एक वर्षअघिसम्म देउवाबाट पार्टी पनि चल्दैन भन्ने प्रकाशमान अहिले प्रधानमन्त्री बनाउन दूत बनेर सघाउँदैछन्

एक वर्षअघिसम्म देउवाबाट पार्टी पनि चल्दैन भन्ने प्रकाशमान अहिले प्रधानमन्त्री बनाउन दूत बनेर सघाउँदैछन्

A+ A A-

१४ औँ महाधिवेशनमा सभापतिको आकांक्षी रहेका कांग्रेस नेता प्रकाशमान सिंहले शेरबहादुर देउवाबाट पार्टी र देश नचल्ने बताउँथे । तर, जब महाधिवेशनमा सभापितकाे उम्मेदवारी दर्ता गर्ने बेला भयाे तत्कालीन देउवा इतर समूहलाई भत्काएर उनी आफू पनि उम्मेदवार बने । दोस्रो चरणको चुनावमा तर देउवालाई सघाउ नै पुगे ।

छुट्टै प्यानल बनाएर मैदानमा आएका उनी प्यानलै देउवा प्यानलमा विलय गराए । अहिले संसदीय दलकाे चुनावमा पनि सिंहले देउवालाई खुलेरै सघाए । उनको प्यानलबाट महामन्त्रीमा निर्वाचित विश्वप्रकाश शर्मा भने गगन थापाकाे पक्षमा उभिए ।

सिंह देउवाका पुराना सारथी हुन् । पार्टी विभाजनको समयमा पनि उनले देउवासँगै कांग्रेस प्रजातान्त्रिकमा रहेर काम गरे । देउवालाई साथ दिएर राजनीति गर्दै आएका उनी पार्टीकाे ११औँ महाधिवेशनमा भने देउवालाई छाेडेर काेइराला समूहमा आएका थिए । जहाँबाट उनी विमलेन्द्र निधिलाई पराजित गर्दै महामन्त्री निर्वाचित पनि भए ।

तर अहिले फेरि देउवा र सिंहकाे केमेस्ट्री मिल्न थालेकाे छ । उनी देउवालाई छैटौंपटक प्रधानमन्त्री बनाउन लागिपरेका छन् । ४ मंसिरको संघीय चुनावको नतिजा आएलगत्तै माओवादी अध्यक्ष पुष्पकमल दाहाल प्रचण्ड, एमाले अध्यक्ष केपीशर्मा ओली भेट्न पुगेका थिए सिंह । बधाई दिन औपचारिक भेटघाट भनिए पनि त्यसको राजनीतिक अर्थ थियो ।

शुक्रबार सिंहले नेकपा माओवादी अध्यक्ष पुष्पकमल दाहाल प्रचण्डलाई भेटेर नयाँ सरकार गठनलगायत समसामयिक राजनीतिक घटनाक्रमबारे कुराकानी गरे । उनले प्रतिनिधिसभामा नेपाली कांग्रेस सबैभन्दा ठूलो दल (८९ सांसद) रहेकोले सभापति शेरबहादुर देउवाकै नेतृत्वमा नयाँ सरकार बनाउन सहयोग गर्न प्रचण्डलाई आग्रह गरे ।

सिंहले भने, ‘सभापति देउवाकै नेतृत्वमा फेरि सरकार बनाऔं, पावर सेयरिङबारे छलफल गरी समझदारी गरौँला ।’ जवाफमा प्रचण्डले भने यसपाली आफ्नाे नेतृत्वमा नयाँ सरकार बनाउन कांग्रेसले सहयोग गर्नुपर्ने बताए । ‘यसपाली मेरो नेतृत्वमा जाऔँ, कांग्रेस पनि सकारात्मक होस्,’ उनले भनेका थिए।

प्रचण्डसँग कुराकानी गरेलगत्तै सिंहले बालुवाटार पुगेर प्रधानमन्त्री देउवालाई भेटबारे ब्रिफ गरे । सिंहको सक्रियता देउवालाई सघाउनेमा अगाडि छ ।

पुस ६ गते कांग्रेस संसदीय दलको नेतामा देउवालाई निर्वाचित गराउन सिंहले महत्वपूर्ण भूमिका खेले । उनले इतर समूहका सांसदहरूलाई देउवा पत्नि आरजु राणसँगै एकपछि अर्को फोन गरेका थिए ।

प्रकाशित मिति: शुक्रबार, पुस ८, २०७९ १६:४८