प्रकृतिकाे काखमा सिर्जनाकाे छुनुमुनु (भिडियाेसहित)

A+ A A-

सोसल मिडियामा अचेल निकै रुचाइएकी छिन् सिर्जना वली उर्फ सिर्जना सिज्जु (२४) । नरुचाइऊन् पनि किन, उनले हामीलाई सित्तैमा केही चिजहरू जो दिइरहेकी छिन् । हिजोआज सित्तैमा दिने मान्छे पाउनु चानचुने कुरा पनि त हाेइन ।

उनले हामीलाई बिरलै मान्छे पुगेका ठाउँहरू देखाएकी छन् । उनले हामीलाई दूरदराजका मौलिक नेपाली जनजीवन देखाएकी छन् । उनले हामीलाई कुनाकन्दराका अनुपम प्राकृतिक सुन्दरता देखाएकी छन् । उनले हामीलाई टीठलाग्दो होइन, रहरलाग्दो कर्णाली देखाएकी छन् ।

उनले हामीलाई हामीसँग टाढिँदै गएका झरना, खोलानाला, हिमाल, पहाडसँग भेटाइदिएकी छन् । हामीले भुल्दै गएका मौलिक शैली, संस्कृति र रीतिरिवाजलाई सम्झाइदिएकी छन् । हामीले गुमाउँदै गएको स्वच्छ, निश्चल हावापानीसँग साक्षात्कार गराइदिएकी छन् । छोरीलाई लिएर समाजमा व्याप्त धारणा एक हदसम्म बदलिदिएकी छन् । समग्रमा भनाैँ, उनी प्रकृति र मानिसलाई आपसमा नजिक्याउन उद्यत छिन् ।

आफूले देख्न छुटाएका वा नपाएका, छुटिगएका चिज देखाउनु पनि त केही चिज दिनु नै हो नि ! हाेइन, धेरै चिज दिनुभन्दा धेरै नै हाे ।

यायाबरजस्तै बनेर सिर्जनाले कर्णालीको फन्को मारेको झण्डै तीन वर्ष भयो, त्याे पनि एक्लै । त्यसैले त अक्सर मानिसहरू उनलाई भन्ने गर्छन्- कति साहसिली, कति निर्भयी, कति स्वतन्त्र, कति बिन्दास आहा ! देख्नेहरूले उनलाई अर्कै परिचय पनि दिएका छन्, सोलो ट्राभलर । हाे, आज तपाईंले चाहे युट्युब हेर्नुहोस् वा टिकटक, फेसबुक, कतै न कतै साेलाे ट्राभलर सिर्जनाले देखाएको प्राकृतिक सुन्दरताको साक्षी तपाईं बन्नुभएको हुनुपर्छ ।

'कर्णाली भन्नासाथै अक्सर गरिबी र दुःखका दृश्य देखाइन्छ तर उहाँले कर्णालीका सुन्दर पक्ष देखाइरहनुभएको छ । हिडन डेस्टिनेसनहरूमा हामीलाई डिजिटल्ली घुमाइरहनुभएकाे छ', वाइल्डलाइफ फोटोग्राफर चुङ्बा शेर्पा भन्छन्, 'टिन एजरदेखि ज्येष्ठ मानिससम्मको ध्यान तान्नसक्ने खुबी चानचुने हाेइन ।'

चुङ्बा शेर्पा मात्र हाेइन, अचेल उनकाे कामलाई मन पराउने र तारिफ गर्नेहरूको संख्या बढ्दाे छ । नबढून पनि किन, उनले हामीलाई सित्तैमा केही चिजहरू जो दिइरहेकी छिन् । घुमफिरमा उनको लगाव यति धेरै छ कि, स्नातक तहको अन्तिम परीक्षा दिनुभन्दा साता दिनअघि मात्र उनी खुमई ट्रेक सकेर काठमाडौं आएकी थिइन् । र, परीक्षा सकिनासाथै उनले कुनै नयाँ गन्तव्यका लागि झाेला कस्नेछिन् ।

खासमा सिर्जनाले चाहेको जस्तो भएको भए अहिले उनको परिचय अर्कै हुन्थ्यो- शायद सरकारी जागिरे । वन विज्ञान पढिरहेकी उनी राष्ट्रिय निकुञ्जमा काम गरेर बस्न चाहन्थिन् । तर दुईपल्ट लोकसेवा परीक्षामा फेल भइन् । त्यही असफलताले सिर्जनाका लागि अर्कै बाटो सृजना गरिदियो ।

