पोखरामा हुने लिटरेचर फेस्टिबलमा सांगीतिक कार्यक्रमको प्रायोजन ‘खुकुरी रम’ले गर्ने

पोखरामा हुने लिटरेचर फेस्टिबलमा सांगीतिक कार्यक्रमको प्रायोजन ‘खुकुरी रम’ले गर्ने

A+ A A-

पुस ६ गतेदेखि पोखराको फेवाताल किनारमा सुरु हुने ‘१०औँ नेपाल लिटरेचर फेस्टिबल’अन्तर्गत आयोजना हुने सांगीतिक कार्यक्रमहरूको प्रायोजन खुकुरी रमले गर्ने भएको छ ।

फेस्टिबलअन्तर्गत पुस ७ गते स्वर्गीय संगीतकार गोपाल योञ्जनको २५औँ स्मृति दिवसको अवसरमा विशेष सांगीतिक कार्यक्रम आयोजना हुनेछ । योञ्जनका गीतहरूको सँगालो ‘गोपालय’ पनि सोही अवसरमा विमोचन गरिनेछ । स्व. योञ्जनले पोखरामै लामो समयसम्म लोकसंगीतको अनुसन्धान र लेखनमा बिताएका थिए ।

लिटरेचर फेस्टिबलमा यसबाहेक लोक–ब्यान्ड रैथाने र फ्युजन गिटारवादक अनिल शाहीले पनि आफ्नो ब्यान्डसँगै विशेष प्रस्तुति दिनेछन् । यीलगायत सबै सांगीतिक कार्यक्रमहरूको प्रायोजन ‘खुकुरी रम’ले गरेको हो ।

कम्पनीका इभेन्ट म्यानेजर सुदिक्षा अधिकारीले कला, साहित्य र संगीतप्रेमीहरूको विशेष उत्सव ‘नेपाल लिटरेचर फेस्टिबल’सँग सहकार्य गर्न पाउँदा आफूहरूलाई गौरव महसुस भएको बताए । उनले भने, ‘लामो समयदेखि ग्राहकको मनमा बस्न सफल ‘खुकुरी रम’ उत्पादन गर्दा हामीले मौलिकतालाई विशेष जोड दिने गरेका छौँ । यही कारण नेपाली मौलिकपनले ओतप्रोत लिटरेचर फेस्टिबलजस्ता कार्यक्रम हाम्रो रोजाइमा पर्ने गर्छन् ।’

लिटरेचर फेस्टिबलको आयोजक बुकवर्म फाउण्डेसनका निर्देशक निरज भारीले नेपालीहरूको पहिचानको रूपमा धेरै देशमा निर्यात हुने उत्पादनलाई लिटरेचर फेस्टिबलअन्तर्गतका सांगीतिक कार्यक्रमहरूसँग जोड्न पाउँदा आफूहरूलाई पनि खुसी लागेको बताए ।

उनका अनुसार यसपटकको फेस्टिबलको नारा ‘शब्द शक्ति उत्सवको एक दशक’ रहेको छ ।

पुस ११ गतेसम्म चल्ने शब्दहरूको उत्सवमा ५० भन्दा बढी सेसन, सांगीतिक साँझ र थप रोचक हुनेछ । फेस्टिबलमा सन् २०२२ का बुकर पुरस्कार विजेता श्रीलंकाली लेखक सेहान करुणातिलका, लेखक एवं पत्रकार अक्षय मुकुल, सह–प्राध्यापक एवं लेखक सुकेतु मेहता, लेखक एवं फिल्म निर्माता सवा करिम खान, लेखक श्रेयना भट्टाचार्यलगायत अन्तर्राष्ट्रिय चर्चित व्यक्तिहरूसमेत सहभागी हुनेछन् ।

नेपालका राजनीतिक दलका नेतादेखि सांगीतिक, कला, पत्रकारिता, लेखन तथा सामाजिक क्षेत्रमा चर्चित पात्रहरूसमेत उक्त कार्यक्रममा सहभागी हुने कम्पनीले जनाएको छ ।

प्रकाशित मिति: मंगलबार, पुस ५, २०७९ १८:३७