एमालेसँग एकता हुने र माधव नेपाल राष्ट्रपति बन्ने कुरा फेसबुके हल्ला हो: बेदुराम भुसाल (अन्तर्वार्ता)

एमालेसँग एकता हुने र माधव नेपाल राष्ट्रपति बन्ने कुरा फेसबुके हल्ला हो: बेदुराम भुसाल (अन्तर्वार्ता)

A+ A A-

नेपाली कांग्रेस नेतृत्वको पाँचदलीय गठबन्धन भत्किएर नयाँ सत्ता समीकरण बनेसँगै डेढ वर्षअघि विघटित नेकपाका विभिन्न घटकहरूमा नयाँ तरंग उत्पन्न भएको छ । एमाले–माओवादी दीर्घकालीन सहकार्यदेखि एमाले–नेकपा एसबीच एकताको चर्चाले राजनीति गर्माएको छ । एमाले अध्यक्ष केपी ओली र माओवादी केन्द्रका अध्यक्ष पुष्पकमल दाहाल प्रचण्डको बढ्दो उठबस र नेकपा एसका अध्यक्ष माधव नेपालसँग एमालेका दोस्रो तहका नेताहरूको बाक्लो भेटघाटले त्यसलाई बल पुर्‍याइरहेको छ ।

निराशाजनक चुनावी परिणाम र कांग्रेस नेतृत्वको गठबन्धन भत्किएपछि एक्लिएको नेकपा एस र एमालेबीच छिट्टै एकताको सम्भावना कति छ ? प्रचण्ड नेतृत्वको वर्तमान सरकारमा नेकपा एस सहभागी होला ? यी र यस्तै प्रश्न शिलापत्रले नेकपा एकीकृत समाजवादीका महासचिव बेदुराम भुसाललाई सोधेको छ । प्रस्तुत छ, उनीसँग गरिएको संक्षिप्त अन्तर्वार्ताको सम्पादित अंशः

पार्टी अध्यक्ष माधव नेपाल र एमाले नेताबीच तीव्र भेटघाट चलिरहेको छ । पार्टी एकता हुन लागेको हो ?

त्यस्तो सम्भावना तत्काल छैन । अहिले धेरै हल्ला चलेको छ । वास्तविकता के हो भने एकाध साथीहरूले त्यस्तो चाहना चाहना राख्नुभएको छ । एकता गरेर जान पाए हुन्थ्यो भन्ने प्रस्ताव लिएर हाम्रा अध्यक्षलाई भेटिरहनुभएको छ । तर, तत्काल त्यो सम्भावना देखिँँदैन । हामी एकीकृत समाजवादीलाई नै बलियो बनाएर जान्छौँ ।

पार्टी एकता गर्ने र माधव नेपाललाई राष्ट्रपति बनाउनेसम्मका चर्चा छन् ।

त्यसमा कुनै सत्यता छैन । एमालेका केही साथीहरूले अध्यक्ष कमरेडलाई भेट्नुभएको हो । त्यत्तिकै भरमा पार्टी एकता नै हुन लाग्यो भनेजसरी जे चर्चा भइरहेको छ, त्यो हैन । माधव नेपाललाई राष्ट्रपतिको अफर आएको पनि हैन । तत्कालै पार्टी एकता हुने कुनै सम्भावना म देख्दिनँ । यी सबै फेसबुके हल्ला मात्र हुन् ।

चुनावमा थ्रेसहोल्ड कटाउन सक्नुभएन । पुरानो गठबन्धन भत्कियो । नयाँ गठबन्धनमा तपाईंहरू छुट्नुभयो । यसले पार्टीमा चरम निराशाको स्थिति पैदा भएको टिकाटिप्पणी सुनिन्छ । त्यस्तै हो ?

यी सबै फेसबुके राजनीतिक टिकाटिप्पणी हुन् । एउटा चुनाव हार्दैमा हामी निराश छैनौँ । यहाँ सधैँ जितिरहेको कसले छ ? हिजो राप्रपाको एक सिट थियो, अहिले १४ छ ।

९ गते दिनभर त माधव नेपाल मात्र किन, प्रचण्ड पनि कांग्रेससँगकै गठबन्धनबाट सरकार बनाउने पोजिसमा हुनुहुन्थ्यो नि । नेताहरूले आलोपालो भने दुई/दुई र एक वर्षको भागवण्डा गरेका थिए । पहिले को हुने भन्नेमा मात्र विवाद हो । एमालेका साथीहरू त्यसरी आएका पनि हैनन् ।

२०६४ मा एमालेले हारेको हैन ? २०७० मा माओवादीको के हाल भएको थियो ? २०७४ मा कांग्रेसले हारेकै हो । लडिन्छ, धुलो टकटक्याउँदै उठिन्छ । राजनीतिमा हारजित त भइरहन्छ नि ।

निराश कार्यकर्ता पङ्क्तिको मनोबल बढाउन हिजो भर्चुअल बैठक गर्नुभयो । कस्तो मनस्थिति पाउनुभयो ?

