अवकाशको पत्र बोकेर घर बिदामा बसेका उपरथी प्रेम शाही थप एक वर्ष सेवामा फर्किने संकेत

अवकाशको पत्र बोकेर घर बिदामा बसेका उपरथी प्रेम शाही थप एक वर्ष सेवामा फर्किने संकेत

A+ A A-

अवकाशको पत्र बुझेर बसेका नेपाली सेनाका उपरथी प्रेम शाहीको सेवा अवधि थप एक वर्ष लम्बिएको छ । सैनिक मुख्यालयले अवकाशको पत्र थमाएपछि उपरथी शाही सैनिक मुख्यालय र रक्षा मन्त्रालयविरुद्ध सर्वोच्च पुगेका थिए ।

शाहीले आफ्नो सेवा अवधि अझै एक वर्ष बाँकी रहेको भन्दै ७ पुसमा सर्वोच्च अदालतमा मुद्दा दायर गरेका हुन् ।सर्वोच्चले शाहीलाई तत्काल अवकाशमा जान नहुने भन्दै अन्तरिम आदेश जारी गरेको छ । उपरथीको उमेर हद ५८ वर्ष तोकिएको छ । सैनिक मुख्यालमा पेस गरेको कागजातका आधारमा उनी २० पुसमा अवकाश जाँदै थिए ।

तर, उपरथी शाही नागरिता र चारित्रिक प्रमाणपत्रमा उमेर फरक परेको भन्दै नागरिताको आधारमा अझैँ सेवा अवधि एक वर्ष बाकी रहेको दाबीसहित सर्वोच्च पुगेका हुन् । उपरथी शाहीको चारित्रिक प्रमाणपत्रमा जन्ममिति २०२२ साल २० पुस छ भने नागरिकता र अन्य प्रमाणपत्रमा २०२३ पुस २२ उल्लेख भएको छ ।

सेनामा रहेको रेकर्डमा उनको जन्ममिति २०२२ पुस २० नै छ । मुख्यालयमा भएको प्रमाणपत्रको आधारमा उपरथी शाहीले अवकाशको पत्र बुझेर १५ दिन अघिबाट नै बिदामा बसेको नेपाली सेनाका प्रवक्ता सहायकरथी कृष्णप्रसाद भण्डारीले जानकारी दिए ।

‘सर्वोच्च अदालतले के गर्‍यो त्याे हामीलाई जानकारी आएको छैन । नेपाली सेनाको परम्पराअनुसार सैनिक अधिकृतहरू अवकाशको १५ दिनअघि बिदामा बस्नुपर्ने व्यवस्था छ । त्यहीअनुसार उहाँ बिदामा बसिसक्नुभएको छ,’ प्रवक्ता भण्डारीले भने ।

शाही सैनिक मुख्यालयअन्तर्गत निरीक्षणाधिकृत विभागका प्रमुख रहेका थिए । शाहीको शैक्षिक प्रमाणपत्रमा दुईथरी उमेर देखिएको छ । पुस १३ मा न्यायाधीश हरिप्रसाद फुयाँलको एकल इजलासले रक्षा मन्त्रालय र नेपाली सेनाको नाममा कारण देखाऊ आदेश जारी गरेको छ । शाहीको उमेर नागरिकता अनुसार २०२३ पुस २२ कायम भए उनी थप एक वर्ष सेनामै रहनेछन् ।

प्रकाशित मिति: सोमबार, पुस १८, २०७९ १२:२४