'जति संख्यामा चिकित्सक बढ्दैछन्, समस्या पनि त्यत्तिकै बढ्दैछ' (अन्तर्वार्ता)

'जति संख्यामा चिकित्सक बढ्दैछन्, समस्या पनि त्यत्तिकै बढ्दैछ' (अन्तर्वार्ता)

A+ A A-

नेपाल चिकित्सक संघ (एनएएम) को आसन्न निर्वाचनका लागि लोकतान्त्रिक समूहबाट वरिष्ठ क्यान्सर सर्जन डा. अनिलविक्रम कार्कीले अध्यक्षको उम्मेदवारी दिएका छन् । चिकित्सकहरूका समस्यालाई समाधान गर्ने मुख्य एजेन्डालाई अगाडि सार्दै डा. कार्कीले आफूले अध्यक्षको उम्मेदवारी दिएको बताएका छन् ।

आउँदो माघ ६ र ७ गते उपत्यकाबाहिर र माघ १९, २० र २१ गते उपत्यकामा हुने निर्वाचनका लागि उनले कस्तो तयारी गरेका छन् ? अनि सबैभन्दा व्यस्त पेसामध्ये एक मानिने चिकित्सा पेसामा रहेर देशका विभिन्न स्थानमा काम गरिरहेका चिकित्सकहरूलाई मतदानस्थलसम्म ल्याउनका लागि उनको कस्तो भूमिका रहनेछ भन्नेबारे डा. कार्कीसँग शिलापत्रकर्मी प्रतिभा चन्दले गरेको कुराकानीः

नेपाल चिकित्सक संघ (एनएमए)को चुनावमा उठ्नुपर्ने आवश्यक्ता किन देख्नुभयो ?

मेरो पेसागत हकहितमा लागेको संगठन नेपाल चिकित्सक संघ हो । यो संगठनले आमचिकित्सकहरूको अधिकारदेखि आमनागरिकको स्वास्थ्यका लागि एउटा दायित्व निर्वाह गर्दै आइरहेको छ । त्यस्तो गरिमामय संस्थाको नेतृत्व गर्ने अवसर पाउँदा मैले चिकित्सा क्षेत्रमा भएका समस्याको समाधान निकाल्न सक्छु र नेपाल सकारको स्वास्थ्य नीतिमा पनि केही योगदान गर्न सक्छु भन्ने हिसाबले मैले उम्मेदवारी दिएको हुँ ।

तपाईंका चुनावी एजेन्डाहरू के–के छन् ?

एमबीबीएसको पढाइ सकेर चिकित्सक बनेर निस्किँदासम्म अझ भनौँ, अन्तिमसम्मै उनीहरूले जेजे समस्याहरू झेलेका छन्, हाम्रा एजेन्डा तिनै हुन् । हामीले चिकित्सक बन्नका लागि सुरुकै दिनबाट ‘प्रेसर’मा पढेका हुन्छौँ । राज्यले निश्चित शुल्क तोकेको हुन्छ । रातदिन नभनी पढेका हुन्छौँ । जब हामी पढाइ पूरा गर्छौं, अनि हामी समस्याको भूमरीमा फसेजस्तो महसुस गर्छौं ।

स्वास्थ्यको जिम्मा चिकित्सकले लिइरहँदा हामी चिकित्सक आफैँ स्वस्थ छैनौँ । त्यही भएर मैले 'स्वस्थ नेपालका लागि स्वस्थ चिकित्सक' भन्ने मूल नाराका साथ चुनानी प्रतिस्पर्धामा आएको छु । स्वस्थ चिकित्सक भनिरहँदा शारीरिक मात्र नभएर उसको मानसिक, आर्थिक, सामाजिक, राजनीतिक सबै हिसाबले ऊ स्वस्थ हुनुपर्‍यो भन्ने मेरो मान्यता हो ।

जागिर खोज्न जुत्ता खियाउँदै सुरु भएको यात्रामा अरुकाे उपचारका लागि डेढ दिनसम्म जाग्नुपर्छ । भोक निन्द्रा नभनी काममा खट्नुपर्छ । तर, हाम्रो सेवाशुल्क राज्यले तोक्छ । त्यसमा राज्यले कन्जुस्याइँ गरेको छ । हामीले पाउने तलब सुनाउन पनि लाज लाग्ने अवस्था छ । त्यही तलबमा पनि काम गरिरहेका चिकित्सकहरूलाई कहाँ र कुन बेला आक्रमण गरिने हो, पत्तो हुँदैन ।

उच्च शिक्षा अध्ययनका लागि हामीलाई एक वर्ष अनिवार्य रूपमा काम गर्नैपर्ने बाध्यता छ । त्यत्रो मिहिनेत गरेर पढ्यो । लाइसेन्स लिने बेलामा बिनाकारण अस्थायी भनेर हामीलाई अल्झाइन्छ, जसको कानुनी तुक नै छैन ।

चिकित्सकहरूको हकहित, नागरिक सेवा र सुरक्षित चिकित्सा पेसा चिकित्सक संघको मूल नारा हो । यसकै ‘फ्रेम वर्क’मा रहेर हामीले काम गरिरहेका छौँ । काम गरेर देखाएका छौँ । त्यसैले हाम्रो जित सुनिश्चित छ । केही काम गर्दागर्दै रोकिएका छन्, तिनलाई निरन्तरता दिनका लागि पनि यो समूह आवश्यक छ ।

यसरी काम गर्दा पनि हामीले न बिरामी बिदा भन्न पाएका छौँ, न सुत्केरी बिदा भन्न पाएका छौँ, न क्रिया बिदा लिन पाएका छौँ । भन्ने बेलामा विशिष्ट सेवा तर व्यवहार भने त्यस्तो । विशिष्ट सेवाको महसुस गर्न हामीले पाएका छैनौँ । त्यसैले चिकित्सकका विभिन्न समस्याहरूलाई खोजेर अगाडि बढ्नुपर्छ भन्ने मेरो मान्यता हो ।

तपाईंहरूका एजेन्डा हेर्ने हो भने १७ वटा छन्, तर तीमध्ये अधिकांश एजेन्डा तपाईंहरूले प्रतिस्पर्धा गरिरहनुभएका प्यानलसँग पनि मिल्दाजुल्दा छन् । यसरी एजेन्डा नै मिलेपछि प्रतिस्पर्धा गरिरहन आवश्यक छ र ?

