सरकारमा जानुहुन्छ ? मनाङे भन्छन्- योजना छैन

A+ A A-

अहिलेको अंकगणितअनुसार मनाङ ‘ख’ बाट गण्डकी प्रदेशसभा सदस्यमा स्वतन्त्र निर्वाचित राजीव गुरुङ (दीपक मनाङ) प्रतिपक्षी हुनेछन् । उनले हालसालै रोजेको दल एकीकृत समाजवादी केन्द्रमा सत्ता बाहिर छ ।

प्रदेशको युवा तथा खेलकुदमन्त्रीको हैसियतले सोमबार मनाङे प्रदेशसभाको दोस्रो कार्यकालको पहिलो बैठकमा पुगेका थिए । संसद बैठक सकिएपछि पत्रकारले सोधे- सरकारमा जानुहुन्छ ?

उनले सरकारमा जाने/नजानेबारे कुनै योजना नभएको सुनाए । तर, आफूले संसद विघटन हुन नदिन आवश्यक भूमिका निभाउने बताए । ‘पाँच वर्षअघि चुनावमा नजाने । त्यसको लागि जे गर्नुपर्छ म गर्ने । घरघरमा नमस्ते गर्दै हिँड्न टेन्सन हुँदो रहेछ,’ उनले भने, ‘सरकारमा जानेबारे योजना छैन । पाँच वर्षअघि चुनाव हुने अवस्था म हुन दिन्नँ । पूर्ण कार्यकाल बन्नेतिर जान्छु ।’

गण्डकी प्रदेशसभामा अहिले मनाङेसहित कांग्रेसका २७, एमालेका २२, माओवादीका ८, राप्रपाका २ सांसद छन् । सत्तापक्षमा कांग्रेस, माओवादी र राप्रपा हुनेछन् । यसो हुँदा ३२ सांसद हुन्छन् । ६० सदस्यीय प्रदेशसभामा ३१ सांसद भए बहुमत पुग्छ ।

अघिल्लो कार्यकालजस्तो यसपटक मनाङे निर्णायक छैनन् । त्यसैले उनले समर्थन नगरे पनि विघटन भने हुँदैन । तर, राजनीतिक घटनाक्रम फेरिएर एउटा दलले अर्कोलाई समर्थन नगरेको अवस्थामा प्रदेशसभा विघटन हुनसक्छ ।एकीकृत समाजवादी केन्द्रमा सरकारमा जाने बहज जारी छ । त्यस्तो अवस्थामा मनाङे पनि प्रदेश सरकारमा सहभागी हुन सक्छन् । तर, यो सम्भावना निकै कम देखिएको छ । आफूसँग स्पष्ट बहुमत भएकाले मुख्यमन्त्री हुने तयारीमा रहेका एमालेका खगराज अधिकारी मनाङेलाई सरकारमा ल्याउने पक्षमा छैनन् ।