मर्दी पदयात्रा छोडेर मह सिकार हेर्न पुगेकी मार्टिना

A+ A A-

युरोपियन देश चेक रिपब्लिकको सबैभन्दा अग्लो पहाड १ हजार ६०३ मिटरको छ । नेपालका ८ हजार मिटर अग्ला पहाड हेर्न त्यही देशकी ३७ वर्षीया नागरिक मार्टिना स्ट्रेइजकोभा एक महिनाअघि नेपाल आएकी थिइन् ।

नेपालको यो बसाइमा उनले ८ हजारभन्दा अग्ला अन्नपूर्ण, माछापुच्छ्रे, धौलागिरि प्रथम हिमाल आफ्नै सामुन्ने देखिन् । सेताम्मे अग्ला पहाड आफ्नै आँखाअघि देख्नु मार्टिनालाई नौलो थियो । पदयात्रालाई मात्र नेपाल आएकी उनले सायदै फेरि पाउने अनुभव ‘बोनस’ पाएकी छन् ।

अन्नपूर्ण आधार शिविर, पुनहिल पुगेर फर्केपछि २४ मंसिरमा मार्टिना लान्द्रुक पुगेकी थिइन् । २७ र २८ मंसिरमा कास्कीको अन्नपूर्ण गाउँपालिका–७ लान्द्रुकको कोटेसाङ भीरमा मह सिकार हुँदै थियो । भीर मौरीको सिकार गरेको उनले कहिल्यै देखेकी थिइनन् । नेपाल बसाइको अन्तिम हप्ता मार्टिनाले प्रत्यक्ष ‘हनी हन्टिङ’ देख्न पाइन् । त्योसहित लान्द्रुकको भीर पाखा पसेर घाँट काट्न सिकिन् । त्यहीँको मैदानमा एक साँझ भलिबल पनि खेलिन् ।

२५ मंसिरमा मर्दी हिमाल पदयात्रामा निस्किने योजना थियो । तर, उनले आफ्नो तीन दिनको मर्दी हिमाल पदयात्रा रद्द गरेर लान्द्रुकमै बसिन् । ‘मर्दी गएर पोखरा फर्किने योजना थियो । तर, यहाँ भीरमा चढेर मह सिकार हुँदैछ भन्ने थाहा पाएपछि यहीँ बसेँ,’ मार्टिनाले सुनाइन् ।

२७ मंसिरमा मह निकाल्न भीरमा चढ्ने तयारी थियो । गाउँलेसँगै मार्टिना पनि आधा घण्टा ओर्लेर मोदी खोला किनार पुगिन् । भीरभन्दा पारिपट्टि एउटा घरको आँगनमा बसेर उनले भिरौटेले सिकार गरिरहेको हेरिन् । उनको मोबाइल भीरतिरै तेर्सिइरहेको थियो । अक्करे भीरमा मान्छे झुण्डिएको देख्दा उनी अचम्मित थिइन् । ‘मेरो नजरमा मह सिकार गर्नेहरू निकै बहादुर रहे किनकि म त त्यो गर्न सक्दिनँ । सिकारमा प्रयोग हुने डोरी, भाँडा र सामग्री पनि देख्न पाएँ,’ उनी प्रफुल्लित देखिइन् ।

कुनै भवितब्य नहोस् भनेर मह सिकारमा जानुअघि पुजा हुन्छ । महोत्सवमा गाउँमा सांस्कृतिक कार्यक्रम हुन्छ । मर्दी हिमाल पदयात्र रद्द गरेर उनले यी सबै अनुभव यो भ्रमणबाटै बटुलेकी छन् ।

२७ मंसिरमा मह सिकार हेरेर फर्किएपछि आफ्नो मोबाइलको तस्वीर परिवारलाई पठाएकी थिइन् । ‘मैले परिवारलाई तस्वीर पठाएकी थिएँ । मेरो भाइले यस्तो त मैले बीबीसीको भिडियोमा देखेको थिएँ । तिमी साह्रै भाग्यमानी रहेछौ आफ्नै आँखाअगाडि देख्न पायौ भन्यो,’ उनले सुनाइन्, ‘म फर्किएपछि हनी हन्टिङबारे अझै बुझ्न प्रयास गर्छु ।’

मार्टिनालाई गाइड सुदीप राईले अन्नपूर्ण बेसक्याम्प, पुनहिल र पोखरा घुमाए । पदयात्रा मात्रै गर्न नेपाल आएकी उनलाई हनी हन्टिङ हेर्न गाइड राईले सुझाएका थिए । विदेशीलाई नयाँ कुरा देखाउँदा नेपालको पर्यटन थप प्रचार हुने उनी बताउँछन् । ‘हनी हन्टिङ विदेशीलाई नौलो हुने भयो । यो भनेको कल्पना बाहिरकै कुरा हो । कतिलाई त हनी हन्टिङ हुन्छ भन्ने थाहै हुँदैन,’ राई भन्छन्, ‘उनीहरूले एक जनाले तस्वीर सामाजिक सञ्जालमा राख्नु भनेको नै ठूलो प्रचार हो ।’

चेक रिपब्लिकमा मार्टिनको फास्ट फुड रेष्टुरेन्ट छ । नेभोम्बरदेखि फेब्रअरीसम्म अत्यधिक चिसो हुने भएकाले त्यहाँ अफसिजन हुन्छ । त्यसैले उनले योपटकको अफसिजनको एक महिना नेपाल भ्रमणमा सकेकी छन् । परिवारले क्रिसमस मनाउन बोलाएपछि शुक्रबार उनी स्वदेश फर्किएकी छन् ।

योपटक मह सिकार हेर्न रद्द गरेको मर्दी हिमाल पदयात्रा गर्न मार्टिना अर्को वर्ष अक्टोबरमा नेपाल आउँदै छिन् । त्यतिबेला मर्दीसहित लाङटाङ, उपल्लो मुस्ताङ घुम्ने उनको योजना छ ।

प्रकाशित मिति: शुक्रबार, पुस १, २०७९ १९:१९