जङ्गी अड्डाले बनायो मेजर जर्नेल प्रेम शाहीमाथि छानबिन गर्न जुनियर उपरथीको नेतृत्वमा समिति

जङ्गी अड्डाले बनायो मेजर जर्नेल प्रेम शाहीमाथि छानबिन गर्न जुनियर उपरथीको नेतृत्वमा समिति

A+ A A-

सैनिक हिरासतमा रहेका उपरथी प्रेम शाहीमाथि अनुसन्धान गर्न सैनिक मुख्यालयले अर्का उपरथी बाबुराम श्रेष्ठको नेतृत्वमा समिति बनाएको छ । श्रेष्ठ मुख्यालय जङ्गी अड्डाकै सैनिक तालिम प्रमुख हुन् ।

सैनिक उच्च स्रोतका अनुसार उपरथी शाहीमाथि ‘कोट अफ इन्क्वायरी’का लागि शाहीभन्दा जुनियर उपरथी श्रेष्ठको नेतृत्वमा प्रधानसेनापति प्रभुराम शर्माले छानबिन समिति बनाएका हुन् । जङ्गी अड्डाले शाहीमाथि विभिन्न युनिटमा कार्यरत हुँदा आर्थिक अनियमितता गरेको उजुरीबारे छानबिन भइरहेको सैनिक प्रवक्ता सहायक रथी कृष्णप्रसाद भण्डारीले बताए ।

‘उपरथी शाहीमाथि उनको नागरिकता र उमेर विवादबारे सर्वोच्चले अन्तरिम आदेश जारी गरेपछि अनुसन्धान भएको होइन । मुख्यालयले योभन्दा पहिलादेखि नै छानबिन गरिरहेको थियो । अहिले त्यसकै निरन्तरता हो,’ प्रवक्ता भण्डारीले भने ।

उपरथी शाहीमाथि छानबिन गर्न बनेको समितिका संयोजक उपरथी श्रेष्ठ आफैँ आर्थिक अनियमितता गरेको आरोपमा कोर्ट मार्शलमा परेका थिए । उपरथी श्रेष्ठमाथि सिरहाको चौहर्वा बाहिनीपति हुँदा सैनिक भर्नामा अनियमितता गरेको आरोप लागेको थियो । तत्कालीन सेनापति पूर्णचन्द्र थापाले सोही विषयमा छानबिन गर्न तत्कालीन उपरथी सुवर्णबहादुर शाहको संयोजकत्वमा समिति गठन गरेका थिए ।

तर, हालका सेनाप्रमुख शर्मा प्रधानसेनापति नियुक्त हुनासाथ श्रेष्ठलाई पोखरा पृतना प्रमुख बनाएर पठाएका थिए । श्रेष्ठ प्रधानसेनापति शर्माका निकट मानिन्छन् । उपरथी श्रेष्ठको नेतृत्वमा छानबिन समिति गठन भएकोबारे सैनिक प्रवक्ता भण्डारीले अनभिज्ञता प्रकट गरे । उनले भने, ‘समिति कसको नेतृत्वमा बनेको छ भन्नेबारे मलाई जानकारी छैन । तर, समिति बन्दा ज्येष्ठताकै नेतृत्वमा बन्नुपर्छ भन्ने हुँदैन । समितिले छानबिन प्रतिवेदन मात्रै दिने हो ।’

शाहीको कार्यकाल एक वर्ष लम्बिँदा रथीमा बढुवा हुने सम्भवाना देखिएपछि उनलाई रोक्न आर्थिक आरोपको पासो फालिएको सैनिकस्रोतको दाबी छ । एक सैनिक अधिकारीले भने, ‘उपरथी शाहीको जागिर एक वर्ष लम्बिए उनी बढुवा हुन सक्छन् । त्यसैले उनको बढुवा रोक्न उनीभन्दा जुनियर उपरथी श्रेष्ठको नेतृत्वमा समिति बनाइएको हो ।’

आजबाट उपरथीको ५८ वर्षे सेवा अवधिका कारण अनिवार्य अवकाशमा जान लागेका उपरथी शाही सर्वोच्चको अन्तरिम आदेशअनुसार मंगलबार फेरि हाजिर हुन मुख्यालय पुगेका थिए । उनले शैक्षिक प्रमाणपत्र भन्दा नागरिकताका आधारमा उमेर कम भएको दाबीसहित सर्वोच्च पुगेका थिए ।

सर्वोच्चले उनलाई तत्काल अवकाश नदिन सैनिक मुख्यालय र रक्षा मन्त्रालयका नाममा अन्तरिम आदेश दिएको थियो । सोही आदेशपछि हाजिर हुन मुख्यालय पुगेका उपरथी शाही मंगलबारदेखि सैनिक हिरासतमा छन् ।