दलकाे नेता बन्न मधेस प्रदेशका सांसदहरूको दौडधुप

A+ A A-

मधेस प्रदेशसभामा दलको नेता बन्न विभिन्न पार्टीका नेताहरूले दौडधुप सुरु गरेका छन् । दलका नेताकै नेतृत्वमा सरकारमा जाने सम्भावना रहेकाे तथा दलका नेताहरूले गाडीसहितका विभिन्न सुविधा प्रदेशसभा सचिवालयबाट पाउने भएपछि आकांक्षी सांसदहरूले आफ्ना पार्टीका शीर्ष नेताहरूसँग भेटघाट बढाएका छन् । मधेस प्रदेशमा पुरानै अनुहारमा २८ जना सांसद दोहरिएका छन् । नयाँ अनुहार ३६ जना रहेका छन् ।

प्रदेश सरकारकाे नेतृत्वको दाबी गरिरहेकाे नेपाली कांग्रेसमा संसदीय दलका नेता बन्न अकांक्षीहरूले दौडधुप बढाएका छन् । नेपाली कांग्रेसका मधेस प्रदेश सभापति कृष्णा प्रसाद यादव, प्रदेशका पूर्वमन्त्री रामसरोज यादव, पूर्व मन्त्री वीरेन्द्र सिहंसहितका नेताहरू संसदीय दलकाे नेताबन्ने ढौडमा रहेका छन् । प्रदेश सभापति कृष्णा यादव संघीय सांसद रहिसकेका छन् भने पूर्वमन्त्री यादव यसअघि नेपाली कांग्रेस मधेस प्रदेश समितिका संसदीय दलका नेता थिए ।

जसपाका नेता लालबाबु राउतको नेतृत्वको सरकारमा यादवकै नेतृत्वमा कांग्रेस सहभागी भएको थियो । अहिले यी तीनै जनाले संसदीय दलकाे नेता बन्न पार्टीका सभापति शेरबहादुर देउवासहित इतर समूहका नेताहरूसँग भेटघाट बढाएका छन् । प्रदेश सभापति यादव र पूर्वमन्त्री सिंह शेरबहादुर देउवा निकट हुन् भने पूर्वमन्त्री यादव नेता विमलेन्द्र निधि निकट हुन् । स्राेतका अनुसार पूर्व मन्त्री यादव संसदीय दलकाे नेताको लागि इतर समूहसँग पनि लविङ्ग गरिरहेका छन् ।

एमालेमा पनि दलकाे नेताका लागि दौडधुप सुरु भइसकेको छ । एमालेका केन्द्रीय सदस्य तथा प्रदेशसभामा निर्वाचित सरोज यादव, प्रदेशसभा सदस्यमा दोहरिएका रामचन्द्र मण्डल र शारदा थापा दलकाे नेताका लागि दौडमा छन् । यादव विद्यार्थी राजनीतिदेखि नै एमालेसँग आबद्ध रहेका छन् । उनी पार्टी अध्यक्ष केप शर्मा ओलीका विश्वास पात्र पनि हुन् । मण्डलको राजनीतिक पृष्ठभूमि माओवादी केन्द्र हाे । तत्कालीन नेकपा विभाजन हुँदा उनी एमालेतिर लागेका थिए । थापा दोस्राेपटक प्रदेशसभा सदस्यमा निर्वाचित भएकी हुन् ।

जनता समाजवादी पार्टीमा दलका नेतामा दुई जनाको दावेदारी देखिएको छ । पर्साबाट निर्वाचित मुख्यमन्त्री लालबाबु राउत र बाराबाट निर्वाचित पूर्वप्रदेश सभामुख सरोज कुमार यादव दलका नेता बन्ने ढौडधुपमा लागेका छन् । पार्टी अध्यक्ष उपेन्द्र यादवका विश्वास पात्र मुख्यमन्त्री राउत सफल रुपमा आफ्नो कार्यकाल चलाउन सफल भएकोले उनलाई पुनः दलकाे नेता बनाउने सम्भावना देखिन्छ । यता, तत्कालीन राजपाबाट सभामुख बनेका यादव जसपाबाट लोसपा विभाजन हुँदा उनी जसपामै रहेका थिए ।

माओवादी केन्द्र संसदीय दलको नेतामा भरत साह नै दोहरिने सम्भावना देखिन्छ । उनी अहिले प्रदेश सरकारमा गृह तथा संचारमन्त्री हुन् । लोकतान्त्रिक समाजवादी पार्टी (लोसपा) मा दलको नेताका लागि दुई जनाको टसल हुने देखिन्छ । लोसपाका प्रदेश अध्यक्ष जितेन्द्र सोनल र सर्लाहीबाट दोस्रो पटक प्रदेशमा निर्वाचित उपेन्द्र महतो दलका नेताका आकांक्षी देखिएका छन् । सोनल यसअघि पनि दलकाे नेता चुनिएका थिए । उनी पार्टी अध्यक्ष महन्थ ठाकुर निकट मानिन्छ । यता, महतो लोसपाका वरिष्ठ नेता राजेन्द्र महतोका भजिता हुन् ।

नेकपा एकीकृत समाजवादीबाट भने दलको नेतामा प्रमोद कुमार यादव र सर्लाहीबाट निर्वाचित बेची लुंगेलीको नाम अगाडि देखिन्छ । यादव अहिले मधेस प्रदेश सरकारमा राज्यमन्त्री समेत हुन् । नेकपा एसका यसअघिका दलका नेता शत्रुधन महतो चुनावमा पराजित भएपछि यादवले सो अवसर पाउने सम्भावना बढी रहेको पार्टीका नेताहरूको भनाइ छ । प्रदेशसभामा पहिलोपटक पुगेको जनमत पार्टीभित्र पनि दलको नेता बन्ने डौढधुप गर्नेको जमात बढी नै छ । सप्तरीबाट निर्वाचित सतिश सिंह, सिरहाबाट निर्वाचित त्रिभुवन साह र समानुपातिकबाट प्रदेश सासद भएका चन्दन सिंहले दलका नेतामा दौडधुप बढाएका छन् ।

प्रकाशित मिति: शनिबार, मंसिर २४, २०७९ १५:२८