काे हुन् यी गोल्डेन गाइज, जो लगाउँछन् ३ किलो सुन

A+ A A-

भारतको चर्चित रियालिटी शो बिग बोसको घरमा हालै गोल्डेन गाइजको इन्ट्री भएको छ । गोल्डेन गाइजको नामबाट चर्चित सनी नानासाहेब वाघचौरे र सञ्जय गुर्जरलाई बिग बोसले एउटा काम जिम्मा लाएको छ । गोल्डेन गाइजले बिग बोसको घरमा रहेर प्रतियोगीलाई हारेको २५ लाख राशि फेरि जित्ने मौका दिनेछन् । बिग बोस- १६ का प्रतियोगीले एक टास्कका क्रममा ५० लाखको इनाम राशिमध्ये २५ लाख हारिसकेका छन् । अब गोल्डेन गाइज यही हारेको २५ लाख रुपैयाँ फर्काउनका लागि एक खास टास्क लिएर बिग बोसको घरमा आएका हुन् ।

को हुन् गोल्डेन गाइज ?

सन् २०१६ मा आएको फिल्म ग्रेट ग्राण्ड मस्तीको प्रमोसनका क्रममा फिल्मको स्टारकास्ट विवेक ओबरोय, रितेश देशमुख र अफताव शिवदासानी कपिल शर्माको शोमा पुगेका थिए । पहिलोपल्ट यी गोल्डेन गाइज यसै शोमा भारतीय दर्शकमाझ देखिएका थिए ।

गलामा मोटा–मोटा सुनको सिक्री, हातमा उस्तै भारी सुनका ब्रासलेट अनि जुत्तासमेत सुनकै लगाएका सनी नानासाहेब वाघचौरे र सञ्जय गुर्जरले शोका होस्ट कपिल शर्माको ध्यान आफूतिर खिचेका थिए ।

गोल्डेन गाइज महाराष्ट्रस्थित पुणेको पिम्परी–चिन्चवाडका हुन् । पुणेमा पढेबढेका गोल्डेन गाइजले सानैदेखि सुनका गहना लगाउँदै आएका छन् । दुवैले दिनमा तीन किलो वा योभन्दा बढी सुन लगाउँछन् । उनीहरूलाई पुणेमा गोल्ड म्यानको नामले पनि चिनिन्छ ।

सनी नानासाहेब वाघचौरेलाई मायाले मानिसहरूले नाना मात्रै पनि भन्छन् । उनले आफ्नो पितालाई समर्पित ‘नाना’ नामको सुनको सिक्री बनाएका छन्, जुन अक्सर उनले लगाएका हुन्छन् ।

सनीले मोडल एक्टर प्रीति सोनीसँग विवाह गरेका छन् । सञ्जय गुर्जरलाई मायाका साथ मानिसहरूले गुर्जन भन्छन् । सञ्जयको लक्की नम्बर ७ हो ।

फिल्म कनेक्सन

सन् २०१६ मा कपिल शर्मा शोमा आएका रितेश देशमुखले दर्शकलाई भनेका थिए, 'उनीहरू अभिनेता विवेक ओबेरोयका साथी हुन् र विवेक ओबेरोयको फिल्मका लगानीकर्तासमेत रहे ।'

यसैमा सामेल छ, ‘जिला गाजियाबा’ र ‘जयन्तीभाई की लभ स्टोरी’ । सन् २०१३ मा विवेकको फिल्म ‘जिला गाजियाबाद’ मा सनी वाघचौरेले सानो भूमिका निभाएका छन् । वास्तवमा सन् २०१२ मा दुवैले फिल्ममा लगानी गर्न थालेका थिए । फिल्ममा लगानीबाहेक उनीहरूको आफ्नै व्यवसाय पनि छ । उनीहरू घरजग्गा र निर्माणसँग सम्बन्धित कारोबार गर्छन् ।

