कलेजको प्रोजेक्टले जन्मिएको आइडिया, अहिले पाइरहेका छन् सयौँले रोजगारी, हजारौँले सेवा

कलेजको प्रोजेक्टले जन्मिएको आइडिया, अहिले पाइरहेका छन् सयौँले रोजगारी, हजारौँले सेवा

A+ A A-

सुजित रेग्मी, कविसभक्त श्रेष्ठ, रिजा सिंह र शुभम डोटेल आफ्नो योजना ‘सजिलो मर्मत’ बोकेर आइडिया स्टुडियो नामक प्रतिस्पर्धामा गए । उनीहरूको प्रोजेक्ट आइडिया स्टुडियोका निर्णायकहरूलाई खुब मन पर्‍यो ।

‘उहाँहरूले यसमा काम गर्न सके धेरै प्रगति गर्न सकिन्छ भन्नुभयो । उहाँहरूको हौसलाले हामी व्यवसाय गर्ने भयौँ,’ सुजितले भने ।

रिजा र शुभमले त तत्काल व्यवसाय गर्ने सोच नबनाए पनि सुजित र कविसले भने व्यवसाय गर्ने निधो गरे र अर्को साथी पुकार आचार्यलाई पनि कम्पनीमा आबद्ध गराए ।

सन् २०१६ मा इलेक्ट्रिसियन र प्लम्बिङबाट सुरु भएको सजिलो मर्मतले अहिले घर र अफिसका लागि चाहिने प्लम्बिङ, इलेक्ट्रिसियन, होम सलोन, कार्पेन्ट्री, क्लिनिङ, चालकलगायत ५० वटा भन्दा धेरै सेवा दिन्छ ।

सेवाका लागि दैनिक ५०/६० वटा इन्क्वायरी आउँछ । त्यो सेवा प्रदान गर्न इन हाउस र आउट सोर्सिङ गरेर ३ सयभन्दा धेरैको टेक्निकल टिम छ ।

ग्राहकलाई सेवा दिनका लागि कम्पनीले २ सय ७० टेक्निसियन र ३० वटा सेवा प्रदायकसँग सहकार्य गरिरहेको छ । त्यस्तै, कम्पनीमा इन हाउस नै ३५ जनाको टिम छ ।

कामसँगै कम्पनीले मुनाफा पनि राम्रो गरिरहेको छ । कम्पनीले नाफाका लागि मुख्य दुईवटा तरिकाले काम गरिरहेको छ ।

‘हामीले एउटा सब्सक्रिब्सन मोडल बनाएका छौँ । त्यसमा कुनै पनि अर्गनाइजेसमा प्लम्बिङ, इलेक्ट्रिसियनलगायतको सेवा चाहिरहन्छ भने प्याकेज बुक गर्न मिल्छ । त्यो प्याकेज लिएपछि वर्षभरिका लागि सेवा दिन्छौँ । तीन/तीन महिनामा अग्रिम पेमेन्ट गरे पुुग्छ । पार्ट्स फेर्न पर्‍यो भने पैसा लाग्छ,’ सुजितले भने ।

त्यस्तै, अर्को मोडल भनेको कमिसन मोडल हो । कुनै कामका लागि टेक्निसियन पठाउँदा कम्पनीले उक्त टेक्निसियनसँग काम हेरेर १० देखि २० प्रतिशत कमिसन लिन्छ ।

Sajilo Sewa- 11672924385.jpg

पछिल्लो समय सजिलो सेवाले अहिले बिग प्रोजेक्स पनि सुरु गरेको छ । यसमा कुनै घर नै बनाउनुपर्‍यो भने, बाथरुम रेनोभेसन गर्नुपर्‍यो भने, कुनै अफिस नै सेटअप गर्नुपर्‍यो भने त्यस्ता काम गर्दिन्छ ।

अहिले सफलताको सिँढी चढिरहेका उनीहरूको यो व्यवसाय कक्षा कोठाबाट सुरु भएको हो ।

सन् २०१६ मा उनीहरू काठमाडौं विश्वविद्यालयमा एमबीए पढ्ने बेलामा अन्टरप्रिनरसिपको प्रोजेक्ट गर्नुपर्ने हुन्थ्यो । 'प्रोजेक्टमा एउटा समस्याको समाधान निकाल्नुपर्थ्यो । म, कविस, रिजा र शुभम डोटेल एउटै टिममा थियौँ,’ सुजितले भने ।

प्रोजेक्टका लागि के गर्ने होला भन्ने सोेच्दै जाँदा रिजाले 'सजिलो मर्मत'को आइडिया निकालिन् । यो प्रोजेक्ट कस्तो होला भनेर उनीहरूले रिसर्च गर्न थाले ।

‘बानेश्वर एरियाका धेरै घर र १ सयभन्दा धेरै अर्गनाइजेसनमा गएर बुझ्दा यस्तो सेवा भए त धेरै सजिलो हुन्थ्यो भन्ने थाहा पायौँ । धेरै अफिसले त 'भ्याट बिल नभएर समस्या परेको थियो, यस्तो सेवा लिएर कुनै कम्पनी आए त हामीलाई झन् गज्जब हुन्थ्यो' भन्ने प्रतिक्रिया पायौँ,’ सुजितले भने ।

सजिलो मर्मतको प्रोजेक्ट क्लासमा टप भयो । यही प्रोजेक्ट बोकेर उनीहरू ‘आइडिया हन्ट २०१६’ मा प्रतिस्पर्धामा गए । त्यहाँका टप ३ प्रोजेक्ट आइडिया स्टुडियोमा जान पाउने अवसर थियो । उनीहरू छानिए ।

