आकाशमै खोसियो लिङ्देनको गृहमन्त्री हुने सपना

A+ A A-

१० पुसमा राष्ट्रिय प्रजातन्त्र पार्टीका अध्यक्ष राजेन्द्र लिङ्देन झापामा थिए । काठमाडौंमा सत्ता राजनीतिको रस्साकस्सी चलेका बेला गृहजिल्ला झापामा रहेका लिङ्देन सरकारमा जाने वा नजाने टुंगोमा थिएनन् । अर्थात्, कांग्रेस वा एमाले कसको नेतृत्वमा गठबन्धन बन्छ भन्ने प्रष्ट चित्र बनिसकेको थिएन ।

राष्ट्रपति विद्यादेवी भण्डारीले धारा ७६ को उपधारा (२) अनुसार सरकार गठनका लागि दिएको साता दिनको समय १० पुसमा सकिँदै गर्दा पनि लिङ्देन झापामै रुमल्लिइरहेका थिए । तर, १० पुसको बिहानै एमाले नेतृत्वको गठबन्धन बन्ने र माओवादी केन्द्रका अध्यक्ष पुष्पकमल दाहाल 'प्रचण्ड' प्रधानमन्त्री बन्ने संकेत देखियो, त्यसपछि लिङ्देन काठमाडौं आए । हुन त, उनलाई यो गठबन्धकै लागि बोलाइएको थियो ।

एमालेसहितको गठबन्धन बनेको अवस्थामा राप्रपा सरकारमा जाने रणनीति बनिसकेको थियो । राप्रपा सरकारमा जाँदा अध्यक्ष लिङ्देनकै नेतृत्वमा सरकारमा जाने अनौपचारिक सहमति पनि बनेको राप्रपा स्रोतको भनाइ छ । कांग्रेस–माओवादी गठबन्धन भत्किएको सूचना पाएलगत्तै लिङ्देल झापाबाट जहाज चढेर काठमाडौं आए ।

राप्रपा स्रोतको भनाइमा पुरानो गठबन्धन भत्केर नयाँ गठबन्धन बनेमा लिङ्देनले आफू गृहमन्त्री हुने योजना बनाएका थिए । त्यही योजना सफल हुने भएपछि उनी अलिकति पनि बिलम्ब नगरी झापाबाट काठमाडौं आए र एरपोर्टबाट सिधै बालकोट हुँइकिएको एक राप्रपाका नेताले बताए । ती नेताका अनुसार लिङ्देनले माओवादी-कांग्रेस गठबन्धन टुटेर नयाँ गठबन्धन बने आफू गृहमन्त्री हुने कुरा आफू निकटलाई सुनाएका पनि थिए ।

१० गते एमाले अध्यक्ष केपी शर्मा ओलीको निवासमा नयाँ सत्ता गठबन्धनको बैठक बस्दै थियो । त्यहाँ सबैभन्दा पहिला पुगेका थिए राष्ट्रिय स्वतन्त्र पार्टीका अध्यक्ष रवि लामिछाने । त्यसपछि थपिएका थिए– लिङ्देन । उनी पनि गठबन्धनको बैठकमा बसे । गठबन्धनले माओवादी केन्द्रका अध्यक्ष पुष्पमकल दाहाल 'प्रचण्ड'लाई प्रधानमन्त्री बनाउने सहमति गर्‍यो ।

तर, लिङ्देन भने प्रचण्डलाई प्रधानमन्त्री बनाउने सहमतिमा सहमत रहेको बचन दिएर बाहिरिए । उनी बाहिरिएपछि गठबन्धनमा प्रचण्ड प्रधानमन्त्री बनाउने सहमति भयो । बालकोटमा प्रचण्डलाई प्रधानमन्त्री बनाउने सहमति दिएर हिँडेका लिङ्देन राप्रापाका उपाध्यक्ष विक्रम पाण्डेको बालुवाटारमा रहेको कालिका टावरमा आफूनिकटसँग छलफलमा जुटे । उनी त्यतिबेलासम्म पनि उपप्रधानमन्त्रीसहित गृहमन्त्रीको तयारीमा थिए । राप्रपाले उपप्रधान तथा गृह मन्त्रालय पाए सरकारमा जाने भनेर लिङ्देनले ब्रिफिङ गरेको एक राप्रपाका एक नेता बताउँछन् ।

त्यसपछि लिङ्देन प्रचण्ड प्रधानमन्त्री बनाउन राष्ट्रपति कार्यलयलाई बुझाउने पत्रमा हस्ताक्षर गर्न पुगे । हतार हतारमा उनले कार्यसम्पादनको बैठक बोलाए । त्यहाँ पनि सरकारलाई समर्थन गर्नुको साथै राम्रो मन्त्रालय पाए सरकारमा जान सकिने बारे ब्रिफिङ गरे । दोस्रो दिन अथवा ११ गते सत्ता गठबन्धनको बैठक बालकोटमा बस्यो । त्यहाँ कसले के मन्त्रालय लिने भनेर छलफल भयो । त्यही बिहान माओवादी केन्द्रको पदाधिकारी बैठक पार्टी कार्यालय पेरिसडाँडामा बस्यो । उक्त बैठकले उपाध्यक्ष नारायणकाजी श्रेष्ठलाई उपप्रधानमन्त्रीसहित गृहमन्त्री बनाउने निर्णय गर्‍यो ।

