मधेसमा जसपालाई दलको नेता चयन गर्न सकस, राउत र यादव मुख्य प्रतिस्पर्धी

A+ A A-

नेपाली कांग्रेसलगायत पार्टीले मधेस प्रदेशमा संसदीय दलको नेता चयन गरिसके पनि जनता समाजवादी पार्टी (जसपा) ले भने संसदीय दलको नेता चयन गरेको छैन ।

वर्तमान प्रदेश सरकारको नेतृत्व गरिरहेको जसपाले पुनः प्रदेश सरकारको नेतृत्व पाउने सम्भावना छ । केन्द्रमा प्रचण्डलाई प्रधानमन्त्री बन्न सघाएकाले जसपाले नेतृत्व पाए यो पार्टीको दलको नेता मुख्यमन्त्री बन्नेछ ।

संघीय संसदमा भने जसपाले सर्वसम्मतिले संसदीय दलको नेता चयन गरिसकेको छ । तर, प्रदेशमा अकांक्षीहरू बढी देखिएका छन् । मुख्यमन्त्री लालबाबु राउत, निवर्तमान सभामुख सरोज कुमार यादव, प्रदेशसभामा दोस्रोपटक निर्वाचित रामआशिष यादव, सरोज कुमार सिंह कुश्वाहा र समानुपातिक कोटामा निर्वाचित मनिष सुमन संसदीय दलको नेताका आकांक्षी छन् ।

जसपाले संसदीय दलको नेता चयन गर्न केन्द्रीय सदस्य तथा जनकपुरधाम उपमहानगरपालिका पूर्वमेयर लालकिशोर साहको संयोजकत्वमा तीन सदस्य निर्वाचन समिति गठन गरेको गरेको छ । तर, समितिले अहिलेसम्म त्यसका लागि बैठक गर्न सकेको छैन । जसपाका एक नेताका अनुसार कसलाई दलको नेता बनाउने भन्नेबारे पार्टी अध्यक्ष उपेन्द्र यादवले मुख खोलेका छैनन् । जसका कारण संसदीय दलको नेता को भन्ने प्रस्ट तस्वीर आइसकेको छैन ।

प्रदेशसभामा जसपाका प्रत्यक्षमा ९ र समानुपातिक ७ गरी १६ सांसद छन् ।

राउत र यादवबीच मुख्य प्रतिस्पर्धा

जसपाका एक सांसदका अनुसार दलको नेतामा दावी गर्नेहरूमध्ये पनि मुख्यमन्त्री राउत र निवर्तमान सभामुख सरोज कुमार यादवबीच मुख्य प्रतिस्पर्धा देखिएको छ ।

‘कतिपय नेताहरूले दलको नेतामा दावी गरिरहनुभएको छ । अन्तिममा राउत र सरोजजीबीच प्रतिस्पर्धा हुने देखिन्छ,' ती सांसदले भने, 'उहाँहरूले भोलिको बार्गेनिङ पावर बढाउन पनि अहिले दलको नेतामा दावी गरिरहेको जस्तो देखिन्छ ।'

कसको पल्ला भारी ?

तत्कालीन राजपाबाट प्रदेश सभामुख बनेका यादव जसपा विभाजनपछि जसपामै बसे । त्यसबेला मधेस प्रदेशमा जसपा, कांग्रेस, माओवादी, नेकपा एसहितको गठबन्धनसँग दुईतिहाइ मत थियो । सोहीकारण उनको पद पनि जोगिएको थियो ।

आफू निकटहरूसँग भने यादवले पार्टी अध्यक्ष उपेन्द्र यादवले आफूलाई मुख्यमन्त्रीको आश्वासन दिएको र सोही कारण जसपामा बसेको बताउने गरेका छन् । उनले चुनावमा पनि आफू मुख्यमन्त्रीको उम्मेदवार रहेको भन्दै भोट मागेका थिए ।

केही दिनअघि यादव पार्टी अध्यक्ष उपेन्द्र यादवलाई भेट्न आफ्ना समर्थकसहित काठमाडौं गएका थिए । त्यसबेला सरोजले उपेन्द्रसँग दलको नेतामा दावी गरेका थिए । तर, उपेन्द्रले भने यो विषयमा यसपटक आफू 'न्युट्रल' बस्ने र कसैको पक्षमा लबिङ नगर्ने जवाफ दिएको जसपाका एक नेता बताउँछन् ।

पार्टीभित्र मुख्यमन्त्री राउत निवर्तमान सभामुख यादवभन्दा सिनियर नेता हुन् । मुख्यमन्त्री राउत केन्द्रीय कार्यकारिणी समिति सदस्य हुन् । उनी राजनीतिक समितिमा पनि छन् । यादव केन्द्रीय सदस्य हुन् ।

राउतनिकट नेताहरू भने उनी सर्वसम्मतिले दलको नेतामा चयन हुने दावी गर्छन् । ‘सर्वससम्मतिमा उहाँ (राउत) दलको नेता चुनिनुहुन्छ,' राउतनिकटक एक सांसद भन्छन्, 'त्यो सम्भव नभए निर्वाचन प्रक्रियाबाट पनि उहाँ नै चुनिने हो ।’ राउतले कहिल्यै साथ नछाडेकाले उपेन्द्र यादवले पनि उनैलाई सघाउने ती सांसदको दावी छ ।

तर, राउतको कार्यकालमा अख्तियारले छानविन पनि ग‍र्‍यो । जसका कारण उनी यसपटक दलको नेता नबन्ने उनीइतरका नेताहरू बताउँछन । तर, राउतनिकट नेताहरू त्यसलाई स्वीकार गर्दैनन् ।

‘प्रदेश सरकारमा अनियमितता भयो भनेर अख्तियारले छापा मार्‍यो । त्यसमा जो दोषी देखिएकालाई अदालतले दोषी ठहर गरेपछि कारबाही हुन्छ नै,' राउतनिकट एक सांसद भन्छन्, 'यसमा मुख्यमन्त्रीले उनीहरूलाई बचाउने काम त गरेका छैन नी । मुख्यमन्त्रीजीमाथि त्यस्तो मुद्दा पनि छैन ।'

प्रकाशित मिति: सोमबार, पुस १८, २०७९ २१:००