दिनेश कोइरालाबारे कांग्रेस अनुशासन समितिले भन्यो- गल्ती उहाँले गर्ने, माफी हामीले दिनुपर्ने ?

दिनेश कोइरालाबारे कांग्रेस अनुशासन समितिले भन्यो- गल्ती उहाँले गर्ने, माफी हामीले दिनुपर्ने ?

A+ A A-

२२ कात्तिकमा नेपाली कांग्रेसले पार्टी र तत्कालीन गठबन्धनका उम्मेदवारविरुद्ध बागी उम्मेदवारी दिएका नेता, कार्यकर्तालाई पार्टीबाट निष्कासन गर्‍यो । सो समयमा केन्द्रीय अनुशासन समितिले पार्टीका आधिकारिक उम्मेदवार र पार्टीले समर्थन गरेका उम्मेदवारविरुद्ध उम्मेदवार भएका र त्यस्ता उम्मेदवारको प्रस्तावक वा समर्थक भएका ७४ जना नेता/कार्यकर्तालाई निष्कासन गरेको थियो ।

समितिका संयोजक आनन्दप्रसाद ढुंगानाले पार्टीको विधानको धारा ३४ को उपधारा ४ (क) बमोजिम बागी उम्मेदवार, उनका प्रस्तावक र समर्थकलाई पाँच वर्षका लागि पार्टीको अभिलेखबाट हटाउन निर्देशन दिए ।

कांग्रेसले केन्द्रीय सदस्य दिनेश कोइराला, पूर्वकेन्द्रीय सदस्य हेमराज तातेड, पूर्वसांसद अमरेशकुमार सिंह, पूर्वराज्यमन्त्री राजेन्द्रबहादुर सिंह, पर्साका पूर्वसभापति अजय द्विवेदी, बझाङका पूर्वसभापति हर्कजंगबहादुर सिंह र धनुषा क्षेत्र नं. ३ का सभापति हरिशंकर साहसहित ७४ जना नेता/कार्यकर्तालाई कारबाही गर्‍यो ।

तीमध्ये पर्टीको उम्मेदवारलाई नभै गठबन्धनका उम्मेदवारविरुद्ध चितवन ३ मा उम्मेदवार बनेका थिए केन्द्रीय सदस्य कोइराला । कांग्रेसको विधानअनुसार पार्टीका आधिकारिक उम्मेदवारविरुद्ध बागी उम्मेदवार बने मात्र सदस्यतासमेत खारेज हुन्छ । चितवन ३ मा मोआवादी उम्मेदवार डा भोजराज अधिकारी तत्कालीन गठबन्धनबाट उम्मेदवार थिए ।

कोइरालालाई एमालेले समर्थन गरेको थियो । माघ १५ गतेसम्म उम्मेदवारलाई अन्तर्घात गरेको उजुरी दिने समय कांग्रेसको अनुशासन समितिले दिएको छ ।

‘कांग्रेसको केन्द्रीय सदस्य भएर बागी उम्मेदवार बन्न जाने, अनि छोडिदिनुपर्ने हामीले ? चाहे गठबन्धनभित्र होस् या गठबन्धनबाहिर, त्यो ठीक भएन नि,’ अनुशासन समितिका संयोजक ढुंगानाले भने, ‘बागी उम्मेदवार नभएर गठबन्धनलाई हराउन गएको हो भनेचाहिँ माफी हुन्छ ।’

प्रकाशित मिति: बिहीबार, पुस २१, २०७९ १८:०४