गगन थापाको प्रश्न- सभापतिले सबै कुरा म गर्छु भनेपछि कसरी हस्तक्षेप गर्ने ?

A+ A A-

नेपाली कांग्रेसका महामन्त्री गगन थापाले तत्कालीन गठबन्धन जोगाउन भूमिका खोज्दा सभापति शेरबहादुर देउवाले आवश्यक पर्दा बोलाउने जवाफ दिएको बताएका छन् ।

बुधबार पार्टी कार्यालय सानेपामा शिलापत्रसँग कुराकानी गर्दै महामन्त्री थापाले गठबन्धन सफल भएको भए आफूले टुटाउन खोजेको आरोप खेपिरहेको हुने बताए । ‘गठबन्धन सफल भएको भए हामीलाई तिमीहरूले भत्काउन चाहन्थ्यौँ, सकेनौँ भन्ने आरोप लागिरहन्थो,’ उनले भने, ‘गठबन्धनको व्यवहारको जिम्मा लिएका नेताहरूले गठबन्धन मिलेपछि श्रेय लिने, बिग्रिएपछि जिम्मा लिन पन्छिइहाल्ने । गठबन्धन टुटेपछि सकिनँ पनि त भन्नुभर्‍यो नि ।’

सभापति शेरबहादुर देउवालाई वस्तुस्थितिबारे ब्रिफिङ गरेको र देउवाले आवश्यक पर्दा बोलाउने जवाफ दिएको उनले बताए । ‘हामीहरू गठबन्धनविरुद्धमा रहेको ट्याग लागेकाले अलग रहने कुरा भयो,’ उनले भने, ‘हाम्रो कुरा राख्न चाहन्थौँ, विभिन्न माध्यमबाट आफ्ना कुरा राख्यौँ पनि । त्यतिबेला गठबन्धनको कुरा दुई-तीन जना नेताले गर्नुपर्छ भनियो । वार्ता गरिरहेका छौँ भनियो ।’

‍‍‍‍‍‍टिकट बाँड्ने समयमा राजनीतिक व्यवहार कांग्रेसभन्दा पनि गठबन्धन जोगाउन केन्द्रित भएको उनले बताए । ‘कांग्रेसले कांग्रेस भएर सोच्नेभन्दा पनि गठबन्धन जोगाउन प्राइमरी कुरा हो भनेर सोच्यौँ । त्यसको जवाफ दिनुपर्दैन ?,’ उनले भने ।

महामन्त्रीहरूले हस्तक्षेपकारी भूमिका खेल्न सक्नुपर्ने आवाज पार्टीका नेताहरूले उठाइरहेका छन् । पोखरा पुगेर दुर्घटना हुन्छ भन्ने जानकारी थियो र प्रक्रियामा सामेल गराइएन भनेका थिए । ‘पार्टीको लिडरसिपले गरेको विषयलाई प्रश्न गर्ने हुती नभएकाले गर्ने प्रश्न हो,’ महामन्त्री थापाले भने, ‘पार्टी सभापतिले सबै कुरा म गर्छु भनेपछि हस्तक्षेप कसरी गर्ने ? टेलिफोन गर्दा के-के काम गर्नुपर्छ भनेँ । भएका सूचना र अवस्थाको ब्रिफिङ गरेँ । म पर्‍यो भने बोलाउँछु भनेपछि गर्ने के ?’

दुई दिनअघि चुनाव लड्दा प्रतिस्पर्धीका हैसियतमा के गर्नुपर्छ भन्दा सभापति देउवाले परेको बेला बोलाउने भन्ने जवाफ पाएपछि पछि हटेको उनले बताए । ‘हस्तक्षेप भनेको के गर्ने, त्यहाँ गएर नाच्ने, उफ्रिने, नारा लगाउने के हो ?,’ थापाले प्रश्न गरे ।

प्रकाशित मिति: बुधबार, पुस २०, २०७९ १८:३४