बालकोटमा सत्ता गठबन्धनको बैठकमा रवि लामिछानेले पनि उपप्रधानमन्त्रीसहित गृहमा दाबी गरे । उनले आफूले उक्त मन्त्रालय नपाए सरकारमा सामेल नहुने बताए । त्यसपछि गठबन्धनमा उनलाई गृह मन्त्रालय दिने सहमति भयो । गृहमन्त्री बन्न झापाबाट जहाज चढेर आएका लिङ्देनको सपना बालकोटमै टुंगियो । जब कि उनले कालिका टावरमा पनि गृहमन्त्री बटमलाइन बनाएको बताइन्छ । तर, उनीभन्दा बढी सिट भएका लामिछानेले गृह मन्त्रालयमा दाबी मात्र गरेनन् कि नपाए सरकारमा सामेल नहुने र समर्थन पनि नदिने अडान राखेका थिए ।

पेरिसडाँडाबाट गृहमन्त्री हुने तयारीसाथ बालकोट पुगेका नारायणकाजीको पनि सपनामा तुहियो । त्यसपछि उनी परराष्ट्रमन्त्री हुने तयारीमा थिए । त्यो पनि नहुने भएपछि भौतिक पूर्वाधार तथा यातायातमन्त्री भए ।

पहिलो चरणमा गृह मन्त्रालय फुत्के पनि सरकारमा सहभागी हुनेबारे तयार रहेको ती नेता बताउँछन् । राप्रपाको केन्द्रीय कार्यसम्पादन समितिको बहुसंख्यक नेताले सरकारमा जानुपर्ने धारणा राखेका छन् । बुधबार पार्टी कार्यालयमा बसेको कार्य सम्पादनको बैठकमा बोल्ने अधिकांश नेताले सरकारमा जानुपर्ने धारणा राखेका एक नेताले बताए ।

यसअघि पदाधिकारी बैठकबाट सरकार गठनमा सहयोग गर्ने निर्णय गरेको राप्रपाले सरकारमा जाने नजाने विषयमा छलफल गर्न १३ गते कार्यसम्पादन समितिको बैठक बोलाएको थियो । कार्यसम्पादन समितिमा बहुमत सदस्यले सरकारमा सहभागी हुनुपर्ने मत राखेका छन् । राप्रपा नेता बुद्धिमान तामाङले गृह मन्त्रालय पाए सरकारमा जाने विषय खुलाएनन् । उनले सरकार बनाउन सहयाेग गर्ने निर्णय गरेकाे मात्रै बताए ।

संसदीय दलको नेता चुन्दा पनि राप्रपामा रोचक घटना भएको छ । राप्रपा नेताहरूको भनाइमा ५ पुसमा राप्रपाले संसदीय दलको नेता चयन गर्न बैठक बोलाएको थियो । बैठकबाट लिङ्देन सर्वसम्मत दलको नेता चयन भए । तर, दलको नेता हुने चाहना नाति जर्नेल पशुपति शमशेर राणाले पनि राखेको बताइन्छ । लिङ्देनले पार्टी चलाउने र संगठन निमार्ण गर्ने भनेकाले नाति जर्नेलले आफू संसदीय दलको नेता हुने योजना आफूनिकट नेताहरूलाई सुनाउने गरेको राप्रपाका एक नेताले बताए ।

एक नेताका अनुसार राणालाई दलको बैठक बस्ने समय पनि एक घण्टा पहिला मात्र थाहा दिइएको थियो । तर त्यो भन्दा पहिला नै लिङ्देनले आफू संसदीय दलको नेता चयन हुने गरी रणनीति बनाइसकेको पनि राप्रपामा चर्चाको विषय बनेको छ । राणालाई एक बजे दलको बैठक बस्दै छ भनेर १२ बजे जानकारी गराएको बताइन्छ । उनी दलको बैठकमा पुगेलगत्तै सांसद विक्रम पाण्डेले लिङ्देनलाई दलको नेतामा प्रस्ताव गरे ।

पाण्डेले प्रस्ताव गरेलगत्तै बुद्धिमान तामाङले समर्थन गरेको राप्रपाका एक नेताले बताए । पाण्डेको प्रस्ताव र तामाङको समर्थनपछि सांसदहरूले ताली बजाएर समर्थन गरे– लिङ्देनको पक्षमा । सा‌ंसद तामाङले स‌सदीय दलमा सर्वसम्मत निर्णय भएकाे र राणाकाे चाहनाबारे थाहा नभएकाे दाबी गरे । राप्रपाबाट प्रतिनिधिसभामा १४ जना सांसद छन् ।

प्रकाशित मिति: बिहीबार, पुस १४, २०७९ २१:३०