केन्द्रका सहसचिवको तलब प्रदेश उपसचिवको बराबर

सांकेतिक तस्बीर

A+ A A-

केन्द्र सरकारको मातहतका कर्मचारीले भन्दा प्रदेश र स्थानीय तहका सोही स्तर कर्मचारीले बढी तलब पाउने भएका छन् । सरकारले १ साउनदेखि कार्यान्वयनमा ल्याएको नयाँ तलबमान अनुसार केन्द्रका कर्मचारीको भन्दा प्रदेश र स्थानीय तहका कर्मचारीको तलब बढी देखिएको हो ।

प्रदेश र स्थानीय तहमा कर्मचारी जान नमानेपछि केन्द्र मातहत कर्मचारीको भन्दा स्थानीय तह र प्रदेशमा जाने कर्मचारीको तलब बढी राखिएको अर्थ मन्त्रालयका प्रवक्ता उत्तरकुमार खत्रीले जानकारी दिए ।

‘समायोजन प्रक्रियामा सहभागी भएर प्रदेश र स्थानीय तहमा जाने कर्मचारी कम देखिए, केन्द्रमा बढी कर्मचारी हुने र प्रदेश तथा स्थानीय तहमा कम कर्मचारी हुने समस्या देखिएपछि आर्थिक प्रोत्साहन दिएर कर्मचारीलाई आकर्षित गर्न यस्तो गरिएको हो,’ प्रवक्ता खत्रीले भने ।

अर्थ मन्त्रालयले हालै सार्वजनिक गरेको नयाँ तलबमान अनुसार केन्द्र सरकारअन्तर्गतका सहसचिवको मासिक तलब ५८ हजार ४ सय ३३ रुपैयाँ छ । तर, यही पदका कर्मचारी प्रदेश तथा स्थानीय तहमा गए उनीहरुको मासिक तलब ५९ हजार ३५ रुपैयाँ हुन्छ ।

केन्द्र सरकारले सहसचिवलाई दिने तलब बराबर स्थानीय तह र प्रदेशमा जाने वरिष्ठ उपसचिवले नै खाने गरेका छन् । प्रदेश र स्थानीय तहमा समायोजन हुने १०औं तहका अधिकृतले मासिक ५८ हजार ४ सय ३३ रुपैयाँ तलब पाउने भनिएको छ । १०औं तहका अधिकृत भनेको वरिष्ठ उपसचिवसरहको पद हो । केन्द्र सरकारका सहसचिवले पनि त्यति नै तलब पाउँछन् ।