बहुविवाह गरेको व्यक्तिलाई समानुपातिक सूचिबाट हटाउन माग गर्दै निर्वाचन आयोगमा निवेदन

बहुविवाह गरेको व्यक्तिलाई समानुपातिक सूचिबाट हटाउन माग गर्दै निर्वाचन आयोगमा निवेदन

A+ A A-

बहुविवाह गरेको व्यक्तिलाई प्रतिनिधिसभा र प्रदेशसभाको समानुपातिकको सूचीबाट हटाउन माग गर्दै निर्वाचन आयोगमा निवेदन परेको छ ।

मुलुकी अपराध संहिता २०७४ को दफा १७५ मा बहुविवाहलाई कसुरको रूपमा परिभाषित गरिएको उल्लेख गर्दै अभिवक्ता केदार लुईंटेलले बहुविवाह गर्ने व्यक्तिहरूलाई समानुपातिकको सूचीबाट तत्कालै हटाउन माग गर्दै मंगलबार निर्वाचन आयोगमा निवेदन दर्ता गराएका हुन् ।

राजनीतिक दलले कानुन निर्माण गर्ने विधायकमा सजाय पाउने कसुरदारलाई सिफारिस गरेबाट मुलुकमा विधिको शासनमाथिको चुनौती भएको निवेदकको दाबी छ ।

बहुविवाहको कसुर गरेको भन्दै राष्ट्रिय प्रजातन्त्र पार्टीका प्रेमराज थाम्सुहाङ, नेपाल कम्युनिस्ट पार्टी (मार्क्सवादी लेनिनवादी) का कृष्ण बहादुर आले, नेपाल कम्युनिस्ट पार्टी (मार्क्सवादी लेनिनवादी) का चिरञ्जीविराम थारु, लोकतान्त्रिक समाजवादी पार्टी नेपालका अकवाल कविराज, लोकतान्त्रिक संघीय मञ्चका ज्ञान बहादुर इबुङ लिम्बु र नेपाल कम्युनिस्ट पार्टी (एमाले) का चक्रपाणी शर्माको नाम हटाउन माग गरिएको छ ।

बहुविवाहको कसुर गर्ने व्यक्तिलाई एक वर्षदेखि पाँच वर्षसम्म कैद वा दश हजार रुपैयाँदेखि पचास हजार रुपैयाँसम्म जरिवाना हुने व्यवस्था छ ।

सरकारी निकायले बहुविवाह गरेको थाहा जानकारी पाएपछि अनुसन्धान गरी कारबाही गर्नुपर्नेमा कानुनले कसुरदार मानेको व्यक्तिलाई विधायिकामा पुर्‍याउने कार्यले विधिको शासनमाथि चुनौती दिएको पनि निवेदक लुईंटेलको दाबी छ ।

सर्वोच्च अदालतबाट बहुविवाहको कसुरमा प्रतिपादित नजिर सिद्धान्तहरू अवलोकन गर्ने हो भने निर्णय नं. ७८८४ (ने.का.पा. २०६४ पुस अंक ९) मा बहुविवाहको कसुरलाई एउटा गम्भीर कसुर मानी कुनै पनि अवस्थामा कानुनको पालना नगर्ने छुट नहुने बोलिएको छ ।

यसैगरी निर्णय नं. १०१७८ (ने.का.प. २०७६ बैशाख अंक १) मा बहुविवाहको कसुर सरकारी निकायले थाहा जानकारी पाएको मितिबाट समानुपातिकको सूचिमा संलग्न बहुविवाह गरेका व्यक्तिहरू उपर मुद्दा दायर गर्नु पर्दछ ।

बहुविवाहको कसुर गरेको भन्दै राष्ट्रिय प्रजातन्त्र पार्टीको प्रदेशसभा १ को लागि समानुपातिकको सूचीमा पहिलो नम्बरमा प्रकाशित प्रेमराज थाम्सुहाङ, नेपाल कम्युनिष्ट पार्टी (मार्क्सवादी लेनिनवादी) बाट प्रतिनिधिसभाको लागि समानुपातिक सूचिको छैठौँ नम्बरमा चयन भएका कृष्ण बहादुर आले, नेपाल कम्युनिष्ट पार्टी (मार्क्सवादी लेनिनवादी) बाट प्रतिनिधिसभाको लागि समानुपातिक सूचिको एकसठ्ठीऔँ नम्बरमा चयन भएका चिरञ्जीविराम थारु, लोकतान्त्रिक समाजवादी पार्टी नेपालबाट प्रतिनिधिसभाको लागि समानुपातिक सूचिको सत्ताइसौँ नम्बरमा चयन भएका अकवाल कविराज, लोकतान्त्रिक संघीय मञ्चले ज्ञान बहादुर इबुङ लिम्बु र नेपाल कम्युनिष्ट पार्टी (एमाले) बाट समानुपातिक प्रदेशसभा लुम्बिनीको लागि समानुपातिकको सूचिमा १२औँ नम्बरमा चयन भएका चक्रपाणी शर्मा छन् ।

प्रकाशित मिति: मंगलबार, मंसिर २०, २०७९ १९:५१