्षमा चलाएको अभियान देखेर नै सायद मचाहिँ आज पत्रकारितामा अडिएको हुँ । नभए, टेकु पुग्नासाथ मैले सोचिसकेको थिएँ, अब पत्रकारिता छाेड्छु ।

मैले समाचार लेखेकै थिएँ । र, त्यो बिना प्रमाण थिएन । म बिनाप्रमाणको समाचार लेखेर आफैं कसरी लज्जित हुन सक्थें र ? मैले लेखेको समाचार पुष्टि गर्ने प्रमाण मसँग थियो । त्यसैले म र रोयलले मुद्दा ‘फेस’ गर्ने बतायौं । यद्यपि, प्रहरीले उपप्रमुखलाई सम्झाएपछि उनले ‘मुद्दा मामिला गर्नुभन्दा संवादबाटै यो विषय टुंग्याएको भए राम्रो हुने रहेछ’ भन्ने महशुस गरेको सुनाइन् ।

अन्ततः यो केसलाई यहीँ डिसमिस गर्ने सहमति भयो । त्यही दिन हामीलाई प्रहरीले स–सम्मान घरसम्म लगेर छाडिदियो ।

मलाई विभिन्न ठाउँबाट फोन आउन थाल्यो, अचम्म अचम्मका कुरा सुनाउन थाले । गाउँतिर एक खालको हल्ला, अफिसमा अर्कै हल्ला भइसकेछ ।

‘नवराज कांग्रेसको मान्छे हो, उपप्रमुख पूर्वएमाले हुन् । यो राजनीतिक स्वार्थसँग गाँसिएको विषय हो । त्यसैले अफिसबाट बढी बचाउ नगर्नु’ भन्ने खालका सुझाव अफिसमा दिइएछ ।

कसैले पूर्वमाओवादी बनाए । स्थानीय चुनावमा माओवादी मेयरमा हारेको रिस अहिले पूर्वएमालेका जनप्रतिनिधिलाई साँधेकोसम्म भने ।

गाउँमा कांग्रेसले यही मुद्दामा आन्दोलन गरिरहेको थियो जुन मसँग सम्बन्धित थिएन । उसको प्रमुख माग नै उपप्रमुखलाई पदच्यूद गर्नुपर्छ भन्ने थियो ।

म रिहा भएलगत्तै बेलका नगरपालिकाका युवा साथीहरु एकपछि अर्काे गर्दै मलाई फोन गरिरहेका थिए । उनीहरुको तयारी थियो, हामी पक्राउ भएको विरोधमा नगरपालिकामा राँके जुलुस निकाल्ने ।

उनीहरुको यस्तो तयारी थाहा पाएपछि मैले त्यो समूहको नेतृत्व गर्ने मित्र हेमराज थापालाई फोन गरेर सम्झाएँ, ‘सबै सामान्य छ, प्रदर्शन नगर्नू ।’ किनकि, मैले थाहा पाइसकेको थिएँ, हाम्रो विषयलाई राजनीतिकरण गरिँदैछ ।

प्रदेशमा संसद अवरुद्ध गर्नेदेखि नगरपालिकामा नगरपालिकाको कार्यालय घेराबन्दीसम्मका कार्यक्रम बनिसकेको रहेछ । मैले कांग्रेसका स्थानीय नेतालाई व्यक्तिगत रुपमा फोन गरेर भनें, ‘तपाईंहरु आन्दोलन गर्नुहुन्छ गर्नुहोस्, तर म र रोयलको विषयलाई कृपया नजोडिदिनुहोला ।’

उनीहरुको विश्वास नलागेर मैले सोही क्षेत्रबाट निर्वाचित कांग्रेस सांसद एवं केन्द्रीय सदस्य डा. नारायण खड्कालाई पनि स्थानीय कांग्रेसीलाई सम्झाइदिन आग्रह गरेँ । त्यसपछि कांग्रेसजनले हाम्रो विषयमा त्यति वकालत गरेनन् ।

मैले कांग्रेस नेताहरुलाई आफ्नो नाम नलिन आग्रह गरेपछि अर्कै हल्ला चल्यो ।

कतिपयले ‘नवराज पूर्वमाओवादी भएकाले चुनावमा माओवादी हारेको रिस साँधेको’ भनें । अनि कतिले चाहिँ ‘उसको बाउ पनि एमाले तर फरक गुट भएकाले एउटै पार्टीबाट निर्वाचित उपप्रमुख र वडाअध्यक्षविरुद्ध समाचार लेखेको’ भनें ।

यी सबै भ्रम चिर्न दुई दिनपछि हामी बेलका गयौं । शनिबारको दिन यही विषयमा कांग्रेसको विरोध सभा थियो । उनीहरुले त्यो सभामा हामी पक्राउको घटनालाई जोडतोडसँग उठाइरहेका थिए । म पान पसलमा उभिएर हेरिरहेको थिएँ । एक हिसाबले ठिकै हो । आफ्नो विषयमा कुरा उठाइदिएका छन् । तर, यसमा उनीहरुको पार्टीगत स्वार्थ थियो । मलाई त्यो सभामा केही बोल्न आग्रह गरियो । मैले ठाडै अस्वीकार गरेँ ।

म अहिलेसम्म पनि कुनै पार्टीको सदस्यता नलिएको पत्रकार हुँ । न मैले लेखेका समाचारमा कुनै पार्टीको गन्ध आयो भनेर स्वतन्त्र व्यक्तिका मुखबाट टिप्पणी सहनु परेको छ । पार्टीका कार्यकर्ताले त आफू प्रतिकुल समाचार आउनेबित्तिकै विपक्षी दलको मान्छे भन्न कति पनि ढिलाे गर्दैनन् ।

