माओवादीमा कमजोर बन्दै नारायणकाजी श्रेष्ठ, प्रतिनिधिसभामा जम्मा एक सांसद

A+ A A-

नेकपा (माओवादी केन्द्र) का वरिष्ठ उपाध्यक्ष नारायणकाजी श्रेष्ठ ‘प्रकाश’ पार्टीमा कमजोर बन्दै गएका छन् । पार्टीका वरिष्ठ उपाध्यक्ष रहेका श्रेष्ठ माओवादीभित्र पूर्वएकताकेन्द्र गुटका नेताका रूपमा चिनिन्थे । तर, प्रतिनिधिसभा र प्रदेशसभा चुनावको परिणाम आइसक्दा प्रतिनिधिसभामा श्रेष्ठ पक्षधर जम्मा एक जना सांसद मात्र पुगेका छन् ।

श्रेष्ठ समूहका बलियो नेताका रूपमा रहेका गिरिरजामणि पोखरेलले महोत्तरी १ मा पराजित भएका छन् । श्रेष्ठ र पोखरेलको मधेशमा माओवादीभित्र निकै बलियो प्रभाव थियो । त्यही कारण पोखरेललाई माओवादीले जित्ने सूचीमा राखेका थियो । तर, मधेश आन्दोलनका क्रममा सशस्त्र प्रहरी इन्स्पेक्टर थमन विकको हत्या आरोप लागेका लझ्मी महतो कोइरीले पोखरेललाई पराजित गरे ।

त्यसो त, श्रेष्ठ समूहकै नेता विश्वनाथ प्रसाद साह पनि सिरहामा पराजित भए । काठमाडौं १० मा उम्मेदवार भएकी अञ्जना विंशखे पनि श्रेष्ठ समूहकी नेता हुन् । उनी पनि पराजित भएकी छन् ।

श्रेष्ठ समूहका नेताहरू निर्वाचित हुन नसकेपछि समानुपातिमा एक जनालाई राखिएको छ । त्यसो त, श्रेष्ठ समूहका नेता पेशल खतिवडालाई सांसद बनाउने प्रयास पनि भएको थियो । समानुपातिक बन्द सूचीमा रहेका खतिवडालाई ल्याउन श्रेष्ठ समूहले पहल गरेको भए पनि हितराज पाण्डेलाई ल्याउने भएपछि खतिवडा बाहिरिन बाध्य भए ।

७ जना सांसद लिएर ०६५ मा माओवादी केन्द्रसँग एकीकरण गरेको श्रेष्ठ समूह माओवादीभित्र पछिल्ला दिनमा पनि बलियो समूहकै रूपमा मानिन्थ्यो । तर, माओवादी केन्द्र खुम्चिएजस्तै श्रेष्ठ समूह पनि माओवादीभित्र खुम्चिँदै गाएको छ ।

माओवादी केन्द्रले प्रतिनिधिसभामा प्रत्यक्षतर्फ १८ सिटमा जित निकालेको छ । त्यसमध्ये एक जना पनि श्रेष्ठ समूहका छैनन् । हेर्नुस् प्रत्यक्षतर्फ निर्वाचित माओवादी केन्द्रका सांसदहरूः

१. वर्षमान पुन

२. जनार्दन शर्मा

३. गंगा कार्की

४. सूर्यमान तामाङ (दोङ)

५. शक्तिबहादुर बस्नेत

६. रामकुमार राई

७. अमनलाला मोदी

८. माधव सापकोटा

९. सुदन किराती

१०. लेखनाथ दाहाल

११. रेखा शर्मा

१२. हितबहादुर तामाङ

१३. पुष्पकमल दाहाल ‘प्रचण्ड’

१४. देवेन्द्र पौडेल

१५. महेन्द्रबहादुर शाही

१६. महिन्द्र राय यादव

१७. छिरिङ डम्डुल लामा (भोटे)

१८. पूर्णबहादुर घर्ती

प्रत्यक्षतर्फ निर्वाचित भएकामध्ये कोही पनि श्रेष्ठ समूहका होइनन् । प्रतिनिधिसभामा टिकट पाएका उनी पक्षधर नेताहरू पराजित भएका थिए ।

त्यस्तै माओवादी केन्द्रले समानुपातिकतर्फ १४ जना सांसद पाएको छ । त्यसमध्ये श्रेष्ठ समूहका एक जना मात्रै परेका छन् । हेर्नुस् माओवादी केन्द्रले निर्वाचन आयोगमा बुझाएको समानुपातिक सांसदहरूको सूचीः

१. दुर्गा राई

२. मिना तामाङ

३. उर्मिला माझी पौडेल

४. छिरिङ ल्यामु लामा तामाङ

५. हितराज पाण्डे

६. ज्ञानु बस्नेत सुवेदी

७. विमला सुवेदी

८. नारायणी शर्मा

९. रूपा सोसी चौधरी

१०. रणेन्द्र बराली

११. सुशिला श्रीपाली ठकुरी

१२. मिना यादव

१३. उमरावती देवी यादव

१४. कल्पना मियाँ

यी मध्ये रणेन्द्र बराली मात्रै श्रेष्ठ समूहका हुन् । त्यस्तै उमरावती देवी यादव भने डा. बाबुराम भट्टराई नेतृत्वको नेपाल समाजवादी पार्टीकी हुन् । जसका कारण प्रतिनिधिसभामा श्रेष्ठ समूहको उपस्थिति निकै कमजोर देखिएको छ ।

प्रकाशित मिति: आइतबार, मंसिर २५, २०७९ ११:५५