एक वर्षमा ३१ जनाले आत्महत्या गरे डडेल्धुरामा

A+ A A-

डडेल्धुरामा आत्महत्या गर्नेको संख्या डरलाग्दो रुपमा देखिएको छ । गत आर्थिक वर्ष अर्थात् २०७५ साउनदेखि २०७६ असार मसान्तसम्मको तथ्यांक हेर्दा डडेल्धुरामा ३१ जनाले आत्महत्या गरेका छन् ।

जिल्ला प्रहरी कार्यालय डडेल्धुराले सञ्चारकर्मीसँगको परिचयात्मक कार्यक्रममा प्रहरी नायब उपरीक्षक दधिराम न्यौपानेले प्रस्तुत गरेको तथ्यांकमा झुन्डिएर आत्महत्या गर्नेको संख्या २३ छ भने विष सेवन गरी आत्महत्या गर्नेको संख्या आठ छ ।

आर्थिक वर्ष २०७३/७४ मा १४ जना र २०७४/७५ मा १० जनाले झुन्डिएर आत्महत्या गरेको प्रहरीको तथ्यांकमा देखिन्छ ।

गत आर्थिक वर्षमा जिल्ला प्रहरी कार्यालयमा दर्ता भएका कुल मुद्दा ८० छन् । यसमध्ये सबैभन्दा बढी आत्महत्याका मामिला भएको डीएसपी न्यौपालेले जानकारी दिए । यसले एकातिर अपराध बढ्दै गएको देखिन्छ भने अर्काे तर्फ प्रहरीको सक्रियता बढेसँगै मुद्दाको संख्यामा वृद्धि भएको हुन सक्ने उनको भनाइ छ ।

जिल्ला प्रहरी कार्र्यालयमा आर्थिक वर्ष २०७३/७४ मा ५० वटा, २०७४/७५ मा ५१, वटा ०७५/७६ मा ८० वटा मुद्दा दर्ता भएका छन् । चालू आर्थिक वर्षको हालसम्म ९ वटा मुद्दा दता भएको डीएसपी न्यौपानेले जानकारी दिए ।

आत्महत्या तथा महिला हिंसाविरुद्धका घटना न्यूनीकरणका लागि कार्यालयबाट गत आर्थिक वर्षमा जिल्ला विभिन्न स्थानमा जनचेतनामूलक कार्यक्रम सम्पन्न गरेको उनले बताए । जिल्लाका विभिन्न नगरपालिका र गाउँपालिकालाई मदिरा निषेधित क्षेत्र घोषणा गर्न लगाई अवैध मदिरा नष्ट गरिएको समेत उनले बताए ।

सवारी दुर्घटनामा ३४ जनाको मृत्यु

गत वर्ष १३ वटा भएका सवारी दुर्घटनामा ३४ जनाको मृत्यु भएको छ । दुर्घटनामा परी गम्भीर घाइते हुनेको संख्या ३० छ भने साधारण घाइते हुनेको संख्या ७९ रहेको तथ्यांक प्रहरी नायब उपरीक्षक न्यौपानेले प्रस्तुत गरे ।

उनले प्रस्तुत गरेको तथ्यांकअनुसार डडेल्धुरामा सवारी दुर्घटना बढेकाे छ । सवारी दुर्घटनामा परी आर्थिक वर्ष २०७३/७४ मा १० जना, २०७४/७५ मा ९ जनाको मृत्यु भएको छ भने २०७५/७६ मा ३४ जनाको मृत्यु भएको प्रहरीको तथ्यांकमा उल्लेख छ ।

ट्राफिक चेक जाँचका क्रममा सवारी साधन कारबाहीको संख्या बर्सेनि घट्दै गएको देखिएको छ । संख्या घटेपनि राजस्व संकलन भने झन्डै दोब्बरले बढेको छ । जरिमानाको राजस्वमा वृद्धि गरिएकाले गत वर्ष सवारी साधन चेकजाँचबाट २० लाख बढी रकम संकलन भएको उनले बताए ।

प्रकाशित मिति: बुधबार, साउन २९, २०७६ २३:०७