मधेस प्रदेश सरकारको नेतृत्व जसपाले पाउने सम्भावना

A+ A A-

केन्द्रमा कांग्रेससहितका दलको गठबन्धन टुटेसँगै मधेस प्रदेशमा सत्ता समीकरण फेरिएको छ । सत्तारुढ गठबन्धनबाट अलग भएर माओवादी केन्द्रका अध्यक्ष पुष्पकमल दाहाल प्रचण्ड नेकपा एमालेसहितको सहयोगमा प्रधानमन्त्री बनेपछि मधेस प्रदेशको सत्ता समीकरण फेरिएको हो ।

मधेस प्रदेशमा दोस्रो दल रहेकाे नेपाली कांग्रेसले जनमत वा जसपालाई लिएर मधेसमा सरकार बनाउने तयारी गरिरहेकाे थियाे । तर जसपा र जनमत पार्टी एमालेसहितको गठबन्धनमा जोडिएपछि कांग्रेस सत्ताकाे खेलबाट आउट हुन पुगेको हो । पार्टी सत्ताको खेलबाट आउट भएसँगै कांग्रेसका मधेस प्रदेश सभापति कृष्ण यादवको तत्काल मुख्यमन्त्री बन्ने सपना पूरा नहुने भएको छ ।

केन्द्रमा माओवादी र एमालेले आलोपालो सरकार बनाउने समहति गरे पनि मधेस प्रदेशमा एमाले र जसपाले आलोपालो सरकार बनाउने मोटामोटी सहमति गरेकाे माओवादीका एक नेताले बताए । यद्यपि प्रदेश सरकारको नेतृत्व पहिला एमाले वा जसपामध्ये कसले गर्ने विषयमा अहिले टुंगो नलागेको उनले बताए ।

प्रदेशमा नेकपा एमाले २३ सिट ल्याएर सबभन्दा ठूलो पार्टी बनेको छ भने क्रमश: कांग्रेसले २२, जसपाले १६, जनमत १३, लोसपा ९, माओवादी ८, नेकपा एकीकृत समाजवादी ७, नेपाल संघीय समाजवादी पार्टी, राप्रपा र नागरिक उन्मुक्ति पार्टीकाे एक/एक सिट रहेको छ । प्रदेशमा ६ जना स्वतन्त्र सांसद रहेका छन् ।

मधेस प्रदेशमा १०७ सिट रहेको छ । सरकार बनाउन ५४ मत आवश्यक हुन्छ । संघीय सरकार गठनमा भएको सात दलीय समीकरणको हिसावले एमालेसहितको गठबन्धनको ६२ सिट पुग्छ । अर्थात् मधेस प्रदेशमा सात दलीय गठबन्धनको बलियो सरकार निर्माण हुन्छ ।

नेकपा एमालेका सचिव तथा मधेस प्रदेश इन्चार्ज रघुविर महासेठले केन्द्रमा सरकार बने पनि प्रदेशको विषयमा अहिले कुनै टुंगो नलागेको बताए । प्रदेशहरूमा सरकार निर्माणको विषयमा समान्य छलफल भएको बताउँदै सचिव महासेठले भने, ‘प्रदेश सरकारहरूको विषयमा छलफल नभएको होइन । तर अहिलेसम्म कुन प्रदेश कसलाई दिने विषयामा टुंगो लागेको छैन ।’ उनले एमालेले ४ र माओवादीले ३ प्रदेश लिने विषयमा समान्य छलफल भएको जानकारी दिए । सचिव महासेठले भने,‘ तर जसपा पनि गठबन्धनमा रहेकोले मधेस प्रदेशमा जसपालाई पनि दिन सकिन्छ । तर यसको टुंगो लाग्न बाँकी नै छ ।’

एमालेकाे प्रदेश नम्बर १, लुम्बिनी र गण्डकीसहित थप एक प्रदेशमा दाबी रहेको उनले बताए । अध्यक्ष प्रचण्डले मधेस प्रदेशको नेतृत्व जसपाले पाउने आश्वासन दिएपछि जसपा अध्यक्ष सात दलीय गठबन्धनमा जोडिएको माओवादीका एक नेताले बताए ।

प्रकाशित मिति: आइतबार, पुस १०, २०७९ २०:३९