मुख्यमन्त्रीको कुर्सी नजिक खगराज, तर माओवादी भन्छ – योपटक छोड्दैनौँ

A+ A A-

केन्द्रमा राजनीतिक समीकरण बदलिएसँगै प्रदेशमा पनि अब फरक परिदृश्य सिर्जित हुने पक्का छ । माओवादी केन्द्रलाई नेकपा एमालेले साथमा लिँदा कांग्रेसलाई संघसहित प्रदेशहरूमा पनि धक्का लागेको छ ।

माओवादीले साथ छोडेसँगै गण्डकी प्रदेशमा पनि अब कांग्रेस प्रतिपक्षीमा बस्ने पक्का भएको छ । प्रदेशसभामा कांग्रेसका २७, एमालेका २२, माओवादीका ८, राप्रपाका २ र स्वतन्त्रबाट निर्वाचित प्रवेश गरेसँगै एकीकृत समाजवादीको एक जना सांसद छन् । पार्टी प्रवेश गरेको भनेर स्वतन्त्र निर्वाचित राजीव गुुरुङले संसदमा जानकारी भने गराइसकेका छैनन् ।

एमालेको २२ र माओवादीको ८ गरेर ३० सांसद हुन्छन् । राप्रपाले पनि प्रचण्डलाई समर्थन गरेकाले प्रदेशमा एमाले, माओवादी र राप्रपा एक ठाउँ हुने निश्चित छ । त्यसो हुँदा प्रदेशमा ३२ सांसद एक ठाउँ हुन्छन् जुन बहुमत हो । ६० सदस्यीय गण्डकी प्रदेशसभामा बहुमत पुग्न ३१ सांसद चाहिन्छ ।

प्रदेशमा एमाले र माओवादीमध्ये कसको सरकार बन्छ ? दुवै दलका नेताहरुको आ–आफ्नै दाबी छ । एमालेबाट संगठन विभाग प्रमुख खगराज अधिकारी र माओवादीबाट हरिबहादुर चुमान मुख्यमन्त्रीका दाबेदार हुन् ।

प्रदेश भाग लगाउँदा गण्डकीमा एमालेले नछोड्ने सम्भावना अधिक छ । किनकि गण्डकी अध्यक्ष केपी ओलीको रोजाइँमात्रै होइन, एमालेको राम्रो पकड भएको प्रदेश हो । त्यसमाथि महासचिव शंकर पोखरेलनिकट भएकाले खगराजलाई मुख्यमन्त्री बनाउन उनको पनि जोडबल रहन्छ ।

खगराज आइतबार सर्वसम्मत संसदीय दलको नेता बनेका छन् । उनले दलको नेता बनेपछि पत्रकारसँग कुरा गर्दै एमालेको सरकार बन्ने भएकाले अन्य प्रश्न आवश्यक नरहेको प्रतिक्रिया दिए । ‘शपथ खाइसकेका छैनौँ । नेतृत्व लिन नेकपा एमाले सक्षम छ । गण्डकीमा नेकपा एमालेको सरकार हुनु स्वाभाविक हो । बन्दैन भन्ने प्रश्न गर्नु आवश्यक छैन,’ उनले भने ।

मुख्यमन्त्री बन्ने अभिलाषासहित प्रदेश झरेका खगराज निर्वाचनको नतिजाअनुसार प्रतिपक्षमा बस्नुपर्ने अवस्थामा थिए । राजनीतिक समीकरण फेरिँदा प्रतिपक्षबाट उनी मुख्यमन्त्रीको कुसी नजिक पुगेका छन् । अब संघमा दलीय भागबण्डामा एमालेले गण्डकी प्रदेश पाउँदा उनी मुख्यमन्त्री बन्ने छन् ।

२०७४ सालमा तत्कालीन वाम गठबन्धन हुँदा एमालेका पृथ्वीसुब्बा गुरुङ मुख्यमन्त्री बनेका थिए । त्यतिबेला कानुनमन्त्री बनेका चुमान अहिले आफूहरूलाई नेतृत्व छोड्नुपर्ने बताउँछन् । ‘अघिल्लो गठबन्धन हुँदा पनि दाबी थियो । अर्को गठबन्धन हुँदा पनि दाबी हुनु स्वाभाविक हो । उहाँहरूको पालो लिइसक्नु भयो । अब हाम्रो पालो हो,’ काठमाडौं रहेका चुमानले शिलापत्रसँग फोन कुराकानीमा भने ।

प्रदेशमा एमालेले मुख्यमन्त्री लिएपछि त्यसपछिको ठूलो मन्त्रालय माओवादीले पाउने सम्भावना धेरै छ । माओवादीबाट चुमान मन्त्री हुनेमध्ये पहिलो नम्बरमा हुनेछन् । यसअघि नै कानुन मन्त्री भइसकेकाले उनको दाबी हेभिवेट मन्त्रालयमा रहने छ । एमालेले सरकार पाउँदा प्रदेश सभा सभामुख माओवादीले पाउने सम्भावना रहन्छ । २०७४ सालमा वाम गठबन्धन हुँदा पृथ्वीसुब्बा मुख्यमन्त्री र माओवादीका नेत्रनाथ अधिकारी सभामुख थिए ।

गण्डकी प्रदेशमा अहिले १२ वटा मन्त्रालय छन् । एमालेबाट यसअघि प्रदेश सांसद भइसकेका नेताहरू मन्त्रालय घटाएर भागबण्डा मिलाउनुपर्ने पक्षमा छन् ।

गण्डकी प्रदेशका नवनिर्वाचित सांसदहरूको शपथ १४ पुसमा हुँदैछ । त्यसपछि सरकार गठनको प्रक्रिया अघि बढ्ने छ । पुस महिनाभित्रै प्रदेशमा नयाँ सरकार बन्ने छ ।

प्रकाशित मिति: आइतबार, पुस १०, २०७९ २०:३५