हिक्मत कार्की: विद्याले शेरधनलाई साथ दिँदा मन्त्रीमै सीमित भए, अहिले मुख्यमन्त्री बने

हिक्मत कार्की: विद्याले शेरधनलाई साथ दिँदा मन्त्रीमै सीमित भए, अहिले मुख्यमन्त्री बने

A+ A A-

प्रदेश १ सरकारको पहिलो सरकारका आन्तरिक मामिला तथा कानुनमन्त्री हुन्, हिक्मत कार्की । शेरधन राई नेतृत्वको सरकारमा आन्तरिक मामिला तथा कानुनमन्त्री बनेका हिक्मतकुमार कार्की प्रदेश १ को चौथो मुख्यमन्त्री बनेका हुन्।

एमाले संसदीय दलका नेतासमेत रहेका कार्कीलाई नेकपा माओवादी केन्द्र, राप्रपा र जसपाको समर्थन छ । प्रदेश प्रमुख परशुराम खापुङले संविधानको धारा १६८ को उपधारा (२) बमोजिम दुई वा दुईभन्दा बढी दलहरूको समर्थनमा बहुमत प्राप्त गरेका कार्कीलाई मुख्यमन्त्री नियुक्त गरेका हुन् । अब कार्कीले संविधानको धारा १६८ को उपधारा ४ बमोजिम ३० दिनभित्र विश्वासको मत लिनु पर्नेछ ।

९३ सदस्यीय प्रदेशसभामा मुख्यमन्त्री बन्न ४७ सांसदको समर्थन आवश्यक पर्नेमा कार्कीलाई एमालेका ४०, माओवादीका १३, राप्रपाका ६ र जसपाका १ गरी ६० जनाको समर्थन छ ।

को हुन् कार्की ?

वि.सं. २०२१ साल असोज ११ गते झापाको गौरादह नगरपालिका ३ मा पिता स्व. बमबहादुर कार्की र माता जानुकादेवी कार्कीको कोखबाट तेस्रो सन्तानका रूपमा हिक्मतकुमार कार्कीको जन्म भएको हो । उनको परिवारमा आमा, दाजु–भाउजु, श्रीमती, दुई छोरी र एक छोरा छन् । उनको बाल्यकाल गौरादहमै बितेको र एसएलसीसम्मको अध्ययन स्थानीय जनता माविमा भएको थियो ।

कार्की विद्यालयमा अध्ययन गर्दैगर्दा अनेरास्ववियुमा संगठित भई विद्यार्थी राजनीतिमा प्रवेश गरेका हुन् । पार्टी राजनीतिमा भने उनी २०३६ सालतिर जोडिएका थिए । सुनसरीको धरानस्थित महेन्द्र बहुमुखी क्याम्पसमा आइएलको पहिलो ब्याजको अध्ययन सकेर उनी २०४२ सालमा उच्च शिक्षाका निम्ति नेपाल ल क्याम्पस काठमाडौंमा भर्ना भएका थिए ।

कार्कीले कानुनमा स्नातकोत्तर तह (एलएलएम) को अध्ययन पूरा गरेका छन् । अनेरास्ववियुको विभिन्न तहका कमिटीको नेतृत्वदायी भूमिका (क्याम्पस प्राक, जिल्ला कमिटी काठमाडौं, बाग्मती अञ्चल कमिटी) निर्वाह गर्दै उनी २०५५ सालमा केन्द्रीय अध्यक्षको जिम्मेवारीमा समेत रहे ।

