इटहरी इन्टरनेसनल कलेजको दीक्षान्त समारोह, २२७ जना विद्यार्थी दीक्षित

A+ A A-

इटहरीस्थित इटहरी इन्टरनेसनल कलेजको सन् २०२२ मा पास भएका विद्यार्थीको दीक्षान्त समारोह बिहीबार सम्पन्न भएको छ । समारोहमा स्नातक तहअन्तर्गत विशेषज्ञताहरू बीएस्सी (अनर्स) कम्प्युटिङ र बीए (अनर्स) बिजनेस प्रशासनका २२७ जना विद्यार्थी दीक्षित भए ।

समारोहमा विद्यार्थीका अभिभावकहरूको उल्लासमय उपस्थिति थियो । समारोहमा बीए (अनर्स) बिजनेस प्रशासनका विषयमा स्नातक तह पास गर्ने १३ जना र बीएस्सी (अनर्स) कम्प्युटिङ तह पूरा गर्ने २१४ जना गरी जम्मा २२७ विद्यार्थी दीक्षित भएका थिए ।

दीक्षान्त समारोहमा सबै विद्यार्थीका लागि माइलस्टोन साबित भएको छ । वार्षिक कार्यक्रमअनुसार दीक्षान्त समारोहमा आयोजना गरेको कलेजले जनाएको छ । सो कलेजबाट दीक्षित उत्कृष्ट विद्यार्थीलाई इनोभेट नेपाल ग्रुपले छात्रवृत्ति उपलब्ध गराएको छ ।

बेलायतको लन्डन मेट्रोपोलिटियन विश्वविद्यालयबाट सम्बन्धन प्राप्त सो कलेज इनोभेट नेपाल ग्रुपद्वारा सञ्चालित छ । दीक्षान्त समारोहमा विश्वविद्यालयका हेड अफ एकेडेमिक पार्टनरसिप डा वेन्डी ब्लोइसीले विद्यार्थीलाई दीक्षान्तको प्रमाणपत्र प्रदान गरेका थिए ।

सो अवसरमा बोल्दै डा वेन्डी ब्लोइसीले भने, 'तपाईंहरूले जस्तो सोच राख्नुहुन्छ, आउने दिनहरू त्यस्तै पाउनुहुनेछ । ज्ञानले जीवनमा ठूलो प्रभाव पार्छ, त्यसैगरी सकारात्मक सोचले हाम्रो जीवनमा राम्रो परिवर्तन ल्याउँछ ।

दीक्षान्त समारोहमा बोल्दै आईएनजीका संस्थापक अध्यक्ष सुलभ बुढाथोकीले भने, 'आजको युगमा वैदेशिक शिक्षा लोकप्रिय बन्दै गएको छ । त्यसैले हजुरहरू विदेशिए पनि आफ्नो शिक्षा पूरा गरेर आफ्नैै देश फर्किनुहोस् र देशको विकासमा योगदान पुर्‍याउनुहोस् ।'

बुढाथोकीले दीक्षित विद्यार्थीहरूको उज्ज्वल भविष्यका लागि शुभकामना पनि दिए ।

प्रकाशित मिति: शुक्रबार, पुस १, २०७९ १४:०५