युद्ध अन्त्यकोे सन्देश बोकेको नेपालगञ्ज म्याराथन आठौँ संस्करणमा

फाइल तस्वीर

A+ A A-

नेपालको दशक लामो सशस्त्र द्वन्द्वको अन्त्यको सन्देश बोकेको नेपालगञ्ज म्याराथनको आठौँ संस्करण शनिबार हुँदैछ । नेपालगञ्जको बीपीचोकबाट बिहान ७ बजे सुरु हुने आठौँ धारा नेपालगञ्ज म्याराथनको सम्पूर्ण तयारी पूरा भएको आयोजक क्रियटिभ ह्याण्डसले जनाएको छ ।

एसोसिएसन अफ इन्टरनेसनल म्याराथन्स एन्ड डिस्टेन्स रेसेस (एम्स) ले मान्यता दिएको आधिकारिक रुटमा आयोजना हुन लागेको नेपालगञ्ज म्याराथनमा भारतीय धावकसमेत सहभागी छन् । यो एम्सको वार्षिक क्यालेन्डरमा परेको नेपालको एक मात्र म्याराथन प्रतियोगिता हो ।

दशक लामो सशस्त्र द्वन्द्वको अन्त्य गर्ने ५ मंसिर २०६३ को विस्तृत शान्ति सम्झौताको स्मरणमा सन् २०१५ देखि यो म्याराथन सुरु गरिएको हो । मध्यपश्चिम क्षेत्र द्वन्द्वबाट सबैभन्दा धेरै प्रभावित क्षेत्र हो । द्वन्द्व अन्त्य भई मुलुक शान्तितर्फ प्रवेश गरेको दिनको स्मरणमा सुरु गरिएको म्याराथनलाई प्राविधिक रुपमा सबल बनाउँदै अन्तराष्ट्रिय स्तरको बनाइएको आयोजक क्रियटिक ह्याण्डसका अध्यक्ष टीएस ठकुरीले बताए ।

'एम्सबाट आधिकारिकता पाएको रुटमा दौडिन पाउँदा धावकहरु खुशी पाएका छौ । एम्सको वार्षिक क्यालेन्डरमा पनि परेकाले अब विदेशी धावकका लागि पनि नेपालगञ्ज म्याराथनले आकर्षित गर्ने विश्वास छ', अध्यक्ष ठकुरीले भने ।

म्याराथनका विजेताले १ लाख ५० हजार रुपैयाँ पुरस्कार पाउनेछन् । गत वर्ष १ लाख १० हजार पुरस्कार राशी रहेकामा यसबर्ष बृद्धि गरिएको हो । नेपालगन्ज म्याराथनमा शीर्ष ८ धावकलहरु नगद पुरस्कारबाट पुरस्कृत हुनेछन् भने उपविजेताले ६० हजार, तेस्रो हुनेले ३० हजार र चौथो हुनेले १५ हजार रुपैयाँ पुरस्कार पाउनेछन् । पाँचौँदेखि आठौँस्थानसम्म आउने धावकलाई क्रमशः १०, ८, ७ र ६ हजार रुपैयाँ पुरस्कार प्रदान गरिने रेस डाइरेक्टर चन्द्रबहादुर गुरुङले जनाएका छन् ।

त्यस्तै, महिला हाफ म्याराथनमा पनि पुरस्कार बढाएर विजेताका लागि ६० हजार बनाइएको छ । यसअघि विजेताले ५५ हजार पाएका थिए । महिलातर्फको हाफ म्याराथनमा उपविजेताले ३० हजार, तेस्रोले १५ हजार र चौथो हुनेले १० हजार रुपैयाँ पुरस्कार पाउनेछन् । पाँचौँदेखि आठौँस्थानसम्म आउनेले क्रमशः ८ हजार, ७ हजार, ६ हजार र ५ हजार रुपैयाँ पुरस्कार प्राप्त गर्नेछन् ।

पुरुष १० किमी खुलातर्फ विजेताले ३० हजार, उपविजेताले १५ हजार र तेस्रोले १० हजार रुपैयाँ पाउनेछन् भने महिलातर्फ ५ किमी खुलामा विजेतालाई २० हजार, उपविजेतालाई १० हजार र तेस्रो हुनेलाई ७ हजार रुपैयाँ पुरस्कार दिइनेछ । त्यस्तै, विद्यालय स्तरीय ५ किलोमिटर छात्र दौडमा प्रथमलाई १० हजार, दोस्रोलाई ७ हजार र तेस्रोलाई ५ हजार एवं ३ किमी छात्रातर्फ प्रथमलाई १० हजार, दोस्रोलाई ७ हजार र तेस्रोलाई ५ हजार रुपैयाँ पुरस्कार दिइनेछ ।

ह्विलचेयर रेसतर्फ शीर्ष तीन जनालाई क्रमशः १० हजार, ७ हजार र ५ हजार रुपैयाँ नगद पुरस्कार दिइनेछ भने प्रतियोगिताको कुल पुरस्कार राशि ५ लाख ८५ हजार रुपैयाँ रहेको छ । कर्पोरेट रनतर्फका विजेतालाई पोखरा अन्तर्राष्ट्रिय म्याराथनको रन फर फनमा सहभागी गराइनेछ । विजेतालाई हवाई टिकटसहित दुई दिनको आवास तथा भोजनको समेत व्यवस्था गरिएको छ ।

पूर्वसन्ध्यामा नेपालगञ्ज मन्थन

म्याराथनको पूर्वसन्ध्यामा शुक्रबार नेपालगञ्ज मन्थन गरिएको छ । सो मन्थनमा सहरको इतिहासबारे साहित्यकार सनत रेग्मी र लेखक तथा पत्रकार नरेन्द्रजंग पिटरले छलफल गरेका थिए ।

त्यस्तै, खेल पर्यटनबारे धाविका सन्तोषी श्रेष्ठ, दीपक श्रेष्ठ, एलबी क्षेत्री, हरि पराजुलीलगायतले चर्चा गरेका थिए भने युवा सोँचबारे कान्तिपुर टिभीका सीईओ शिशिर पछाई, नायिका बेनिशा हमाल र भोजराज शर्मा नादिरले बहस गरे । यसैगरी, स्वादको सहर छलफलमा नेपालगञ्जका मौलिक स्वादबारे चर्चा गरियो भने लगत्तै कविगोष्ठि र अल नेपाल मुशायरासमेत राखिएको थियो ।