काठमाडौंमा शक्ति केन्द्र धाउँदै मधेस प्रदेशका मुख्यमन्त्रीका आकांक्षी

A+ A A-

चुनावको अन्तिम नतिजा आएसँगै मधेस प्रदेशका मुख्यमन्त्री र मन्त्रीका आकांक्षीहरू शक्ति केन्द्र धाउन थालेका छन् । मधेस प्रदेशमा सत्तारुढ गठबन्धन दलका नेपाली कांग्रेसबाट मुख्यमन्त्री तथा मन्त्रीका आकांक्षीहरू बालुवाटार पुगेर प्रधानमन्त्री शेरबहादुर देउवा र अन्य शीर्ष नेताहरूसँग भेटघाट गर्न थालेका छन् ।

प्रदेशको ठूलो दल एमालेका नेताहरू पनि काठमाडौंमा अध्यक्ष केपी ओलीनिवास बालकोट धाइरहेका छन् । रौतहट निर्वाचन क्षेत्र नम्बर १ को 'ख' बाट प्रदेशसभामा निर्वाचित कांग्रेसका मधेस प्रदेश सभापति कृष्ण यादव आफ्नो नेतृत्वमा सरकार बनाउन सभापति देउवादेखि सत्तारुढ गठबन्धन दलका नेताहरूसँग भेटघाट गरिरहेका छन् ।

चुनाव जितेलगत्तै सभापति देउवासँग भेटर यादवले जसपाका नेता तथा मुख्यमन्त्री लालबाबु राउतसहित सत्तारुढ गठबन्धन दलका प्रदेशस्तरका नेताहरूसँग छलफल गरेका थिए । राउतसँगको भेटलगत्तै उनी काठमाडौं पुगेका हुन् । मधेसमा आफ्नो गठबन्धनले बढी मत ल्याएकाले सरकार बनाउने तयारी थालेको प्रदेश सभापति यादवले बताए ।

सरकार गठनका लागि सत्तारुढ गठबन्धन दलका साथै अन्य दलहरूसँग पनि कुराकानी भइरहेको उनले बताए । ‘सरकार बनाउन पहल थालेको छु । सत्तारुढ गठबन्धनमा रहेका दलका नेताहरूसँग सरकार कसरी बनाउने भन्ने विषयमा छलफल भइरहेको छ,' उनले भने ।

त्यसैगरी, धनुषा ३ 'क' बाट निर्वाचित रामसरोज यादवले पनि आफ्नो नेतृत्वमा सरकार बनाउन सक्रियता देखाएका छन् । कांग्रेस नेता विमलेन्द्र निधिनिकट यादवले अहिले पार्टीका शीर्ष नेतहरूसँग भेटघाट गरिरहेका छन् । सर्लाही ४ 'क' बाट निर्वाचित कांग्रेसका नेता वीरेन्द्र सिंहले पनि मुख्यमन्त्रीको दाबी गर्दै आएका छन् । उनी पनि अहिले काठमाडौंमै छन् ।

नेकपा एमालेबाट मुख्यमन्त्रीका दाबेदार रहेका महोत्तरी ४ 'ख' बाट निर्वाचित सरोजकुमार यादवले शक्तिमा दौडधुप बढाएका छन् । यादवले मधेसमा सरकार गठनका विषयमा अध्यक्ष केपी शर्मा ओलीसहितका शीर्ष नेताहरूसँग छलफल गरिरहेका छन् । एमाले नेता तथा धनुषा १ 'ख' बाट निर्वाचित रामचन्द्र मण्डल पनि अहिले काठमाडौंमै छन् ।

मुख्यमन्त्रीको दाबी गर्दै आएका मण्डलले पनि अध्यक्ष ओली, उपाध्यक्ष रामबहादुर थापा बादललगायत नेताहरूसँग छलफल गरेका छन् । तत्कालीन नेकपा विभाजन हुँदा माओवादी केन्द्र छोडेर एमालेतिर लागेका मण्डलले भने, ‘पार्टीभित्र मुख्यमन्त्रीका लागि म योग्य छु । तर पनि पार्टीले गर्ने निर्णय स्वीकार्छु ।'

प्रकाशित मिति: बुधबार, मंसिर २१, २०७९ १२:०३