आर्थिक संकटमा मधेस सरकार, पुसदेखि कर्मचारीलाई तलबभत्ता खुवाउन नसक्ने

A+ A A-

संघीय सरकारले अहिलेसम्म पहिलो चौमासिकको बजेट नपठाउँदा मधेस प्रदेश सरकार आर्थिक संकटमा फसेको छ ।

समयमा संघीय सरकारले बजेट विनियोजन नगर्दा प्रदेश सरकारलाई अगामी महिनादेखि कर्मचारीलाई पनि तलब भत्ता खुवाउन समस्या हुने प्रदेशका अर्थमन्त्री शैलेन्द्रप्रसाद साहले बताए । संघीय सरकारले अन्य प्रदेशमा पठाए पनि मधेस प्रदेशका लागि अहिलेसम्म पहिलो चौमासिकको बजेट नपठाएर विभेद गरेको साहको आरोप छ ।

चालु आर्थिक वर्षको यो छैटौँ महिना चलिरहेको छ । मन्त्री साहले भने, ‘यो हिसाबले अहिलेसम्म दोस्रो चौमासिक आउनुपर्ने हो । तर, अहिलेसम्म संघीय सरकारले पहिलो चौमासिक नै नदिएर प्रदेश सरकारलाई असफल बनाउन खोजेको छ ।’

मधेस प्रदेश सरकारका कर्मचारीको तलबभत्तामा मासिक करिब ५० करोड रुपैयाँ खर्च हुने गरेको अर्थ मन्त्रालयका सचिव ब्रजेश ठाकुरले बताए । 'गत वर्षको खर्च हुन नसकी कोषमा रहेको रकमबाटै कर्मचारीहरूलाई पाँच महिनासम्म नियमित रूपमा तलबभत्ता खुवायौँ,' सचिव ठाकुरले भने, ‘यो महिना पनि पहिलो चौमासिकको रकम निकासा नभए पुसदेखि कर्मचारीलाई तलबभत्ता खुवाउन सक्ने अवस्था रहँदैन । प्रदेशको राजस्व नउठेर आन्तरिक आम्दानी पनि छैन, कोष पनि खाली रहेको अवस्था छ,’ उनले भने ।

राजस्वमा भारी गिरावट

चालु आर्थिक वर्षमा मधेस प्रदेश सरकारले राजस्वबाट ४ अर्ब १९ करोड रुपैयाँ राजस्व उठ्ने अनुमान गरेको छ । तर, चालु आर्थिक वर्षको पाँच महिना बितिसक्दा पनि अहिलेसम्म २० करोड रकम पनि राजस्व उठ्न नसकेको अर्थ मन्त्रालयले जनाएको छ ।

प्रदेश अर्थ मन्त्रालयका राजस्व उपसचिव सुरेन्द्र लाल कर्णले भने, 'प्रदेश सरकारको राजस्व आउने मुख्य स्रोत जग्गा रजिष्ट्रेसन र नयाँ सवारीसाधनको नामसारी नै हो । तर, कित्ताकाटको समस्याले अहिले मधेस प्रदेशमा जग्गाको कारोबार एकदमै न्युन छ भने नयाँ सवारीसाधन खरिदमा पनि लामो समयदेखि संघीय सरकारले नै आयातमा रोक लगाएपछि त्यसबाट हुने आम्दानी पनि शून्य प्राय: छ ।'

'विगतजस्तो जग्गा तथा सवारीसाधन खरिदमा बैंकहरूले पनि हत्तपत्त लगानी गर्दैनन्,' उनले भने, ‘ग्रामीणभन्दा शहरी क्षेत्रको जग्गा धेरै महँगो भएको छ । यस्तोमा बैंकको लगानीबिना सबैले जग्गा खरिद गर्ने अवस्था पनि छैन । त्यसको प्रभाव राजस्वमा परेको देखिन्छ । प्रदेशको मात्र नभई संघीय सरकारको पनि राजस्व संकलनमा भारी गिरावट आएको उनको भनाइ थियो ।

प्रकाशित मिति: सोमबार, पुस ४, २०७९ २०:१६