‘हनी हन्टिङ’ हेर्न दक्षिण अफ्रिकाबाट नेपाल आएका दुई साथी

A+ A A-

अधिकांश नेपालीले भीर मौरीको मह सिकार गरेको प्रत्यक्ष देखेका छैनन् । झनै विदेशीलाई त यो नौलो विषय हुने नै भयो । मान्छे भीरमा झुण्डिएर मह सिकार गरेको भिडियोमा देखेकाहरूले आफ्नै अगाडि त्यही दृश्य देख्दा कस्तो हुन्छ होला ? दक्षिण अफ्रिकाका दुई २३ वर्षीय नागरिक बेनार्ड लामेर्डिङ र केल्भिन कुइटले हालसालै आफ्नै आँखाअघि भीर मौरीको मह सिकार (हनी हन्टिङ) देख्न पाए ।

कास्कीको अन्नपूर्ण गाउँपालिका–७ लान्द्रुकमा यस वर्ष २७ र २८ मंसिरमा मह सिकार भएको थियो । त्यही हेर्न यी दुई साथी दक्षिण अफ्रिकाबाट २२ मंसिर (११ डिसेम्बर)मा नेपाल आएका थिए । नेपालमा भीर मौरीको मह सिकार गरेको भिडियो युट्युबमा देखेपछि प्रत्यक्ष हेर्न मन लागेको कुइटले सुनाए । ‘दुई वर्षअघि हनी हन्टिङ गरेको डकुमेन्ट्री देखेको थिएँ । त्यसपछि मैले त्यो भिडियो साथीहरूलाई पठाएँ,’ कुइटले नेपाल आउनुको कारण खुलाए, ‘साथीले एकपटक जाउँ भनेपछि हामी आयौँ । हनी हन्टिङ गर्ने त सत्य रहेछ !’

लामेर्डिङ र कुइट आठ वर्ष हुँदादेखिका साथी हुन् । अहिले पढाइले गर्दा कक्षा छुट्टिए पनि प्रायः साथमै हुन्छन् । लामेर्डिङ हवाइजहाज पाइलट र कुइट इञ्जिनियरिङका विद्यार्थी हुन् । दुवै जना एक हप्ताअघि काठमाडौंबाट पोखरा, धम्पुस हुँदै लान्द्रुक पुगेका थिए । पर्यटक अन्नपूर्ण बेसक्याम्प र मर्दी हिमाल बेसक्याम्प जान लान्द्रुक पुग्छन् । तर, यी दुई साथी ट्रेकिङका लागि नभई लान्द्रुकमा भएको हनी हन्टिङ हेर्नमात्रै आएका हुन् । उनीहरू शनिबार स्वदेश फर्किएका छन् ।

लामेर्डिङ दक्षिण अफ्रिका बाहिर घुमेको भए पनि कुइटको पहिलो विदेश भ्रमण थियो । त्यसैले पनि नेपाल र लान्द्रुक उनको जीवनको अझ अविस्मरणीय ठाउँ बनेका छन् । ‘म अफ्रिका बाहिर पहिलोपटक नेपाल आएको हो र हनी हन्टिङ पनि पहिलोपटक देख्न पाएँ,’ कुइट खुसी हुँदै सुनाउँछन्, ‘मैले त सपना देखेकोजस्तै अनुभव गरेँ । मह झिक्नलाई मान्छे भीरमा झुण्डिएको देख्दा त उनीहरू ‘पागल’ नै रहेछन ्जस्तो लाग्यो । आफ्नै आँखा अगाडि त्यस्तो देख्न पाउने म निकै भाग्यमानी हुँ ।’

दक्षिण अफ्रिकाको सबैभन्दा अग्लो पहाड ३ हजार ४८२ मिटरको छ । उनीहरूले कास्की आएर अन्नपूर्ण, माछापुच्छ्रे जस्ता ८ हजार मिटर अग्ला सेताम्मे पहाड देख्न पाए । लान्द्रुक आएर नेपाली बाजागाजा देख्न र सुन्ने मौका पनि मिल्यो । हनी हन्टिङ गर्नुअघि लान्द्रुकमा गरिने परम्परागत पूजा विधि र त्यसको कारण पनि बुझ्न पाए । त्यसैले लामेर्डिङ हनी हन्टिङलाई प्याकेजका रुपमा अथ्र्याउँछन् । ‘हनी हन्टिङ सबै कुरा एकै ठाउँमा हुने रहेछ । रोमाञ्चक र साहसिक अनुभूत भयो । हामीले जे सोचेर आएका थियौँ त्यही देख्न पायौँ । हरेक क्षण रमाइलो गर्‍यौँ,’ उनले सुनाए ।

यी दुई साथीलाई खेनपालुङ एडभेन्चरले लान्द्रुकसम्म पुर्‍याएको हो । दुई जना एक वर्ष पहिल्यै नेपाल आउने योजनामा भए पनि कोरोनाले गर्दा समय धकेलिएको एडभेन्चरका गाइड दावा शेर्पाले सुनाए । ‘नेपाल आउने भनेर दुई वर्ष पहिला नै पक्का भएको थियो । २०२१ मा कोरोना भाइरसले गर्दा आउन पाएनन्,’ उनले भने, ‘हनी हन्टिङ हेर्न र मह चाख्न यो वर्ष एक हप्तालाई नेपाल आएका हुन् ।’

२८ मंसिरमा उनीहरू मह चाख्न संकलन भइरहेको भीरमै पुगेका थिए । नेपाल आउँदादेखि फर्किंदासम्मका सबै गतिविधि क्यामेरामा कैद छन् । ती तस्वीरहरू साथीभाइलाई देखाउने उनीहरूको सोच छ । ‘मैले धेरै फोटो खिचेको छु । गाउँमा दिएको प्रमाणपत्र पनि साथीहरूलाई देखाउँछु,’ लामेर्डिङले सुनाए । मह सिकार हेर्न पुगेका दुवैले ८० हजार रूपैयाँ फेस्टिबल आयोजकलाई सहयोग गरेका थिए । सहयोग गरेबापत आयोजकले प्रमाणपत्र दिएको थियो ।

पाइलट लामेर्डिङ हिमाल आरोही पनि हुन् । उनले ३ वर्षअघि तान्जानियास्थित अफ्रिका महादेशकै अग्लो हिमाल किलिमन्जारो (५, ८९५ मिटर)चढेका थिए । आगामी वर्ष उनी सगरमाथा चढ्न नेपाल आउने योजनामा छन् ।

प्रकाशित मिति: शनिबार, पुस २, २०७९ २०:१९