भर्चुअल शैक्षिक मेला : तीन दिनमै २५ हजार भिजिटर

A+ A A-

‘पहिलेजस्तो कलेज–कलेज पुगेर ब्रोसर र परामर्श लिने दिन अन्त्य भएको छ,’ कुलेश्वरकी श्रृजिता चौलागाईंले भनिन्, ‘नेपाल एडुफेयर क्लिक गर्दा सबै कलेजको भिजिट र परामर्श लिन सकिने रहेछ ।’

स्नातक तहमा अध्ययन गर्ने तयारीमा रहेकी श्रृजिता भन्छिन्, ‘कुन कलेज छनोट गर्ने र कुन विषय पढ्ने भनेर नेपाल एडुफेयर र शिलापत्रडटकमलाई दैनिक फलो गरेको छु ।’

शिलापत्रको ‘प्लस टुपछिको गन्तव्य’ स्तम्भमा दैनिक फरक–फरक विषयकोे सामग्री आएकाले विषय छनोट गर्न सहज बनाएको उनको भनाइ छ ।

‘फेसबुक चलाउँदै थिए । प्लस टुपछि के पढ्ने ? घरमै परामर्श भन्ने शीर्षकको समाचार वालमा आयो, जोरपाटीका अभिषेक सापकोटाले भने, ‘क्लिक गरेर हेर्दा भर्चुअल शैक्षिक मेला रहेछ । अहिले यसैलाई फलो गरेको छु । यहीँबाट कलेज र विषय छनोट गरेर भर्नाका लागि मात्र कलेज जाने हो ।’

श्रृजिता र अभिषेक प्रतिनिधि विद्यार्थी मात्र हुन् । गत आइतबारदेखि डिजिटल पत्रिका शिलापत्रडटकमले सुरु गरेको दोस्रो भर्चुअल शैक्षिक मेलामा बुधबारसम्म २५ हजार बढी विद्यार्थीले भिजिट गरेका छन् ।

विद्यार्थीको रोजाइमा इन्जिनियरिङ छ । त्यस्तै, फुड टेक्नोलोजी, बी फार्म, डेभलपमेन्ट स्टडिज पनि विद्यार्थीको रोजाइमा छ ।

‘विद्यार्थी र अभिभावकले भिजिट गर्ने क्रम बढेको छ,’ भर्चुअल शैक्षिक मेलाका संयोजक सुरेश सिम्खडाले भने, ‘विद्यार्थीकाे सहभागिता राम्राे छ । यो क्रम ३ भदौसम्म रहन्छ । एडुफेयर भिजिट गर्ने विद्यार्थीले छात्रवृत्तिसमेत पाउनेछन् ।’

इन्टरनेट पहुँच भएको जुनसुकै ठाउँबाट भिजिट गर्न सकिने उनले बताए । ‘यो मेलामा सहभागी हुन, जानकारी र परामर्श लिन कुनै भीडमा जानु वा भौतिक उपस्थिति जनाउनैपर्दैन । जहाँ हो, त्यहीँ बसेर नेपाल एडुफेयर क्लिक गरे पुग्छ,’ सिम्खडाले भने ।

खर्च कम, समयको बचत

‘पहिले भृकुटीमण्डपमा मात्र मेला लाग्थ्योे । काठमाडौंका सीमित विद्यार्थी र अभिभावकले मात्र शैक्षिक परामर्श लिन सक्थे,’ मोर्डन टेक्निकल कलेजका प्रधानाध्यापक गोविन्द पौडेलले भने, अहिले जुनसुकै ठाउँका विद्यार्थीले पनि भर्चुअल शैक्षिक मेलाबाट शैक्षिक परामर्श लिन सक्छन् ।’

टेक्नोलोजीका कारण विद्यार्थीका लागि खर्च कम र समयको पनि बचत भएको उनको भनाइ छ ।

‘घरबाटै परामर्श लिन सकिन्छ, खर्च पनि नहुने समय पनि बचत,’ पौडेलले भने, ‘विद्यार्थीले भर्चुअल शैक्षिक मेलाबाट फाइदा लिन सक्नुपर्छ ।’

शिक्षामा नयाँ युगको सुरुवात

‘शैक्षिक क्षेत्रमा नयाँ युगको सुरुवात भएको छ,’ नोबेल कलेजका संस्थापक अध्यक्ष सुरेन्द्र श्रेष्ठले भने, ‘टेक्नोलोजीको युगमा भर्चुअल शैक्षिक मेला एउटा उदाहरण हो । यसलाई अझ बृहत् बनाउन आवश्यक छ ।’

भौतिक उपस्थितिबिनै इन्टरनेटको माध्यमबाट परामर्श पाउनु विद्यार्थीका लागि सुनौलो अवसर भएको उनले बताए ।

‘विद्यार्थीले भर्चुअल शैक्षिक मेलाबाट सबै जानकारी लिने र पढ्नका लागि मात्र कलेज आए हुन्छ,’ उनले भने, ‘यो मेलालाई अझ विद्यार्थीमाझ प्रभाकारी रुपमा पुर्‍याउनुपर्छ ।’

मेलाबाट इन्जिनियरिङ, फुड टेक्नोलोजी, बी फार्म, डेभलपमेन्ट स्टडिजलगायतका विषयमा सम्पूर्ण जानकारी लिन सकिनेछ ।

स्नातक तहका विद्यार्थीलाई लक्षित गरी आयोजना गरिएको भर्चुअल शैक्षिक मेलामा मिटिङ प्वाइन्टको व्यवस्थापन र नयाँ पत्रिकाको सहकार्य छ ।

३ भदौसम्म चल्ने मेलामा १६ वटा कलेजले सहभागिता जनाएका छन् ।

यसलगत्तै आईटी र व्यवस्थापनका ५० बढी क्याम्पसलाई समेटेर मेला आयोजना गरिनेछ । गत असारमा कक्षा ११ का लागि लक्षित गरी सञ्चालन गरिएको मेलामा २ लाख बढीले अवलोकन गरेका थिए ।

भर्चुअल मेला भिजिट गर्न यहाँ क्लिक गर्नुहोस् :

प्रकाशित मिति: बिहीबार, साउन ३०, २०७६ ००:२६