यूएईको प्रस्तावः दोहोरो करमुक्ति सम्झौता गरौं, ५ वटा सुक्खा बन्दारगाह बनाइदिन्छौं

यूएईको प्रस्तावः दोहोरो करमुक्ति सम्झौता गरौं, ५ वटा सुक्खा बन्दारगाह बनाइदिन्छौं

A+ A A-

संयुक्त अरब इमिरेट्स (यूएई) ले नेपालसँग दोहारो करमुक्ति सम्झौताको प्रस्ताव गरेको छ । नेपालले केही महिनाअगाडि साउदी अरेबियासँग दोहोरो करमुक्तिको सम्झौता गरेलगत्तै नेपालका लागि यूएईका राजदूतले अर्थमन्त्री डा. युवराज खतिवडासँग भेटेर यस्तो प्रस्ताव राखेका हुन् ।

राजदूत साइद हमदास अलनाकवीले अर्थमन्त्री डा. खतिवडासँगको भेटमा यूएई र नेपालबीच दोहोरो करमुक्तिको सम्झौताको प्रस्ताव गरेका अर्थमन्त्रीका प्रेस संयोजक यमप्रसाद पौडेलले जानकारी दिए ।

भेटमा राजदूत अलनाकवीले नेपालको हवाई सेवा तथा अन्य क्षेत्रमा यूएईको लगानी आउन सक्ने बनाए । लगानी आकर्षित गर्न दोहोरो करमुक्ती सम्झौता गर्न आवश्यक भएको उनको भनाइ थियो ।

राजदूतको जिज्ञासाप्रति मन्त्री खतिवडाले दोहोरो करमुक्ति सम्झौताको छलफलका लागि नेपाल खुल्ला रहेको भन्दै प्रक्रिया अगाडि बढाइने पनि स्पष्ट पारे ।

राजदूतदले नेपाललाई आर्थिक साझेदारीको रुपमा व्यापार सहजीकरणका लागि विशेष सुविधा उपलब्ध गराउन तयार भएको जानकारी गराए ।

भेटमा राजदूतले यूएई सरकारले नेपालमा पाँचवटा सुख्खा बन्दरगाह बनाउन इच्छा व्यक्त गरेको वताएका थिए । तर, कहाँ कहाँ र कस्तो बन्दरगाह बनाउने भन्ने विषयमा विस्तृत कुरा नभएको प्रेस संयोजक पौडेलले जानकारी दिए ।

भेटका अवसरमा अर्थमन्त्री खतिवडाले अरबसँग भएको स्रोत नेपालमा लगानीका लागि अवसर सम्भव भएकाले समयमै पूर्वाधार तथा औद्योगिक क्षेत्रमा लगानी गर्न आग्रह गरे । नेपालको सिँचाइ, ऊर्जा, भौतिक संरचना विकास, पर्यटन, कृषिजस्ता क्षेत्रमा प्रतिस्पर्धी लगानीको उपयुक्त वातावरण भएको डा. खतिवडाको भनाइ छ

मन्त्री खतिवडाले अरबमा नेपाल ताजा तरकारी, फलफूल, हिमालयनको पिउने पानीलगायतको वस्तुलार्ई नेपालले प्राथमिकतामा राखेर निर्यात गर्न सकिने स्पष्ट पारे ।

मन्त्री खतिवडाले नेपालमा पर्यटन वर्ष २०२० मनाउन लागिएको सन्दर्भमा अरबका अर्थमन्त्रीलाई नेपाल भ्रमणको निमन्त्रणा गर्दै अरबी नागरिकलाई राजदूतमार्फत निमन्त्रणा सन्देश पठाई नेपाल भ्रमणमा आउन आग्रह पनि गरे । भेटमा राजदूतले नेपालका अर्थमन्त्रीलाई यूएई भ्रमणको र नेपालका अर्थमन्त्री डा. खतिवडाले यूएईका अर्थमन्त्रीलाई नेपाल भ्रमणको निम्ता दिएका थिए ।

प्रकाशित मिति: बिहीबार, साउन ३०, २०७६ ०३:५७