रुकुम पश्चिमको सानीभेरी गाउँपालिका- ११ अर्मा गाउँमा छ उनकाे घर । समुद्री सतहबाट करिब १६ सय उचाइमा रहेको अर्मा गाउँ जंगलनजिकै पर्छ । सानैदेखि जंगल, खोला-नाला चहार्दै हुर्केकी सिर्जनाले सोही गाउँकाे विद्यालयबाट एसएलसी गरिन् । सहपाठीहरूले अक्सर धेरैले छान्ने विषयहरू नै छाने । तर पहिल्यैदेखि जिज्ञासु स्वभावकी सिर्जना फरक काम गर्नुपर्छ भन्ने सोच राख्थिन् । त्यसैले उनले वनविज्ञान पढ्ने निधो गरिन् । र, काठमाडौं आएर सीटीईभीटीमा डिप्लोमामा भर्ना भइन् ।

यो कदमले उनलाई प्रकृतिसँग थप नजिक्याएन मात्रै, यसबारे थप बुझ्न सहयाेगी बन्याे । डिप्लोमापछि निकुञ्जतिर जागिर गर्दै थप अध्ययन गर्ने योजना थियो उनको । तर सबै आफूले चाहेजस्तो हुने भए यो संसार कहाँ यस्तो हुन्थ्यो र ! दुईपटक लोकसेवाको लिखित परीक्षामा नाम निस्किएर मौखिक (अन्तर्वार्ता) मा फेल भइन् । यही नै उनको जीवनको टर्निङ प्वाइन्ट पनि थियो । यसपछि उनले लोकसेवाको प्रयास तत्काललाई छोडिदिइन् । वनविज्ञानमै स्नातक भर्ना भएकी उनी फुर्सदकाे समयमा घुम्न थालिन् ।

कोभिडकालमा पहिलोपल्ट उनी साथीहरूसित अपर डोल्पा घुम्न हिँडेकी थिइन् । डुल्न त त्यसअघि नडुलेकी होइनन् तर पहिलोपल्ट उनलाई आफू यात्रुजस्तो लाग्यो रे ! भन्छिन्, 'त्याे यात्रा खास लाग्याे । म यात्रु हुँजस्ताे महसुस भयाे ।' साेही यात्राबारे सिर्जनाले शिलापत्रमै लामाे यात्रानुभूति पनि लेखेकी थिइन् ।

तीन वर्षको अवधिमा आफूले कर्णालीका ६ वटा नदेखिएका गन्तव्य देखाइसकेको उनी बताउँछिन् । 'परीक्षापछि थप नयाँ गन्तव्यहरू देखाउने छु', उनले भनिन् ।

घुम्ने मात्र भएको भए उनीबारे अहिलेजति मानिसले शायदै थाहा पाउँथे । फोटो र भिडियो लिनुका साथै नयाँ-नयाँ ठाउँका स्थानीय मानिसहरूसँग कुराकानी पनि गर्छिन् उनी । ती मान्छेकाे जीवनशैली र कलासंस्कृतिबारे बोलाउँछिन् । यसले उनको यात्रातिर धेरैको ध्यानाकर्षण गराउँछ । उनको यात्रालाई लोभलाग्दो र रहरलाग्दो बनाउँछ ।

उनलाई देखेर धेरै मान्छे अचम्ममा पर्छन् रे- सोलो ट्राभलर, त्यो पनि एक महिला, कसरी सक्छिन् होला ?

यस्तो प्रश्न गर्नेलाई उनी भन्ने गर्छिन्, 'सकारात्मक सोच राखेर निस्कनुपर्छ । डराउन थाल्यो भने एक पाइला अघि सार्न सकिन्न ।'

अहिलेसम्म आफूले यात्राका क्रममा हुने थकान र आफ्नै कतिपय कमजोरीबाहेक अन्य खाले समस्याको सामना गर्नु नपरेको उनले बताइन् ।

उनले अर्को प्रश्न पनि अक्सर सुन्नुपर्छ- यसरी डुल्न पैसा कसरी आउँछ ?

यो प्रश्नको उनीसित रेडिमेट जवाफ छ, 'आफ्नो फजुल खर्च कटौती गरिहेर्नुस् त, तपाईं पूरै नेपाल घुम्न सक्नुहुन्छ । मितव्ययी मान्छेलाई नेपालमा घुम्न निकै सस्तो हुने सिर्जनाको अनुभव छ ।

सोलो ट्राभलर अर्थात एक्लै हिँड्ने यात्रु तर अनकन्टार ठाउँमा पनि उनीसहितको फोटो र भिडियोचाहिँ कसले खिचिदिन्छ होला ?