आइडिया स्टुडियोमा पनि उनीहरूले निर्णायकहरूको निकै राम्रो तारिफ बटुले ।

‘यसमा बिजनेस पनि राम्रो र धेरैको समस्या पनि हल हुन्छझैँ लाग्यो । दक्ष जनशक्ति नेपालमा कामै छैन भनेर बसेका छन् । उता सेवाग्राहीले सजिलोसँग मान्छे पाउन सकेका छैनन् । बीचमा बसेर प्लेटफर्म बनाइदिन सक्यो भने त दक्ष जनशक्तिले काम पनि पाउँछन् र उपभोक्ताले सजिलै सेवा पनि पाउँछन्जस्तो लागेर व्यवसाय गर्ने निधो गर्‍यौँ,’ सुजितले भने ।

Sajilo Sewa- 31672924408.jpg

रिजा र शुभम व्यवसायमा नजोडिने भए पनि सुजित र कविसमा भने आफ्नै केही गर्ने हुटहुटी थियो । उनीहरूले अर्का पुराना साथी पुकारलाई जोडे ।

व्यवसाय सुरु गर्ने तयारी चल्दै थियो । त्यही बेलामा कविस र सुजितलाई सूर्य नेपालबाट जागिरको अवसर आयो । पहिले त्यहीँ इन्टर्न गरेकाले इन्टर्नबाटै मान्छे छान्दा उनीहरू छनोटमा परेका रहेछन् ।

सूर्य नेपालको जागिर, तलब भत्ता नै १ लाख हाराहारी हुने भएपछि उनीहरू दोधारमा परे । त्यसपछि उनीहरू सुझाव लिन आइडिया स्टुडियोको फाउन्डर रूपेशकृष्ण श्रेष्ठकहाँ पुगे ।

‘उहाँले हामीलाई तिमीहरू अहिले सोच्ने हो भने सूर्य नेपाल बेस्ट छ । तर, त्यहाँ अबको ३ वर्षपछि पोजिसन त चेन्ज होला । सिक्ने कुरा भनेको जस्ताको त्यस्तै हो । तर, सजिलो सेवालाई निरन्तरता दियौ भने कम्पनी घाटामा गएर डुब्न पनि सक्छ तर तिमीहरूले सूर्य नेपालमा भन्दा धेरै कुरा सिक्न सक्छौ । आफैँ डिसाइड गर भन्नुभयो । अनि हामीले सजिलो मर्मत सुरु गर्ने निर्णय गर्‍यौँ,’ सुजितले भने ।

तीन जना साथी मिलेर १/१ लाख रुपैयाँ जुटाएर २०१७ मा औपचारिक रूपमा सजिलो मर्मत सेवा सुरु भयो । सुरुवाती चरणमा आइडिया स्टुडियोका डा छिरिङ लामाले आइडिया स्टुडियोकै अफिसमा बसेर काम गर्न अनुमति दिए ।

‘त्यो बेलामा कसरी खर्च बचाउने भन्ने थियो । डा. छिरिङ लामाले तिमीहरू हाम्रै अफिसमा बसेर काम गर भन्नुभयो । त्यसपछि हामीलाई सजिलो भयो । बत्ती, पानी, बिजुली केहीको पैसा तिर्नु परेन,’ उनले भने ।

अफिसको व्यवस्था भएपछि उनीहरूले एक जना प्लम्बर सुपरभाइजर र एक जना इलेक्ट्रिसियन सुपरभाइजर राखे र काम सुरु गरे । त्यसपछि बिस्तारै टेक्निसियनहरूलाई आफ्नो सञ्जालमा जोड्ने काम सुरु गरे । सुरुमै २ सय जनाको लिस्ट तयार भयो ।

सुरुमै त्यत्रो मान्छेलाई कहाँ काम दिन सक्नु र ? तीमध्येबाट छानेर ५/७ जनालाई तयार गरे । बिस्तारै आफ्ना साथीभाइ/इष्टमित्रहरूबाट अर्डर आउन थाल्यो । काम बिस्तारै बढ्दै गयो । फेसबुकमा इन्क्वायरी पनि आउन थाल्यो ।

तर, कहिलेकाहीँ भने अर्डर नै आउँथेन । त्यसपछि उनीहरूले बिजनेस हाउसमा पनि गर्ने सोच बनाए । काम सुरु गरेको सुरुका ३ महिनामा सब्सक्रिब्सन मोडल सुरु भयो ।

‘त्यतिबेला रेस्टुरेन्टहरूलाई १४ सय ५० रुपैयाँको प्याकेज दिएर सुरु गर्‍यौँ । पहिलोपटक इभोक, पिक्सी रेस्टुरेन्ट र रेड मडबाट हाम्रो प्याकेज सेवा सुरु भयो,’ सुजितले भने ।

Sajilo Sewa- 21672924432.jpg

त्यसपछि महिनैपिच्छे पैसा आउन थालेपछि उनीहरू सब्सक्रिब्सन बढाउँदै गए र त्यससँगै नयाँ–नयाँ सेवा पनि थप्दै गए । हाल उनीहरूको सेवा पोखरामा पनि सुरु भइसकेको छ भने यो वर्षभित्रै इटहरी, चितवन र बुटवलमा पनि सुरु गर्दैछन् ।

सेवाहरू थप हुँदै गएपछि उनीहरूले कम्पनीलाई रिब्रान्डिङ गरेर सजिलो मर्मतलाई सजिलो सेवा बनाएका छन् । अनि कामजस्तै स्लोगन पनि राखेका छन्– ‘जहाँ समस्या, त्यहाँ सजिलो’ ।

भिडियाे:

प्रकाशित मिति: शुक्रबार, पुस २२, २०७९ ०६:२८