डीएभी विद्यालयमा तीनदिने न्यूरो इन्क्लुजन प्रशिक्षण एवं कार्यशाला गोष्ठी सुरु

डीएभी विद्यालयमा तीनदिने न्यूरो इन्क्लुजन प्रशिक्षण एवं कार्यशाला गोष्ठी सुरु

A+ A A-

डीएभी विद्यालयले शिक्षकहरूलाई लक्षित गर्दै तीनदिने न्युरो इन्क्लुजन प्रशिक्षण एवं कार्यशाला गोष्ठी शुक्रबारदेखि सुरु गरेको छ । उक्त प्रशिक्षण लगातार तीन दिन सम्म संचालन रहनेछ ।

विश्वको जनसंख्याको २० प्रतिशत हिस्सा न्युरो डाइभरजेन्ट रहेको र उनीहरूको शिक्षण फरक ढङ्गबाट हुनुपर्ने मान्यता न्युरो डाइभरजेन्ट विद्वान्‌हरूको छ । सोहीअनुसार मुख्य प्रशिक्षक जोएल एस. गोडीले न्युरो डाइभरजेन्ट विद्यार्थीहरूको पहिचान, उनीहरूलाई आवश्यक पर्ने शिक्षण विधि र प्रोत्साहनलगायतका विषयमा प्रकाश पारे ।

विश्वमा स्थापित शैक्षिक प्रणालीले बहुमत जनसंख्याको आवश्यकतालाई सम्बोधन गर्न सफल भए पनि न्युरो इन्क्लुजन धारणा विकसित राष्ट्रमा समेत नौलो रहेको फ्रान्सेली प्रशिक्षक क्याथेरिन गुईमार्डले बताइन् । नेपालमा यस विषयप्रति चासो रहनु निकै खुसीको खबर रहेको उनको भनाइ थियो ।

डीएभी विद्यालयकी प्राचार्य डा. भुवनेश्वरी रावले विद्यालयमा हरेक विद्यार्थीले खुसीका साथ पढ्ने अवसर पाउनुपर्ने मत आफूले राख्दै आएको र न्युरो इन्क्लुजन अवधारणाले विद्यार्थीहरूको अन्तर्निहित क्षमता प्रस्फुटन गराउन सहयोग पुग्ने बताइन् । ‘हरेक विद्यार्थीले शिक्षकको मनमस्तिष्कमा रहेको अनुभूति गर्न सक्नुपर्छ,’ डा .रावले भनिन ।

डा. रावले अभिभावकहरूलाई समेत यस विषयमा प्रशिक्षण गर्न सके आफ्ना सन्तानको अभिभावकत्व कुशल ढङ्गबाट हुन सक्ने विचार राखिन् ।

अध्ययनले बताएअनुसार न्युरो डाइभरजेन्ट व्यक्तिहरूको दिमाग अत्यन्तै सक्रिय रहने गर्छ र यसलाई उनीहरूको रुचिअनुसार सही दिशा निर्देशन गर्न सके उनीहरूले समाज, राष्ट्र र विश्वकै लागि अतुलनीय योगदान पुर्‍याउन सक्छन् । तर, यसलाई नबुझी सामान्य व्यक्तिअनुरुप शिक्षादीक्षा दिए उनीहरू जीवनमा असफल रहने अध्ययनले देखाएको छ ।

प्रशिक्षणको दोस्रो दिन गोडीसँगै अस्ट्रेलियाली प्रशिक्षक वाटाली फिलिप्स–फाउन्डर न्युरो गिफ्टेड र तेस्रो दिन सारा लुइस फाउन्डर वार्यड डिफ्रेन्टली, यूके र सुइडेनी इलिजावेथ विकल्याण्डरको प्रशिक्षण रहनेछ ।

DAV (2)1670144575.jpg

उक्त प्रशिक्षणमा अनिमा नायर, गीथा सोलराज र रूप आनन्द आरले समेत आफ्नो विचार राखेका थिए ।
यसैबीच डीएभी विद्यालयका अध्यक्ष अनिल केडियाले सम्पूर्ण सहभागीहरूलाई तीनदिने प्रशिक्षणको शुभकामना दिँदै यस अवधारणाले नेपालमा शैक्षिक जागरण ल्याउन सफल हुनेमा विश्वास व्यक्त गरे । अध्यक्षले आगामी शैक्षिकसत्रदेखि न्युरो डाइभरजेन्ट पाठ्यक्रम तयार पारी शिक्षण प्रक्रिया अगाडि बढाउने जानकारीसमेत गराए ।

अध्ययनले देखाएअनुसार विश्वविख्यात वैज्ञानिक, उद्योगपति, कलाकारलगायत अन्य पेसामा संलग्नहरू न्युरो डाइभरजेन्ट रहेको मुख्य प्रशिक्षक जोएलले जानकारी गराए ।

प्रकाशित मिति: आइतबार, मंसिर १८, २०७९ १४:४८