यसपछाडिको दृश्यबारे उनी डकुमेन्ट्री नै बनाउने योजनामा छिन् । भन्छिन, 'म एक्लै हिँडे पनि ठाउँहरू, गाउँहरू, बाटो अनि गोरेटोहरू रित्तै हुन्छन् भन्ने हुँदैन । कतै न कतै कोही न कोही भेटिन्छ । अर्को कुरा, म आफैँ पनि खिच्छु । बिहाइन्ड द सिन म डकुमेन्ट्री नै बनाउने सोचमा छु ।'

समय व्यवस्थापनको प्रश्नबारे सिर्जना भन्छिन्, 'यो हाम्रै हातमा भएको कुरा हो । तपाईंले घुम्न चाहनुभयो भने नमिल्ने र नहुने भन्ने कुरै हुँदैन ।'

सुरुसुरुमा यसरी हप्तौँसम्म घुम्न निस्कन उनलाई परिवारको मञ्जुरी पाउन गाह्रो थियो । गाउँलेले अनेक कुरा सुनाइदिन्थे । तर अचेल बिस्तारै उनलाई परिवारले बुझ्न थालेको छ । भन्छिन्, 'म कहिल्यै आफ्नो परिवारलाई ढाँट्दिनँ । त्यसैले पनि होला, मेरो कदममा उहाँहरूको साथ रहने गर्छ ।

दिनहुँको भागदौड, व्यस्तताबाट केही समय निकालेर प्रकृतिसँग नजिक हुन उनी सुझाउँछिन् । घुमेर फर्केको मान्छेले आफ्नो कामको प्रदर्शनमा पनि सुधार ल्याउन सक्ने उनको दाबी छ । उनका अनुसार सोलो ट्राभल गर्न जति सास्ती छ, त्योभन्दा धेरै गुणा यसमा रोमाञ्चकता छ ।

नेपालका अग्ला हिमालहरू चढ्ने सिर्जनाकाे सपना छ । भन्छिन्, 'थाहा छैन कसरी पूरा हुन्छ तर सगरमाथासहितका नेपाली हिमाल चढ्ने सपना छ ।'

प्रकृतिसँग कुराकानी

प्रकृतिमा छुट्टै खालको आनन्द हुनेगरेको सिर्जनाकाे अनुभव छ । उनका अनुसार, प्रकृतिको बाँच्ने तरिका आफ्नै खालको छ । मान्छेको आफ्नै खालको छ । हामीले प्रकृतिलाई बुझ्न सक्यौँ भने यसबाट आनन्द लिन सक्छाैँ । भन्छिन्, 'प्रकृतिले सबैलाई सबै चिज दिन सक्छ । घुमन्तेलाई दृश्य, कविलाई कविता, गीतकारलाई गीत इत्यादि । कहिलेकाहीँ सोच्छु क्या, नवराज पराजुली दाइ त्यो शान्त प्रकृतिमा केहीबेर टहलिनुभयो भने उहाँले कति दमदार कविताको रचना गर्नुहुन्थ्यो होला ! उहाँजस्तै सिर्जनशील जोकोही त्यसरी टहलियो भने कति धेरै कुरा लिएर फर्किन्छ होला !'

प्रकृतिमा रमाउने मानिस पनि सिर्जनशील हुने उनी बताउँछिन् । 'त्यसैले त म भन्छु, तपाईंहरू पनि घुम्न निस्कनुस् अनि मात्र थाहा पाउनुहुन्छ, अहिले तपाईंले गरिरहेको काम र घुमेर फर्केपछिको कामको नतिजामा कति फरक पर्छ ।'

सिर्जनाको काम मन पराएर टिकटकमा उनलाई झण्डै डेढ लाखले फलो गरेका छन् । युट्युबमा पनि उनका ६६ हजारजति सब्स्क्राइबर भइसकेका छन् ।

अझ विस्तृतमा सिर्जनासँग हामीले भिडियाेमा कुराकानी गरेका छाैँ, जहाँ उनले साेलाे ट्राभलकाे आइडिया, टिप्सदेखि विभिन्न हरभरा ठाउँबारे बताएकी छन् ।

हेर्नुहोस् भिडियो :