हामीले नगरपालिकाको सभाहलमा एउटा कार्यक्रम राख्यौं । त्यहाँ उपप्रमुख चौधरीसहित सबै वडाअध्यक्ष, राजनीतिक दलका प्रतिनिधि, नगरपालिकाका कर्मचारीलाई राखेर आफ्ना कुरा स्पष्ट पार्‍याैं । त्यसअघि उनीहरु हामीबारे भ्रम र संशय बोकेर बसेका रहेछन् । हामीले आफैं र स्वयं उपप्रमुखकै मुखबाट सबै कुरा स्पष्ट पारेपछि नगरपालिकामा माहोल बिग्रनबाट जोगियो ।

याे पनि पढ्नुहाेस् :

रविले अन्तरवार्ताको तयारी गरेपछि अस्मिता कार्की प्रहरीको नियन्त्रणमा

पछि काठमाडौं फर्किएपछि प्रेस युनियनका एकजना मित्रले अर्को अनौठो कुरा सुनाउनुभयो । हामी पक्राउ परेपछि विज्ञप्ति निकाल्ने विषयमा महासंघमा अन्योल देखियो रे । कारण थियो ‘नवराज कुँवर कुन पार्टीको भन्ने खुलेन ।’

म अचम्ममा परें । ‘यो पार्टीको होला’को भरमा विज्ञप्ति निकालिएछ ।

एकातिर मिडिया काउन्सिल विधेयकको विषयमा पत्रकारहरु आन्दोलित थिए । अर्कोतिर, समाचार लेखेकै आधारमा पक्राउ परेका हामी । यो विषयले राजनीतिक रुप लिने निश्चित थियो । तर, मैले संयमतापूर्वक यसलाई सुल्झाउने प्रयास गरें । यति गर्दागर्दै पनि ममाथि थुप्रै आराेप लागे भने मसँग जाेडिएकाे मुद्दाले झण्डै चर्काे रूप लियाे । धन्न, मेरा साथी र शुभचिन्तकलाई पनि सम्झाएँ, उनीहरुले पनि बुझिदिए ।

अहिले अलि फरक मुद्दा तर त्यही शैलीमा चर्चित टेलिभिजनकर्मी रवि लामिछानेलाई प्रहरीले गिरफ्तार गरेको छ । पूर्वसहकर्मी शालीकराम पुडासैनीलाई आत्महत्याका लागि दुरुत्साहन गरेको आरोपमा रविजीसहित उनका सहकर्मी र अर्की एक युवतीलाई नियन्त्रणमा लिएर प्रहरीले अनुसन्धान गरिरहेको छ ।

उनीहरुलाई रिहा गर्न माग गर्दै चितवनमा प्रदर्शन भइरहेको छ । पुडासैनीलाई न्यायको माग गर्दै अर्को पक्ष पनि प्रदर्शनमा उत्रिएको छ । सामाजिक सञ्जालमा रविका कतिपय समर्थकले यो सबै प्रचण्ड वा पूर्वमाओवादीको षड्यन्त्रमा भएको आरोप लगाइरहेका छन् । कांग्रेसका नेताले थुनामा रहेका रविलाई भेटघाट गर्न थालेका छन् । अब विस्तारै सार्वजनिक रुपमा रविलाई राज्यसत्ता लागेरै पक्राउ गरिएको भन्नेखालका अभिव्यक्ति विपक्षी दलका नेताबाटै आउनसक्छ ।

प्रदर्शनका क्रममा प्रहरीसँग झडप हुन थालिसकेको छ । भोलिका दिनमा अब प्रदर्शनमा घुसपैठ हुनसक्ने सम्भावना बढ्दै गएको छ ।

पहिलेका सामाग्री :

निर्मला हत्या प्रकरण, शालीकरामको आत्महत्या र रवि लामिछाने

पत्रकार आत्महत्या प्रकरणः रवि लामिछानेसहित तीनजनालाई पक्राउ गर्छौं- प्रहरी

भीड बढ्दै गएपछि अराजक तत्वको घुसपैठ हुने गर्छ । विस्तारै यो विषयले राजनीतिक रुप धारण गर्नसक्छ । यसप्रति रविका समर्थक र शालीकरामको न्यायका लागि भन्दै प्रदर्शन गर्नेहरु संयमित नहुने हो भने यसको परिणाम कसैले सोचेकोभन्दा जटिल हुनसक्छ ।

अहिले रविलाई जेल नै चलान गरेको होइन । निर्दोष देखिए रविले सफाइ पाउँछन् । रविका आलोचक पनि थुप्रै रहेछन् । रवि पक्राउ नपरेका भए उनका आलोचकले सधैंभरी यही विषयलाई लिएर उनको आलोचना गर्थे होलान् ।

अदालतबाट सफाइ पाए भने रविका आलोचकको मुखमा पनि बुझो लाग्ने भइहाल्यो । त्यसपछि रविप्रति मान्छेको विश्वास अझै बढ्छ । तर, अनुसन्धान नै प्रभावित हुने गरी, भविष्यमा रविप्रति वितृष्णा बढेर जाने गरी भइरहेका प्रदर्शन र आरोप–प्रत्यारोपलाई रोक्नुपर्छ । यसले राजनीतिक रुप धारण गर्नुअघि नै यो मुद्दा सल्टिएन भने यसको परिणाम निकै जटिल हुनसक्छ । बेलैमा सोचौं ।

प्रकाशित मिति: आइतबार, भदौ १, २०७६ ०५:३०