गण्डकीको ‘केआर सरकार’मा मन्त्रीमा क-कसको सम्भावना ?

A+ A A-

गण्डकी प्रदेशमा आज सरकार गठनका लागि दाबी पेस गर्ने अन्तिम दिन हो । नेकपा एमाले संसदीय दल नेता खगराज (केआर) अधिकारीको नेतृत्वमा गठबन्धनको सरकार बन्ने छ ।

गण्डकीमा एमाले, नेकपा माओवादी केन्द्र र राप्रपा सरकारमा सहभागी हुनेछन् । अहिले १२ वटा मन्त्रालय रहेकोमा घटाएर बढीमा १० वटा बनाउने तयारी छ । मुख्यमन्त्री अधिकारी ९ मन्त्रालय बनाउने पक्षमा छन् । त्यसो हुँदा एमालेले मुख्यमन्त्रीसहित ४, माओवादीले ४ र राप्रपाले एउटा मन्त्रालय पाउने सम्भावना छ । दुई सांसद रहेको राप्रपाले खेलकुद र स्वास्थ्य मन्त्रालय मागिरहेको छ । तर, दुवै दिने सम्भावना छैन ।

एमालेबाट को-को ?

प्रदेशमा ९ वटा मन्त्रालय बनेमा एमालेले मुख्यमन्त्रीसहित ४ मन्त्रालय पाउने सम्भावना छ । एमालेबाट रोशनबहादुर गाहा थापा मन्त्री बन्ने पक्का छ । उनी २०७४ सालमा पृथ्वीसुब्बा गुरुङ नेतृत्वको सरकारमै अर्थमन्त्री बन्ने तयारीमा थिए । त्यतिबेला मन्त्रीको शपथ लिन तयार रहन भनिएका रोशन अन्तिममा छुटेका थिए । दोस्रोपटक जित्ने एमालेका एक्ला उम्मेदवार भएको र प्रदेशसभामा सिनियर भएकाले यसपटक उनी मन्त्री हुने पक्का छ । सम्भवतः उनी अर्थमन्त्री बन्ने छन् । रोशन नवलपुरका हुन् ।

स्याङ्जाकी सीता सुन्दास मन्त्री बन्ने सम्भावना बलियो रहेको एमालेका एक नेताले बताए । उनलाई मन्त्रिपरिषद्मा लैजाँदा महिला र दलित कोटा पूर्ति हुने भएकाले सुन्दासको सम्भावना बलियो बनेको हो । उनी पार्टी केन्द्रीय सदस्य हुन् भने यसअघि जिल्ला समन्वय समिति स्याङ्जा प्रमुख भइसकेकी छन् ।

साविकको धौलागिरी अञ्चलका जिल्लामध्ये बागलुङ र पर्वतले एउटा मन्त्री पाउने सम्भावना छ । पूर्वमाओवादी भएकाले लिलबहादुर थापाको मन्त्री बन्ने सम्भावना छ । एमाले स्रोतकाअनुसार पर्वतले मन्त्री पाए मित्रलाल बस्यालको सम्भावना बढी छ । संघमा पदम गिरी मन्त्री बनेमा भने पर्वतले मन्त्री पाउने छैन । त्यसो हुँदा बागलुङका लिलबहादुरको सम्भावना रहन्छ । उनी एमाले पोलिटब्युरो सदस्य हुन् ।

‘मुख्यमन्त्रीले कसलाई रुचाउनुहुन्छ । कोसँग काम गर्न सहज हुन्छ भन्ने विषयले फरक पार्छ । पार्टीमा सिनियर भनेरमात्र पनि हुँदैन,’ एमालेका एक नेताले शिलापत्रसँग भने । एमालेले थप एउटा मन्त्रालय पाउने अवस्थामा कास्कीका भीमबहादुर कार्कीको सम्भावना छ । उनी पार्टी केन्द्रीय सदस्य हुन् ।

माओवादीबाट कसको सम्भावना ?

माओवादी संसदीय दलका नेता हरिबहादुर चुमान मुख्यमन्त्रीका दाबेदार थिए । सम्भवतः भौतिक पूर्वाधार मन्त्रालय लिएर उनकै नेतृत्वमा माओवादी सरकारमा जाने छ । चुमान तनहुँका हुन् । माओवादीबाट गोरखाकी सुशीला सिंम्खडा चुमानपछिको दाबेदार हुन् ।

म्याग्दीले दुईवटै प्रदेशसभा निर्वाचन क्षेत्र जितेकाले म्याग्दीले मन्त्री पाउने सम्भावना छ । म्याग्दीका रेशमबहादुर जुग्जाली मन्त्री बन्ने सम्भावना रहेको माओवादीका एक नेताले बताए । गोरखाकै फणिन्द्र देवकोटाको पनि नाम चर्चामा छ । उनी नेसपाका हुन् । पार्टी एकता हुने तयारी रहेकाले भागवण्डामा उनले मन्त्री पाउने सम्भावना छ । राप्रपा सरकारमा गए दल नेता पञ्चाराम गुरुङ मन्त्री बन्ने छन् ।

सम्भवतः माओवादीका चुमान र राप्रपाका गुरुङले मुख्यमन्त्रीसँगै शपथ लिने छन् । दाबी पेस गरेपछि आजै मुख्यमन्त्रीलाई शपथ गराउने प्रदेश प्रमुखको तयारी छ ।

प्रकाशित मिति: सोमबार, पुस २५, २०७९ १३:११