आइडिया स्टुडियो नेपाल सिजन– ६ को प्रसारण सुरु

A+ A A-

आइडिया स्टुडियो नेपालले यही पुस ७ गतेदेखि ‘आइडिया स्टुडियो नेपाल सिजन– ६’ प्रसारण सुरु गरेको छ । स्पेस ४ के टेलिभिजनमार्फत प्रसारण सुरु गरेको उक्त शो हरेक बिहीबार र शुक्रबार राति ८.३० देखि ९ बजेसम्म प्रसारण हुनेछ ।

सन् २०१४ देखि सामाजिक सचेत व्यवसाय, उद्यमी र स्टार्टअपहरूका लागि प्रोत्साहन, स्रोतसाधन, ठाउँ, एक्सपोजर, सिकाइ, नेटवर्किङ र लगानीका अवसरहरू उपलब्ध गराउने काम गर्दै आएको छ ।

सोचदेखि उद्योगसम्मको नारासहित अघि बढेको आइडिया स्टुडियो नेपालले आफ्नो पाँचाैँ सिजन सकेर छैटाैँ सिजनको प्रसारण सुरु गर्दैगर्दा सयौँ आइडियालाई व्यावसायिक बाटो देखाइसकेको छ भने ६५ भन्दा धेरै आइडिया बोकेर आउने व्यवसायीलाई व्यावसायिक रूपमा समाजमा उतारिसकेको छ ।

यो वर्ष पनि ४० जना प्रतिस्पर्धीलाई स्टुडियोले स्क्रिनिङ र लाइभ अडिसनको माध्यमबाट छनोट गरी चारवटा विधामा बिभाजन गरिन्छ । जसमा ग्रिनोभेसन, मेड इन नेपाल, हाई फ्लाइङ र सोसियल इम्प्याक्ट नामक विधाहरू हुन्छन् ।

सहभागीले यी विधासँग सम्बन्धित व्यावसायिक योजना निर्णायकसामु सुनाउँछन् । जसका लागि यसअघि नै सहभागी प्रतिस्पर्धीलाई आइडिया स्टुडियोले व्यावसायिक तालिम दिइसकेको छ । यसरी तालिमपछि कार्यक्रममार्फत प्रतिस्पर्धामा उतार्दै हरेक विधाबाट विजेता छनोट गरिन्छ र उत्कृष्ट बनाउन सर-सल्लाह ,व्यवसायिक सञ्जाल, इन्क्युबेसन कार्यक्रम , मेन्टरसिप, रियालिटी टीभी शोका साथसाथै वित्तीय पहुँचका लागि पनि सहजीकरण गराउन मद्दत पुर्‍याउँदै आएको छ ।

कार्यक्रमको निणार्यक मण्डलमा डब्लूडब्लूएफका नेपाल प्रतिनिधि डा. घनश्याम गुरुङ, आइडिया स्टुडियोका कार्यकारी अध्यक्ष डा. छिरिङ लामा, गायिका तथा समाजसेवी, आनी छोइङ डोल्मा फाउन्डेसनका कार्यकारी अध्यक्ष/संस्थापक आनी छोइङ डोल्मा, सीएनवाईईएफकी अध्यक्ष, के-कन्सेप्टकी कार्यकारी निर्देशक प्राची अग्रवाल, सजिलो सेवाका सह-संस्थापक/वित्त प्रमुख सुजित रेग्मी, क्यापिटल नेपालका प्रबन्ध सम्पादक प्रकट कुमार, काजी स्टुडियोका सीईओ कृति शाक्य, ठमेल डटकमका संस्थापक बाल के जोशी, वुमन क्यानका संस्थापक अध्यक्ष सुष्मा शर्मा, शिक्षा तथा आतिथ्य व्यवसायी डा. राजेन्द्र केसी, कर्पोरेट ट्रेनर मानसी अग्रवाल, ग्लोबल एकेडेमी अफ टुरिज्म एण्ड हस्पिटालिटी एजुकेसनका सीईओ खेम लकाई, मेगा बैंककी एमएसएमई इन्चार्ज रुक्मणी महर्जन, आध्यन्ता फण्ड म्यानेजमेन्ट लिमिटेडका सह-संस्थापक मनोज पौडेल, किम्बु टेककी सीईओ कार्भिका थापा निर्णायक मण्डलमा रहेका छन् ।

प्रकाशित मिति: बिहीबार, पुस ७, २०७९ १३:४६