समानुपातिकतर्फको मतगणना सकियो, कुन दलले कति सिट पाऊलान् ?

A+ A A-

४ मंसिरमा भएको प्रतिनिधिसभा र प्रदेशसभा चुनावको समानुपातिकतर्फको मतगणना सकिएको छ । मतगणना सकिएसँगै दलहरू पाउने सिट बाँडफाँटमा आयोग जुटेको छ । आज रातिसम्म थ्रेसहोल्ड कटाएका दलहरूले पाउने सिट संख्या निकालेर दलहरूलाई पत्र पठाउने आयोगको तयारी छ ।

एमाले, कांग्रेस, माओवादी, रास्वपा, राप्रपा, जसपा र जनमत पार्टीले थ्रेसहोल्ड कटाएका छन् । आयोगका कर्मचारीले दलहरूले प्राप्त गरेको सिट संख्या निकाल्ने काम गरिरहेका छन् । आयोगको बैठक बसेर दलले पाएको सिट संख्याबारे निर्णय गर्ने तयारी छ ।

अहिलेसम्मको नतिजाअनुसार एमालेले ३४ सिट, कांग्रेसले ३२ सिट, माओवादीले १४ सिट, रास्वपाले १३ सिट, राप्रपाले ७ सिट, जसपाले ५ र जनमतले पनि ५ सिट पाउने देखिन्छ । यद्यपि, यो अन्तिम सिट संख्या होइन । जम्मा खसेको मतको सदर मतको तीन प्रतिशत मत ल्याउने दलले मात्र समानुपातिकबाट सांसद हुन पाइन्छ । यसरी समानुपातिकबाट ११० सांसद चयन हुनेछन् ।

समानुपातिकमा कति मत सदर भएको हो आयोगले सार्वजनिक गरेको छैन । आयोगले दलहरूले पाउने सिट संख्यासहित सदर र बदर मत सार्वजनिक गर्ने जनाएको छ । आयोगको वेबसाइटमा भने १ करोड ५ लाख ६० हजार ६७ मत गणना भएको उल्लेख गरिएको छ ।

सिट संख्या निर्धारण भएपछि अन्तिम बन्दसूचीमा रहेका उम्मेदवारबाट नाम छ्नोट गर्न दलहरूलाई तीन दिनको समय दिएर पत्र पठाउने प्रमुख आयुक्त दिनेश थपलियाले बताए । यसका लागि निर्देशिकासमेत संशोधन गरिएको छ । प्रदेशसभातर्फ दलहरूले नाम पठाउन ७ दिनको समय रहेकोमा संशोधन गरेर तीन दिन बनाइएको छ ।

प्रतिनिधिसभातर्फ भने नाम छनोट गर्ने समय तीन दिन नै छ । दलहरूले सच्याउन चाहेमा थप दुई दिन लिनसक्ने छन् । दलहरूले अन्तिम बन्दसूचीमा नाम भएका उम्मेदवारमध्येबाट समावेशी समूहको प्रतिनिधित्व हुने गरी उम्मेदवारको नाम छनोट गरी केन्द्रीय समितिबाट निर्णय गराएर तीन दिनभित्र मुख्य निर्वाचन अधिकृतको कार्यालयमा पठाउनु पर्नेछ ।

दलहरूले बन्दसूचीबाट समयमै नाम छनोट गरी पठाएमा २७ मंसिरभित्र राष्ट्रपति विद्यादेवी भण्डारीलाई प्रतिवेदन बुझाउने आयोगको तयारी छ ।