जर्मनी एकीकरण विरोधी समूहले गरे 'कु' को प्रयास

षड्यन्त्रमा संलग्न भएको आरोपमा पक्राउ परेकाहरूलाई सुरक्षित क्षेत्रमा लैजाँदै जर्मन प्रहरी ।

A+ A A-

जर्मनी एकीकरण भएको तेस्रो दशकमा सत्तापलटको प्रयास भएको छ । जर्मन सरकार अपदस्थ गर्ने षड्यन्त्र गरेको भन्दै २५ जना पक्राउ परेपछि सत्तापलटको रहस्य खुलेको हो ।

जर्मन प्रहरीले देशका विभिन्न भागबाट उनीहरूलाई पक्राउ गरेको हो । अन्तर्राष्ट्रिय सञ्चारमाध्यमका अनुसार सरकारविरुद्धको 'कु' को प्रयासमा उग्रदक्षिणपन्थी तथा पूर्व सैन्य अधिकारीहरूको समूह सक्रिय भएको थियो । उक्त समूहले संसद भवन राइक्सटागमा पस्ने र शक्ति हत्याउने रणनीति बनाएको बताइएको छ ।

राजकुमार हेइनरिच १३ औँको नामले चिनिने ७१ वर्षीय जर्मन पुरुष उक्त रणनीतिको मुख्य योजनाकार रहेका थिए । जर्मनी एकीकरणलाई मन नपराएको समूहको रणनीतिमा 'कु' प्रयास भएको बताइएको छ । अन्तर्राष्ट्रिय समाचारहरूका अनुसार हिंसात्मक आक्रमण तथा जातीयतावादी षड्यन्त्रको हल्ला फैलाउने उग्रपन्थी राइक्सबर्गर अभियानका सदस्यहरू सरकार 'कु' को योजनामा सहभागी भएको जनाइएको छ ।

'कु' को प्रयासमा क्यूएनन आन्दोलनका सदस्यहरू समेत संलग्न रहेको बताइएको छ । उक्त आन्दोलनले आफ्नो देश अनधिकृत रूपमा चुनिएको राजनीतिक नेतृत्वले सञ्चालन गरेको दाबी गर्दै आएको छ । हालको जर्मन गणतन्त्रको सत्ता उल्ट्याएर सन् १८७१ ताकाको जस्तो जर्मनी राष्ट्र निर्माण गर्नुपर्ने भन्दै गरिएको षड्यन्त्रको तयारीमा कम्तीमा ५० जना संलग्न भएका हुन सक्ने अधिकारीहरूको भनाइ छ ।

पक्राउका लागि जर्मनीका १६ मध्ये ११ राज्यमा करिब ३ हजार प्रहरी अधिकारी परिचालन गरिएको थियो । दुई जनालाई इटाली र अस्ट्रियाबाट पक्राउ गरिएको प्रहरीले जनाएको छ ।