पछिल्लो राजनीतिक घटनाक्रमबारे कार्यकर्ता पङ्क्तिलाई जानकारी गराउन हिजो भर्चुअल बैठक गरियो । आज गैरभूगोलका साथीहरूसँग अर्को बैठक छ । सरकारमा जाने वा नजाने ? अब कसरी अघि बढ्ने भनेर हामी कार्यकर्ताको राय मागिरहेका छौँ ।

कार्यकर्ताबाट कस्तो सुझाव पाउनुभयो त ?

अध्यक्ष कमरेडले पछिल्लो राजनीतिक वस्तुस्थितिबारे जानकारी गराउनुभयो । कार्यकर्ताले सरकारमा जान नहतारिन भनेका छन् । पार्टी एकता वा नयाँ गठबन्धनमा सामेल हुन पनि हतारिनु हुन्न भन्ने राय पाएका छौँ ।

भनेको एकीकृत समाजवादीले माओवादी नेतृत्वको यो सरकारलाई समर्थन गर्दैन ?

भर्खर त सरकार बनेको छ । सरकार बनाउने बेलै सामेल नभएकाले हामीलाई हतारो छैन । हेरौँ न, सरकार कसरी जान्छ भन्ने पनि त क्लियर भएको छैन । के कस्तो नीति योजना लिएर आउँछ, त्यो हेरेर विश्वासको मत लिने बेलासम्म निर्णय गर्छौं ।

एकीकृत समाजवादी र माओवादी पार्टी एकताकै बाटोमा थिए । नयाँ समीकरणले यी दुई पार्टीको दूरी बढाएको हो ?

एकताको कुरा पनि माओवादीका साथीहरूले चलाएको हल्ला मात्र थियो । त्यस्तो कुनै तयारी थिएन ।

पार्टी एकताका लागि संयोजन समिति नै बनाएको हैन र ?

होइन । निर्णयमा पार्टी एकता संयोजन समिति बनाउन सकिन्छ भनिएको हो । शब्दै त्यही हो । यसलाई माओवादीका साथीहरूले अलि धेरै नै हल्ला गरे ।

९ पुसमा एमालेले प्रस्ताव गर्दा माधव नेपालले मान्नुभएन । १० गते प्रचण्डले नेपाललाई बालुवाटारमै छाडेर एक्लै बालकोट गएर नयाँ समीकरण बनाए । त्यसले अध्यक्ष नेपाल प्रचण्डसँग रिसाउनुभएको हो ?

यो पनि अर्को मिडिया हल्ला हो । ९ गते दिनभर त माधव नेपाल मात्र किन, प्रचण्ड पनि कांग्रेससँगकै गठबन्धनबाट सरकार बनाउने पोजिसमा हुनुहुन्थ्यो नि । नेताहरूले आलोपालो भने दुई/दुई र एक वर्षको भागवण्डा गरेका थिए । पहिले को हुने भन्नेमा मात्र विवाद हो । एमालेका साथीहरू त्यसरी आएका पनि हैनन् ।

प्रधानमन्त्री प्रचण्ड र माधव नेपालबीच हिजोको भेटमा के कुरा भयो ?

प्रचण्डले शपथग्रहणकै दिनदेखि भेट्न खोजिराख्नुभएको थियो । हिजो दुई नेताबीच भेट भयो । हतारमा धेरै सल्लाह हुन पाएन भन्नुभयो । सरकारलाई समर्थन माग्नुभयो । सरकारमा सहभागी हुन भन्नुभयो । नारायणकाजी श्रेष्ठले पनि कोटेश्वरमै गएर अध्यक्षलाई भेटेर त्यस्तै प्रस्ताव राख्नुभयो । हाम्रा अध्यक्षले पार्टी बैठकबाट निर्णय लिने बताएर पठाउनुभयो ।

प्रकाशित मिति: बिहीबार, पुस १४, २०७९ १६:४०