उनीहरूले केही गोडाउन, फ्ल्याट र घर भाडामा दिएका छन् । पुणेमा उनीहरूका दुई होटल अनि एक रिसोर्ट छन् । यो सबै कारोबार सनी, उनका बुवा र ठूल्दाइ मिलेर हेर्छन् । बन्टी र बन्टीका ठूल्दाइ पनि नेता हुन् ।

सलमान खानको परिवारसँग पनि गोल्डेन गाइजको सम्बन्ध छ । सलमानका भाइ सोहेल खान गोल्डेन गाइजलाई आफ्नो साथी मान्छन् । कपिल शर्माको शोपछि दुवै थप चर्चित बने र सोसल मिडिया स्टार बन्न पुगे ।

उनीहरू टीभीका इन्डियन आइडल, द खतरा शोजस्ता कैयौँ रियालिटी शोमा विशेष अतिथिका रूपमा उपस्थित भए । दुवैका सोसल मिडियामा लाखौँ फलोअर्स छन् । सोसल मिडियामा उनीहरू अक्सर फिल्म स्टारका साथ भेटघाट गरेका तस्वीरहरू शेयर गर्छन् ।

सन् २०२१ मा आएको अन्सारी मोहसिन र निकिता रोयको गीत ‘दोनों यारा’ र सन् २०२२ मा आएको स्टार बोय एलओसीको गीत ‘नाच वसन्ती’को भिडियोमा पनि गोल्डेन गाइजलाई देख्न सकिन्छ ।

उनीहरू अक्सर पुणेका स्थानीय कार्यक्रममा विशेष सेलेब्रिटीका रूपमा उपस्थित हुने गरेका छन् । आफ्नो ऐसआरामको जीवनशैलीलाई उनीहरू अक्सर सोसल मिडियामा शेयर गर्छन् ।

यी दुवैले ‘गोल्डेन गाइज’ नामबाट एक एनजीओ पनि सुरु गरेका छन्, जसमा उनीहरू पुणेमा गरिब बच्चालाई हरेक दिन खाना दिने गर्छन् र दीनदु:खीलाई सहयोग गर्छन् ।

सुन र सम्बन्ध

गोल्डेन गाइज महाराष्ट्र पुणेको पिम्परी–चिन्चवाडका हुन् । सनीको जन्म २ जनवरी १९९० मा पुणेमा भयो र सञ्जय २७ जनवरी १९८५ मा जन्मेका थिए ।

पुणेमै पढेबढेका गोल्डेन गाइज सानैदेखिका साथी हुन् । उनीहरूले डीवाई पाटिल कलेजबाट आफ्नो पढाइ पूरा गरे । कपिल शर्माको शोमा उनीहरूले भनेका थिए, 'कलेज उनीहरूकै हो ।'

खासमा कलेजको जग्गा उनीहरूको हो । कलेज पनि उनीहरूले नै बनाएका थिए । यी दुवैले सानैदेखि सुनका गरगहना लगाउँथे । दुवै संयुक्त परिवारका हुन्, जसमा ५८ सदस्य छन् । सनी वाघचौरे र सञ्जय गुर्जरको पागलपन सुनको गहना लगाउनुसम्म मात्रै सीमित छैन । उनीहरूलाई महँगा गाडीको सोख पनि छ । दुवैसँग केही महँगा गाडीहरू छन्, जसमा बीएमडब्लू, मर्सिडिज, अडी, रेञ्ज रोभर र जगुआर छन् ।

यीमध्ये केही महँगा गाडीमा उनीहरूले सुनको कभरसमेत लगाएका छन् । सुनवाला गाडी सडकमा निस्कँदा नोक्सानीबाट जोगाउन अघिपछि दुई/चार गाडी पनि साथमै गुड्ने गरेका छन् । गहना र गाडीबाहेक उनीहरूसँग फोन, जुत्ता, घडी र साइकल पनि सुनकै छ । गोल्डेन गाइज बाहिर निस्कँदा उनीहरूको सुरक्षाका लागि हरसमय बडीगार्ड साथमै हुन्छन् ।

प्रकाशित मिति: शनिबार, मंसिर १७, २०७९ ०७:०३