थप असहज अवस्था आउने भन्दै निजीक्षेत्र त्रसित, राष्ट्र बैंक भन्छ- सहज अवस्थातर्फ जाँदैछौँ

थप असहज अवस्था आउने भन्दै निजीक्षेत्र त्रसित, राष्ट्र बैंक भन्छ- सहज अवस्थातर्फ जाँदैछौँ

A+ A A-

लामो समयदेखि विभिन्न अवरोध खेप्दै आएको निजीक्षेत्रले अर्थतन्त्र थप मन्दीतर्फ उन्मुख भएको निचोड निकाल्दै सरकारवालाहरूको ध्यानाकर्षण गराएको छ ।

नेपाल उद्योग वाणिज्य महासंघका उपाध्यक्ष अञ्जन श्रेष्ठ सरकार र राष्ट्र बैंकले नियन्त्रणको नीति लिएर सन्तुलन हुने बाटो खोजेको भन्दै यसले अर्थतन्त्रमा दुर्घटना निम्त्याउने बताउँछन् ।

होटल संघ नेपालकी अध्यक्ष सिर्जना राणाले विगतमा जस्तै अर्थतन्त्र जोगाउनका लागि राहतको प्याकेज आवश्‍यक भए पनि सरकारले त्यसो नगरी अहिले नयाँ नीति अवलम्बन गर्न केन्द्रित भएको गुनासो गरिन् ।

नेपाल राष्ट्र बैंकका कार्यकारी निर्देशक डा. गुणाकर भट्टले अर्थतन्त्रको सन्तुलन कायम गर्न र अर्थतन्त्रलाई दुर्घटनाबाट जोगाउनका लागि राष्ट्र बैंकले सोही समयमा उपयुक्त नीति लिँदै आएको भन्दै अहिलेको संकट पनि टारेको दाबी गरे ।

भुक्तानी सन्तुलनमा दबाब देखिन थालेपछि राष्ट्र बैंकले आयात निरुत्साहित गर्ने नीति लिएको, अहिले भुक्तानी सन्तुलनमा आएको तथा तरलताको समस्या पनि समाधान भएको भन्दै उनले अहिले देखिएका चुनौतीका लागि पनि समाधानमुखी बाटो अवलम्बन गरिएको बताए । अहिले बढेको ब्याजदर र लगानीयोग्य रकमको अभाव आगामी माघदेखि कम हुँदै जाने उनको भनाइ छ ।

‘अहिले बैंकहरूले एसएलएफ सुविधा लिएकै छैनन् भन्दा पनि हुन्छ । विगतमा बैंकहरूले यस्तो सुविधा २ खर्ब ५० अर्ब रुपैयाँसम्म लिएका थिए । केही समयपहिलासम्म अधिकांश बैंकको सीडी रेसियो ९० माथि थियो । तर, अहिले ९० मुनि झरेको छ,’ बिहीबार समृद्धि फाउन्डेसनले आयोजना गरेको कार्यक्रममा भट्टले भने । उनले अहिले लामो प्रयासपछि केही सकारात्मक संकेत देखा परेको दाबी गरे ।

हरेक संकटको समयमा अर्थतन्त्रमा दुर्घटनाको त्रास हुने गरे पनि राष्ट्र बैंकले आशावादी भएरै नीतिगत हस्तक्षेप गर्दै आएको उनको भनाइ छ ।

उनले ब्याजदर स्थायित्वलाई राष्ट्र बैंकले प्राथमिकता दिँदै आएको बताउँदै माघदेखि अहिलेको ब्याजदर पनि घट्न सक्‍ने बताए । ब्याजदर उच्च हुँदा व्यावसायिक वातावरण बिग्रिने र तल आउँदा अनावश्यक खपत बढ्ने हुनाले राष्ट्र बैंक सचेत रहेको बताए ।

पूर्वअर्थसचिव शंकरप्रसाद अधिकारीले सार्वजनिक वित्त असन्तुलित हुँदै गएको बताए । उनले देशको अर्थतन्त्रप्रति नेतृत्वको चिन्ता नभएको दाबी गरे । अन्य विषयमा उग्र राष्ट्रवाद देखाएर अर्थतन्त्रका विषयमा भने चासो नै नराखेको उनले बताए । पूर्वसचिव अधिकारीले अहिलेको भन्दा चिन्ताजनक अवस्थामा पुगिहाल्ने अवस्था नभएको बताए ।

नेपाल उद्योग वाणिज्य महासंघका उपाध्यक्ष अञ्जन श्रेष्ठले अहिले धेरै उद्योगहरूको उत्पादन नै २५ प्रतिशतमा खुम्चिएको, कति साना तथा मझौला उद्योग त बन्द नै हुने अवस्थामा पुगेको भन्दै अबका दिन थप चुनौतीपूर्ण हुने देखिएको बताए ।

पुनर्कर्जा फिर्ता हुने, स्थानीय तहमा जाने पैसाको निक्षेप गणना घट्नेलगायत कारणले तरलता समस्या थप बढ्ने उनको बुझाइ छ । अहिले अर्थतन्त्र चक्र नै खलबलिएको उनको दाबी छ ।

प्रकाशित मिति: बिहीबार, पुस ७, २०७९ १६:५५