अरु साथीहरूका एजेन्डा मैले सबै हेरिसकेको छैन । तर, केही समस्या साझा छन् । कहीँ पनि समस्या साझा भएर सबै एकै ठाउँमा चुनाव लडेको भेट्नुहुन्न । साझा समस्या भइराख्दा कति फरक ढंगले पनि सोच्नुपर्ने हुन्छ । त्यो फरक ढंगको सोचाइ फरक समूहले प्रतिनिधित्व गर्छ । हाम्रा सबै एजेन्डा एउटै छैनन् । हाम्रो समूहमा भएका हाम्रा एजेण्डा मिले पनि हामी फरक निचोड निकालेर अगाडि बढ्छौँ । चुनावमा प्रतिस्पर्धा गरिरहँदा दुई/तीनवटा समूह हुनु स्वाभाविक हो । यो नै लोकतन्त्रको सुन्दरता हो । एकै ठाउँ भयो भने त भोलि शायद घचघच्याउने समूह पनि हुँदैन होला । त्यसका लागि पनि फरकफरक समूह चाहिन्छ । हामी जो चुनावमा होमिएका छौँ, सबै एउटै पेसाका छौँ । जति पुस्ता र संख्या बढ्दैछ, त्यति समस्या पनि बढ्दैछ । त्यसैले केही एजेन्डा समान भए भन्दैमा हामी सबै समान सोचमा छौँ भन्न मिल्दैन ।

अहिलेसम्मको यो ७० वर्षको इतिहास हेर्ने हो भने लोकतान्त्रिक समूहले नै एकछत्र राज गर्दै आइरहेको छ । यो वर्ष भने यसलाई तोड्ने योजनामा अर्को समूह जुटेको अवस्थामा तपाईंका जित्ने आधार केके छन् ?

हामी कुनै पार्टीभन्दा पनि दुईवटा फरक सोचका समूह हौँ भन्न रुचाउँछुु । हामी निरन्तर रूपमा विजयी भएका भए पनि फरक एजेन्डाहरू केही पनि छैनन् । चिकित्सकहरूको हकहित, नागरिक सेवा र सुरक्षित चिकित्सा पेसा चिकित्सक संघको मूल नारा हो । यसकै ‘फ्रेम वर्क’मा रहेर हामीले काम गरिरहेका छौँ । काम गरेर देखाएका छौँ । त्यसैले हाम्रो जित सुनिश्चित छ । केही काम गर्दागर्दै रोकिएका छन्, तिनलाई निरन्तरता दिनका लागि पनि यो समूह आवश्यक छ । त्यसैले पनि हामीलाई जिताउनुहुन्छ भन्नेमा विश्वस्त छु ।

अहिले सकिन लागेको जुन कार्यकाल छ, यो र कोभिड सँगै आएको हो । कोभिड यस्तो चीज थियो कि संसारका धेरै मुलुकहरू यसबाट अनभिज्ञ थिए । नेपाल चिकित्सक संघ आफैँ सक्रिय भएर कोभिडविरुद्धको लडाइँ लड्यौँ । कोरोना महामारीका बेला पनि चिकित्सकसँग भएका विभिन्न समस्याहरूको समाधानका लागि काम गर्‍यौँ ।

चिकित्सक पेसा भन्नेबित्तिकै सेवा जोडिएर आउँछ, र तपाईंहरूका एजेन्डा हेर्दा चिकित्सकको हकहितका लागि धेरै कुरा लेखिए पनि बिरामीका लागि कुनै पनि कुरा उल्लेख छैन, किन ?

हामीले चिकित्सकहरूका लागि भनेर ‘डेडिकेटेड’ अस्पताल भनेका छौँ । त्यो भन्दै गर्दा अर्को नयाँ अस्पतालको सुरुवात हुनेबित्तिकै सार्वजनिक अस्पतालमा चिकित्सकका परिवारको चाप घट्छ ।

हामीले नीतिगत रूपमा ‘सेन्टर फर डिजिज कन्ट्रोल’ बनाउनुपर्छ र विभिन्न समुदायसँग बसेर उपचारको ‘प्रोटोकल’ बनाउनुपर्छ । भन्नुको मतलब कुनै रोगको उपचार सबैतिर होस्, जसले गर्दा बिरामीको उपचारका सहज हुन्छ । साथै, ती रोगहरू लाग्न नदिनलाई केके गर्न सकिन्छ, सरकारले केके गर्नुपर्छ भन्ने कुराको छलफलबाट एउटा निर्णय निकालेर काम गर्छौं भनेका छौँ । यो नागरिकको स्वास्थ्यकै लागि हो ।

जबसम्म अनुसन्धान राम्रोसँग हुँदैन, तबसम्म हामीले दिएको सेवालाई हामीले पूर्ण मान्न सक्दैनौँ । त्यही भएर हाम्रो आफ्नै अनुसन्धान केन्द्र भयो भने रोगको पहिचान गर्न सक्छौँ । यो बाहेक अरु जनसरोकारका विषयहरूलाई पनि अगाडि राखेका छौँ ।

सम्बन्धित समाचार