बाक्लो हुस्सुसँगै शितलहर सुरू भएपछि मधेसमा जनजीवन कष्टकर

A+ A A-

दुई दिनदेखि बाक्लो कुहिरोसँगै शितलहर सुरु भएपछि मधेस प्रदेशको जनजीवन प्रभावित भएको छ । बाक्लो हुस्सु, शितलहरसँगै चलेको हावाले तापक्रम निकै घटेको छ ।

जल तथा मौसम विज्ञान विभागका अनुसार अहिले जनकपुरधामको अधिकतम तापक्रम १५ डिग्री सेल्सिएससम्म रहेको छ । चिसोका कारण बजारमा सर्वसधारणको चलहपहल घटेको छ भने दैनिक कार्यसमेत प्रभावित भएको छ । पश्चिमबाट चल्ने चिसो हावाका कारण विपन्न तथा खुला अकाशमूनि काम गर्नेहरु मजदुरहरु कठ्याङ्गग्रिएका छन् ।

हुस्सुका कारण जनकपुरधाम–काठमाडौँ हवाई सेवासमेत प्रभावित हुँदै आएको छ । बिहानैदेखि लाग्ने बाक्लो हुस्सुको कारण बिहीबार जनकपुर– काठमाडौं हवाई सेवा प्रभावित भएको छ । भिजिवलिटी कम भई हवाई सेवा रोकिएको जनकपुर विमानस्थलका टावर इन्चार्ज भिमदत्त पन्तले जानकारी दिए ।

‘हवाई उडानका लागि कम्तिमा १७ सय मिटर भिजिविलिटी आवश्यक हुन्छ’, उनले भने, ‘अहिले हाम्रो जनकपुर एयरपोर्टको भिजिविलिटी ३ सय मिटर मात्रै रहेको छ । त्यसकारण हवाई सेवा पूर्ण रुपमा अवरुद्ध गरिएको हो ।’ नकपुरधाम–काठमाडौं दैनिक ७ वटा उडान हुँदै आएका थिए ।

त्यसैगरी, चिसोको कारण जनकपुरबाट चल्ने लामो तथा सानो रुटको सार्वजनिक यतायात सेवा पनि प्रभावित भएको छ । चिसोको कारण यात्रुहरुको संख्यामा व्यापक कमी आएको छ ।

यता, चिसो बढेपछि जनकपुरधामसहित ग्रामीण क्षेत्रमा आगो बालेर जिउ तताउनेहरूको संख्यामा वृद्धि भएको छ । आगो ताप्ने क्रममा सर्लाहीको हरिवन नगरपालिका ३ बस्ने टिकाराम रखालकी ५५ वर्षीया श्रीमती गोरीमाया रखालको जलेर मृत्यु भएको छ । बिहीबर आगो ताप्ने क्रममा गोरीमायाले लगाएको साडीमा आगो सल्किएको थियो ।

यसैगरी, चिसो बढेका कारणले विभिन्न अस्पतालहरूमा उपचारका लागि आउने बिरामीको संख्यामा वृद्धि भएको मधेस स्वास्थ्य विज्ञान प्रतिष्ठान अन्तर्गत रहेका प्रादेशिक अस्पतालका सहायक निर्देशक केडी दासले बताए । उनले अस्पतालमा निमुनिया, दम, टाउको दुख्ने लगायतका समस्याका बिरामीको संख्या बढेको बताए ।

्यता, मधेस प्रदेश सरकारले चिसो याममा हुने विपदुबाट हुन सक्ने जोखिम नियन्त्रणका गर्न जिल्ला प्रशासन कार्यालयहरुलाई स्थानीय तहहरुसँग समन्वय गरी आवश्यक पहल गर्न निर्देशन दिएको छ । साथै दिउँसै लाग्ने बाक्लो हुस्सुको कारण हाइवेमा सवारी दुर्घटना हुने भएकोले त्यसलाई नियन्त्रण गर्न प्रदेश प्रहरी कार्यालयलाई समेत निर्देशन दिएको मधेस प्रदेशका गृह तथा संचार मन्त्री भरत प्रसाद साहले जानकारी दिए ।

चिसोबाट प्रभावित गरिव विपन्न परिवारलाई कम्बलसहितका समाग्री प्रदेश सरकारले जिल्ला विपद् व्यवस्थापन समितिसँग समन्वय गरेर वितरण गर्ने तयारी गरिरहेको मन्त्री साहले बताए ।

प्रकाशित मिति: शुक्रबार, पुस ८, २०७९ १५:४९