स्वतन्त्र विद्यार्थी युनियनको समेत नेतृत्व (सभापति नेपाल ल क्याम्पस) सम्हालेका कार्की विद्यार्थी विषेश जिल्ला कमिटीको सचिव, उपत्यका समन्वय कमिटीको सदस्य, मेची अञ्चल समन्वय कमिटीको सदस्य हुँदै २०७१ सालमा सम्पन्न भएको नेकपा (एमाले) को नवौँ राष्ट्रिय महाधिवेशनबाट केन्द्रीय कमिटीमा निर्वाचित भएका थिए । एमालेको पाँचौँ राष्ट्रिय महाधिवेशनमा स्वयंसेवकका रूपमा सहभागी भएका उनी अहिले पार्टीको केन्द्रीय स्थायी कमिटी सदस्य छन् ।

नवौँ महाधिवेशनबाट केन्द्रीय कमिटीमा निर्वाचित भएपछि २०७१-२०७३ सालसम्म कार्की मेची अञ्चल समन्वय कमिटीको इन्चार्ज भए । प्रादेशिक संरचनामा संगठन रुपान्तरण गर्ने चरणमा प्रदेश संगठन कमिटीको प्रचार विभाग प्रमुख रहेका उनी २०७४ सालको प्रदेशसभा निर्वाचनमा झापाको निर्वाचन क्षेत्र नम्बर ५ (१) बाट प्रदेशसभामा निर्वाचित भएका थिए ।

एमालेमा महासचिव माधव नेपालकालमा कार्की केपी ओली र विद्या भण्डारीनिकट मानिन्थे । त्यही कारण राजनीतिक रूपमा उनी निरन्तर पछाडि धकेलिएका थिए । भोजपुरबाट उदाएका शेरधन राईभन्दा सिनियर थिए । राजनीतिक अवसरमा पछाडि धकेलिएका कार्की अघिल्लो कार्यकालमा पनि मुख्यमन्त्रीका आकांक्षी थिए । त्यतिबेला खासमा एमालेका तत्कालीन सचिव भीम आचार्य मुख्यमन्त्रीको दाबीमा थिए ।

आचार्य मुख्यमन्त्री हुने निश्चित भए पनि एमालेभित्रको गुटबन्दीका कारण राईले अवसर पाए । त्यतिबेला राई केपी ओली र विद्या भण्डारीको समूहबाट संसदीय दलको नेताका लागि उम्मेदवार भएका थिए । आचार्यचाहिँ माधव नेपाल र झलनाथ खनाल पक्षका थिए । राईलाई राष्ट्रपति भण्डारीको दरिलो साथ रहेका कारण उनी निर्वाचित हुने अवस्था आयो । त्यतिबेला ओली-भण्डारी टिमबाट कार्की र राई दाबेदार थिए । खासमा कार्की र राई दुवैलाई राष्ट्रपति भण्डारीनिकट मानिन्छ । तर, पछिल्ला दिनमा कार्की भने भण्डारी र ओली दुवैसँग निकट मानिन्छन् ।

प्रदेश १ मा मुख्यमन्त्रीबाट राई बिदा हुने अवस्थामा कार्कीले मुख्यमन्त्री बन्ने प्रयास गरेका थिए । प्रदेश सरकारको पहिलो मन्त्रिपरिषद्‌मा आन्तरिक मामिला तथा कानुनमन्त्रीका रूपमा २०७४ फागुन ३ गतेबाट २०७८ साल भदौ १० गतेसम्म जिम्मेवारी सम्हाले । नेकपाकालमा नेकपाका केन्द्रीय सदस्य रहेका कार्की एमालेको दशौँ राष्ट्रिय महाधिवेशनबाट केन्द्रीय समिति सदस्य बने । कार्की अहिले एमालेको स्थायी कमिटी सदस्य तथा प्रदेश नम्बर १ को सह-इञ्चार्जको भूमिकामा छन् । उनी गत मंसिर ४ मा भएको निर्वाचनमा पनि सोही क्षेत्रबाट प्रदेशसभामा निर्वाचित भएका हुन् ।

यो पनि : प्रदेश १ को मुख्यमन्त्रीमा एमालेका हिक्मत कार्की नियुक्त

प्रकाशित मिति: आइतबार, पुस २४, २०७९ १८:११