गण्डकीका नयाँ माननीयलाई ‘कोसेली’: पित्तलको लोगो, कानुन भएको झोला

A+ A A-

गण्डकी प्रदेशसभा सदस्य निर्वाचित भएका सांसदहरूले पद तथा गोपनीयताको शपथ लिएका छन् ।

शपथ लिएसँगै प्रदेशसभा सचिवालयले उनीहरूलाई एउटा झोला र लोगो दिएको थियो । ‘प्रदेशसभा, गण्डकी’ लेखिएको त्यो झोलामा प्रदेशले अहिलेसम्म बनाएको कानुनको संग्रह, प्रदेशसभा सञ्चालन नियमावली, गण्डकी प्रदेश सचिवालयले निकालेको स्मारिका, लोगोजस्तै सानो खालको नेपालको झण्डा थियो ।

सांसदहरूलाई नेपालको नक्सा र त्यसमा गण्डकी प्रदेशलाई विभिन्न जातजाति देखाएर अंकित गरिएको, हिमाल, धानको बाला, लालीगुराँस, डाँफे भएको लोगो दिइएको छ । प्रदेशसभाको लोगो गोरखाका विनीत रानामगरले २०७५ सालमा बनाएका हुन् ।

संसद सचिवालयका अनुसार सांसदलाई बुधबार दिइएको उक्त लोगोको मूल्य एउटाको ६ हजार ७५० सय रूपैयाँ परेको छ । अघिल्लो कार्यकाल सांसद भएकाहरूलाई १५ हजार रूपैयाँको लोगो दिइएको थियो ।

अघिल्लो कार्यकालमा सुन लेपन गरिएको थियो भने अहिले त्यस्तो छैन । सुनको लेपन लगाउँदा महँगो परेको थियो । तर, यसपटक सुनजस्तै देखिने वस्तु अर्थात् पित्तलको लोगो दिइएको हो ।

यो लोगो चीनमा बनाएर ल्याइएको हो । नेपालमै बनाउने प्रयास गरे पनि सम्भव नभएपछि चीनबाट मगाइएको संसद सचिवालयका सचिव हरिराज पोखरेलले बताए । ‘काठमाडौंमा बनाउँछ भनेर घरेलु कार्यालयमा गएँ । त्यहाँ सकिँदैन भनेपछि अरू कालिगढकहाँ गएँ,’ उनले शिलापत्रसँग भने, ‘त्यहाँ पनि सकिँदैन भने । पछि पहिला जहाँबाट मगाएको हो त्यहीँबाट ल्याउने भनेर चीनबाटै आएको हो ।’

योपटक एकै प्रकारको ९० वटा लोगो मगाइएको छ । कोही सांसदले अहिले दिइएको लोगो हराएमा शुल्क तिरेपछि अर्को लोगो पाउँछन् ।

अघिल्लो कार्यकालमा सुरूमा चुच्चे नक्सा नभएको लोगो दिइएको थियो । त्यतिबेला सांसदलाई लोगो दिँदा नेपालको चुच्चे नक्सा सार्वजनिक भएको थिएन । २०७७ सालमा चुच्चे नक्सा पारित भएपछि सांसदहरूले चुच्चे नक्सा भएको लोगो माग गरेका थिए । पछि संसद सचिवालयले चुच्चे नक्सा भएको लोगो दिएको थियो ।