ब्रोकर शाखा विस्तारका लागि अब निवेदन दिएको २१ दिनभित्रै अनुमति दिइने

A+ A A-

शेयरबजारको पहुँच वृद्धि गर्दै ब्रोकर कार्यालयहरूले शाखा विस्तार गर्न चाहेमा सहजै अनुमति पाउने व्यवस्था गर्ने नेपाल धितोपत्र बोर्डका अध्यक्ष रमेश हमालले बताएका छन् ।

ब्रोकर एसोसिएसन अफ नेपालको २८औँ साधारणसभामा बोल्दै अध्यक्ष हमालले अब ब्रोकर विस्तारमा बोर्डको तर्फबाट कुुनै प्रकारका कठिनाइ नहुने बताएका हुन् ।

उनले झन्झटिलो प्रक्रियाकै कारण देशभर ब्रोकर कार्यालयहरूले शाखा विस्तार गर्न नसकेको स्वीकार गर्दै आवेदन दिएको २१ दिनभित्रै अनुमति दिने व्यवस्था गर्ने बताएका छन् । ‘हामी दु:ख दिने एजेन्सी होइनौँ, तपाईंहरू शाखा विस्तारको योजना लिएर आउनुस्, हामी २१ दिनभित्रै अनुमति दिने व्यवस्था गछौँ,' उनले भने ।’

यस्तै, अध्यक्ष हमालले पुँजीबजारलाई पारदर्शी बजारको रूपमा विकास गरे मात्र रियल इस्टेट भित्रिने धारणा राखे । उनले भने, ‘पुँजीबजारलाई पारदर्शी र विन टु विन अवधारणाअनुसार नीतिगत व्यवस्था गरेर दिगो बनाएपछि मात्रै रियल इस्टेट यस क्षेत्रमा भित्रिन्छन् ।’

हमालले वित्तीय साक्षरता र पुँजीबजारसम्बन्धी साक्षरतालाई थप अभिवृद्धि गर्नकै लागि वित्तीय साक्षरता सर्वेक्षण गर्न आवश्यक रहेको औल्याए । उनले पुँजीबजारमा पर्याप्त ज्ञानबिनै लगानीकर्ता कारोबारमा होमिएको बताउँदै धितोपत्र बोर्डले क्यापिटल मार्केट इस्न्टिच्युटको विकास गरिने उल्लेख गरे ।